On rey kiprometerouilia Dios ika kuajli nouikas
101
Nejua ninokuikatis de on moueyitetlajsojtlalis, niman de on moyolmelajkanemilis;
nimitskuikatlalis tejua noTEKO.
2 Nejua melajki ninouikas.
¿Kamanon tiuajlas para tinechpaleuis?
Nejua sanoyej kuajli ninouikas ipan nochan.
3 Xkaman nikchiuas on xompayejyeualistli.
Sanoyej nechkualaniaj on yejuan kitlalkauiyaj Dios;
¡on kennomej xkaman iminuan ninouikas!
4 Nejua xkaman tlamach niknejnemilijtias tlen sanoyej xkuajli;
¡Xnikchiuas itlaj tlen xkuajli!
5 Nejua nikinkamatsakuas
on yejuan kinmichtakatejteneuaj iminnisiuchanejkauan;
xnikuelita ninouikas iminuan on yejuan sanoyej noueyiteneuaj
niman yejuan noueyimatij.
6 Nejua san nikintlapejpenis
on yejuan kuajli nouikaj ipan in país
para nouan chantiskej.
San nechtekipanoskej on yejuan kipiyaskej melajkanemilistli.
7 On yejuan omexayakyej, xkaman kalakis ipan nopalacio;
¡nion se yejuan tlakajkayauani, xnemis notech!
8 Mojmostla nikinmiktijtias on xompayejyeuamej de in país.
¡Nejua nikinkixtis de iueyikalpan toTEKO
nochimej on yejuan kichiuaj tlen xkuajli!