Iueyikatsajtsilis se yejuan najmana
102
NoTEKO, xkaki noueyikatsajtsilis; ¡xchiua para motech ma ajsi noueyikatsajtsilis!
2 Maka xnechtlalkaui aman ijkuak sanoyej ninajmana.
¡Xkaki tlinon nimitsijlia!
¡Nimantsin xnechnankili ijkuak nimitsnotsa!
3 Nonemilis popolijtiu ken itlaj poktli,
noomiyouan tlantiuij ken itlaj tlikojtli yejuan tlatlatiuij.
4 Noyojlo no kenon xojtli yejuan uaktiu.
¡Nion apistli xok nechajsi!
5 Nokuetlaxyo hasta yopepechiu ipan noomiyouan
pampa sanoyej nichoka.
6 Ninemi kenon tototl pelícano
yejuan iselti nemi ipan xalpatlajkan,
noso kenon tekolotl yejuan ajmankatsajtsi.
7 Xok nikochi.
Ninemi noselti kenon tototl
yejuan iselti nemi ikuapan kajli.
8 On yejuan nechtlauelitaj, mojmostla tlamach nechteneuiliaj,
niman hasta kitekitiltiaj notoka para nechuijuikaltiaj.
9 Sanoyej ninajmana.
Xok nikua tlakuajli, yej nikua tlikonextli.
On tlen nikoni hasta iuan neliui nixayo,
10 pampa tejua sanoyej tikualani.
Tejua tej, otinechkuiteu,
pero kemaj otinechtlajkal.
11 Nonemilis panoua ken itlaj tlaseuajlotl;
nipilintiu ken itlaj xojtli.
12 Pero tejua noTEKO, motekiuayoj onyas para nochipa;
¡motokatsin nochipa kelnamikiskej!
13 Xuajla noTEKO, xkikneli Jerusalén,
pampa yoyejkok on tiempo ijkuak tikiknelis.
¡Yoyejkok on tonajli ijkuak tiktlapojpoluis!
14 Motekitkauan kixtlajsojtlaj on temej yejuan xintokej;
najmanaj ika nochi xoxotontok.
15 Nochimej naciones niman reyes de in tlaltikpaktli,
kitlakaitaskej iyektokatsin toTEKO.
16 Ijkuak toTEKO oksejpa kichijchiuas Jerusalén,
niman ompa tikitaskej iueyilis.
17 Ijkuakon, kakis inueyikatsajtsilis
on yejuan xkipiyaj akinon impan tlachas,
niman xkaman nonenekis kikakis intlajtlanilisuan.
18 Ijki ma notlajkuiloltlali in tlajtlamach
para kimatiskej on teuejkakoneuan,
para kiueyiteneuaskej toTEKO.
19 ToTEKO, ouajtlachix ipan in tlajli
desde ne iluikak ipan iyektiopan,
20 para okikak inchokilis on yejuan tsakutokej
niman okinmanauij on yejuan yokintlajtlakolmakakaj ipan mikilistli.
21 Ijkon nochiuas para itokatsin toTEKO
ma kitlakaitakan ne Sión,
niman ma kiyekteneuakan toTEKO ne Jerusalén,
22 ijkuak nochi tlakatl de nochimej naciones,
niman nochimej on reyes nosentlaliskej para kimauistiliskej.
23 Ikuak sanken nitelpochtli katka,
noTEKO onechkixtilij nochikauilis
para más saniman nimikis.
24 Nejua onikijlij:
"NoDios, maka xnechkixtili nonemilis
ijkuak sanken nitelpochtli.
Tejua tinemi para nochipa.
25 Ijkuak nochi kemach opeu onkaj,
tejua otiktlalij in tlaltikpaktli,
niman tejua otiktlalij on cielo.
26 Niman nochi on popoliuiskej,
pero tejua nochipa tinemis.
Nochi tlen onkaj, ijsoliuis ken tlakentli.
Tejua nochi tikpatlas ken ijkuak yakaj kipatla itlaken.
27 Pero tejua, xkaman timopatla;
monemilis xkaman tlamis.
28 Tokoneuan niman toixuiuan yejuan uajnentiaskej,
tejuamej timotekitkauan nochipa kuajli kixikoskej on tlajyouilistli,
niman nochipa mouan nemiskej."