Ɲibaŋa jomɔ na jo wá Misira na
29
Ayiwa, yee kɛ wuu li wo yeŋɛ kɛ wogo ki cabyaa kɛ ni shuun wu na Tɛhɛnɛ Baa Kilɛ wo jomɔ pʼa nɔ nɛ na, na nɛ pye:2 «Sipyiyawyii, ma ɲaha ki ŋmahana ɲɛri Farawɔn yíri, Misira saan we, mʼa Kilɛ tuduro jo wá wu ni Misira fiige ki bɛɛri na! 3 Yi jo wu mu na yemu Kafɔɔ Tɛhɛnɛ Baa Kilɛ wa yu ge, na yee yi wa ye:
‹Nʼa da yìri ma fɛni Farawɔn,
Misira fiige ki saan we,
Suumɔ lɔhɔ yakanhaŋa mu ɲɛ,
kemu kʼa sinnɛ
Nili Gba wu keye yi niŋɛ ni ge.
Mu ya yu na mu wo wu ɲɛ Nili Gba we,
na mu wʼa wu dà mayɛ kaa na.
4 Nʼa da ba shɔhɔshɔhɔŋɔ le ma keeshɛnhɛyɛ yi na, di Nili Gba keye yi fyaa pu tara ma kɔrɔyɔ yi na, di ma kile di yeege ma Nili Gba keye yi ni, ni ma Nili Gba wu fyaa pu ni, pee piimu pʼa tara ma kɔrɔyɔ yi na ge.
5 Nɛ na ba ma yaha siwaga ki ni,
ma ni ma Nili Gba keye
yi fyaa pu bɛɛri ni.
Ma na ba shɛ do sige ki ni,
sipya da ba da di ma lɔ,
di shɛ ma ɲuŋɔ ŋmɔhɔ wɛ.
Nɛ na ba ma kan ɲiŋɛ ki yacoyo ye,
ni fugba shazhɛɛrɛ ti mu,
mʼa bye yee wo xaara.
6 Misira fiige ki shɛɛn pu bɛɛri
na ba li cɛ lee funŋɔ ni
na nɛ wu ɲɛ Tɛhɛnɛ Baa Kilɛ we,
bani pu dɛgɛ wu baraga kʼa xɔ
ba wahagaanra ɲɛ wɛ,
Izirayɛli wo puga ki mu.
7 Ba pʼa shɛ puyɛ tiiŋɛ mu na wɛ,
a mu di gɛgi,
na pu kapaŋa ki bɛɛri shɛɛngi.
Ba pʼa shɛ puyɛ tiiŋɛ mu na wɛ,
a mu di gɛgi,
na pu sɛrɛɛ ki ŋmahana.›
8 «Lee wuu na yemu Kafɔɔ Tɛhɛnɛ Baa Kilɛ wa yu ge, yee yi wa mɛ na: ‹Nʼa da ŋmɔpara yaha di ba ma fɛni, di ma sipyii pee ni yapɔrɔyɔ yi gbo. 9 Misira na ba ɲɛri takoloŋɔ ni kataha, pʼa li cɛ lee funŋɔ ni na nɛ wu ɲɛ Tɛhɛnɛ Baa Kilɛ we. Bani wʼa jo na: “Nɛ wo wu ɲɛ Nili Gba, nɛ wʼa wu dà!” 10 Lee wuu na nʼa da ba yìri ma ni ma Nili Gba keye yi fɛni. Nɛ na ba Misira ɲɛri kataha. Na co Migidɔli kulo li na, fo na shɛ nɔ Siyɛnia kulo li na, na gari fo Kushi fiige ki tɛhɛŋɛɛ ki na, yee bɛɛri na ba ɲɛri katahaya ni takoloyo. 11 Sipyiyawyii la shishiin tɔɔgɔ da ga zhan wà nige wɛ, yabobogo ka shishiin fereŋɛ da ga zhan wà nige wɛ. Misira fiige ki na ba gori yaha wà sipya baa fo yee kɛlɛɛ shishɛɛrɛ (40). 12 Nɛ na ba Misira fiige ki kyɛɛgigana kolo na ye fiiye nigyɛɛgɛyɛ yi na, na wu kulogoo ki kyɛɛgigana kolo na ye kulogoo ki na kee kiimu ki ɲɛ katahaya ge, fo na shɛ da yee kɛlɛɛ shishɛɛrɛ (40). Nɛ na ba Misira shɛɛn pu caaga fiiye yatii shɛɛn pu tɛ ni, nɛ na ba pu caaga na kari fiiye yi bɛɛri ni.›
