Shi wu bɛɛri na ba fe na ma Zheruzalɛmu mu
2
Amosi ja Ezayi ya Kilɛ tuduro temu ta na ɲaha tii Zhuda mara we, ni Zheruzalɛmu kulo li na ge.2 Cabaya yi na, Tɛhɛnɛ Baa Kilɛ wo Pɛɛŋɛ Pugbɔɔ ki wa faaboboŋɔ kemu na ge,
kee na ba deŋɛ ɲɔ faaboboyo yi bɛɛri ɲuŋɔ ni.
Ki na ba yirige na toro boboyo yi bɛɛri tàan.
Shi wu bɛɛri na ba gburogi na se wà.
3 Shi niɲɛhɛmɛ na ba ma na yu:
«Yi pa, wù dugi shɛ Tɛhɛnɛ Baa Kilɛ wo faaboboŋɔ ki na,
Yakuba wo Kilɛ wu wo Puga ke!
Wu na zhɛ wù kalaa wu korogoo ki ni, wù ma ganha na ki koo ɲaari.»
Bani Siyɔn kulo li ni Saliya wʼa da ba foro, Zheruzalɛmu ni Tɛhɛnɛ Baa Kilɛ wo jomɔ pʼa da ba foro.
4 Wu na ba bye shi wu wo te kiiri kɔɔnvɔɔ.
Wu na ba bye shi niɲɛhɛmɛ wo kaɲahashɔɔnrimɔ.
Pee na ba pu wo ŋmɔparaa ki kpɔɔn na ɲɛri
niiyɛ tuuyo ɲɔkpaanya, na pu wo canmaa pu ɲɛri na byi ɲakɔɔnyɔ.
Shi wa da ba ŋmɔpara lɔ nige wa fɛni wɛ,
Sipya bɛ da ba kashɛn ŋmɔngana taanni nige wɛ.
5 Yakuba wo tirige shɛɛn pee,
yi pa wù ba ɲaari Tɛhɛnɛ Baa Kilɛ wo kpɛɛngɛ ki na.
Tɛhɛnɛ Baa Kilɛ wo kiiri wu caŋa ke
6 Kafɔɔ, mu ya ma wo sipyii pu yaha wà, Yakuba wo tirige shɛɛn pee.
Bani pʼa ɲi Kilɛ-nɔhɔ shɛɛn pu wo kapyegee ki na.
Pu wa na cɛmɛ pyi ba Filisiti shɛɛn pu ɲɛ wɛ.
Pu ni shi watii shɛɛn pu ɲɛ kariɲɛɛgɛ ni.
7 Wu fiige kʼa ɲi warifyɛn ni sanni na,
tɛhɛnɛ ɲɛ wu naafuu wu na wɛ.
Wu fiige kʼa ɲi shɔnyɔ na,
tɛhɛnɛ ɲɛ wu kashɛn wotoriyo yi na wɛ.
8 Wu fiige kʼa ɲi yapɛrɛɛ na,
sipyii pu wa nuguro sinni puyɛ pyaa wo keye labye wu fɛɛ ni,
puyɛ pyaa keye yʼa wemu yàa ge.
9 Sipyiyawyii ɲuŋɔ ya sogi,
sipya nɔhɔ ya mugi. Kilɛ, ma ganha bu yafa pu mu wɛ.
10 Jé faaya yi ni, mʼa shɛ ŋmɔhɔ wà pomyɛ pu ni.
Mʼa mayɛ sanha lii Tɛhɛnɛ Baa Kilɛ wo fyaara kagbɔhɔɔ kee,
ni wu gbɔɔrɔ ti wo nɔɔrɔ wu ɲaha na.
11 Sipyiyawyii wo tabaara ɲii li na ba gbere,
Sipyii piimu pʼa puyɛ durogo ge, pee ɲuŋɔ na ba sogi.
Tɛhɛnɛ Baa Kilɛ yɛ pe na ba yirige kee caŋa ke.
12 Bani Kashɛn Keye yi Fɔɔ Tɛhɛnɛ Baa Kilɛ ya caŋa ka teŋɛ,
gbɔmɔ fɛɛ ni tabaara fɛɛ pu bɛɛri kaa na,
kɔnhɔ piimu pʼa puyɛ durogo ge, pee di dirige.
13 Wu na ba yìri Liban fiige ki sɛdiri tiye yi bɛɛri fɛni,
yee yemu yʼa tɔnnɔ na yìri fugba wu ni ge.
Wu na ba yìri Basan fiige ki wo shɛni tiye yi bɛɛri fɛni.
14 Wu na ba yìri faaboboyo nidɔɔnyɔ yi bɛɛri fɛni,
na yìri yaŋaboboyo nidɔɔnyɔ yi bɛɛri fɛni.
15 Wu na ba yìri kashɛn ɲuŋɔ círi círi zangasotɔɔnyɔ yi bɛɛri fɛni,
na yìri kashɛn ɲuŋɔ círi círi kasɔrɔyɔ baraga woyo yi bɛɛri fɛni.
16 Wu na ba yìri Tarisisi lɔhɔ ki kɔɔgbɔyɔ yi bɛɛri fɛni,
na yìri lɔhɔ kɔɔgbɔyɔ nizaaya pɛɛwa woyo yi bɛɛri fɛni.
17 Sipyiyawyii wo gbɔmɔ pu na ba jɛrɛŋɛ, sipyii wo tabaara ti na ba dirige,
Tɛhɛnɛ Baa Kilɛ yɛ pe na ba yirige kee caŋa ke.
18 Yapɛrɛɛ ki bɛɛri na ba juri.
19 Tɛhɛnɛ Baa Kilɛ ba yìri tuun wemu ni, na ɲiŋɛ ki ɲahara,
sipyii na ba ŋmɔhɔni faaya wegeye ni ɲiŋɛ ki nɔhɔdaan wegeye yi ni,
Tɛhɛnɛ Baa Kilɛ wo fyaara kagbɔhɔɔ kee,
ni wu gbɔɔrɔ ti wo nɔɔrɔ wu ɲaha na.
20 Kee caŋa ke, sipyii na ba,
pu warifyɛn yapɛrɛɛ ni pu sanni yapɛrɛɛ
ki waa puuloo ni zaginnaya mu.
Kee kiimu pʼa bi yàa,
na nuguro sinni ki fɛɛ ni ge.
21 Tɛhɛnɛ Baa Kilɛ ba yìri tuun wemu ni,
na ɲiŋɛ ki ɲahara,
sipyii na ba ŋmɔhɔni faaya wegeye
ni faaya yi wo jama pu ni,
Tɛhɛnɛ Baa Kilɛ wo fyaara kagbɔhɔɔ kee,
ni wu gbɔɔrɔ ti wo nɔɔrɔ wu ɲaha na.
22 Yi ganha bu sipyiyawyii pye yi tadaŋa wɛ.
lee ɲɛ ŋmɔgaŋa nigin yɛ munaa ni. Ɲaha wu da já bye wɛ?