13 «Yemu Kafɔɔ Tɛhɛnɛ Baa Kilɛ wʼa yu ge, yee yi wa mɛ na: ‹Yee kɛlɛɛ shishɛɛrɛ (40) bu doro, nʼa da Misira shɛɛn pu kemɛ binnɛ na foro fiiye yi ni, yee yemu ni pʼa bi caaga kari ge. 14 Nɛ na ba Misira fiige ki kuruŋɔ na pa yaha ki siimɛ na. Nɛ na ba pu kuruŋɔ na pa Patɔrɔsi wo fiige ki ni, pu nɔhɔ tayirige ki wo fiige ke, pu na ba bye wà saanra ta ni temu fanha kʼa cɛ́rɛ ge. 15 Wu saanra ti na ba bye saanra ti bɛɛri wo nɔhɔdaan wuuro, wu di wa da ga wuyɛ durogo nige na ye fiiye yatii shɛɛn pu na wɛ. Nɛ na ba wu tirige kɔnhɔ wu ganha bu bye nige fiiye yatii shɛɛn pu ɲuŋɔ ni wɛ. 16 Wu da ba bye nige talaraga Izirayɛli nagoo pu mu wɛ. Izirayɛli nagoo pu bɛ da ba jurumu pyi nige ni pu wo dɛgɛ wu zha wu ni Misira fiige ki mu wɛ. Pu na ba li cɛ lee funŋɔ ni na nɛ wu ɲɛ Kafɔɔ Tɛhɛnɛ Baa Kilɛ we.› »
Saannaa Nabukodonozɔɔri na ba shɛ Misira co
(Zheremi 43:8-13 ; 44:30)
17 Ayiwa, yee kɛlɛɛ shuun ni gbarashuun (27) wu wo yeŋɛ nizhiige ki wo cazhiige ki na Tɛhɛnɛ Baa Kilɛ wo jomɔ pʼa nɔ nɛ na, na nɛ pye:
18 «Sipyiyawyii, Nabukodonozɔɔri, Babilɔni wo saan we, wʼa wu kashɛn keŋɛ ki pye kʼa kapyewagaa pye Tiiri fiige ki fɛni. Wu kashɛnŋmuu pu bɛɛri ɲuyɔ yʼa muu muu, na pu kapaya yi bana bana. Wu di ya nɔhɔ saraa yafiin bɛ ta na foro Tiiri ni wɛ. Kanhama pemu pʼa pye Tiiri fiige ki fɛni ge, wu ni wu kashɛnŋmuu pu ya ta pee wo saraa wa shishiin ta wɛ. 19 Lee wuu na yemu Kafɔɔ Tɛhɛnɛ Baa Kilɛ ya jo ge, yee yi wa mɛ na: ‹Nʼa da Misira fiige ki kan Nabukodonozɔɔri mu, Babilɔni wo saan we. Wu na ba gari ni ki naafuu wu ni, wu na ba kashɛn naafuu ta, na fiige ki kuu, wee na ba bye wu kashɛn keŋɛ ki wo saraa. 20 Kapyewagaa kiimu wʼa pye ge, nɛ na ba Misira fiige ki kan wu mu, bani nɛ mu wu kashɛnŋmuu pʼa pu labye wu pye. Kafɔɔ Tɛhɛnɛ Baa Kilɛ ɲɔjomɔ pi. 21 Kee caŋa ke, nɛ na ba fanha kan Izirayɛli wo puga ki mu. Mu Ezekiyɛli wi ge, nɛ na ba ma ɲɔ ki mugi pu niŋɛ ni, pʼa li cɛ lee funŋɔ ni na nɛ wu ɲɛ Tɛhɛnɛ Baa Kilɛ we.»