Ezayi
Sɛmɛ wemu wʼa Kilɛ tudunmɔɔ Ezayi keree yu ge
1
Amosi ja Ezayi ya kashɛɛ lemu ɲa Zhuda ni Zheruzalɛmu shizhaa na, Zhuda mara wu wo saannaa Oziyasi, ni Yotamu, ni Akazi ni Ezekiyasi wo caŋa ɲɛhɛɛ ki ni ge, lee li wa le.aIzirayɛli ya Kilɛ cɛ wɛ
2 Fugba we, ta nuri, ɲiŋɛ ke ɲuwegee shan!b
Tɛhɛnɛ Baa Kilɛ wʼa yu.
«Nɛ jalaa bii, na pu lɛ, a pee di ɲuŋɔ nari nɛ na.
3 Nù ya wu kafɔɔ cɛ,
kafaŋa bɛ ya ki yalige yaaga cɛ ki kafɔɔ wu kaban.
Ga Izirayɛli ya nɛ cɛ wɛ,
nɛ wo sipyii pu ya keree ɲaha cɛni wɛ.
Zhuda sipyii pu ɲɛ jurumupyii
4 Bɔɔngɔ ki ɲɛ we jurumupyii shi we wogo.
Yee wo tiibaara tʼa pye tugugbɔɔrɔ yee ɲuŋɔ ni.
Kakuubyii shi yee ɲɛ, kanɔhɔbyii.
Yee ya Tɛhɛnɛ Baa Kilɛ yaha wà.
Yee ya Izirayɛli wo Fɛfɛɛrɛ wo wu fanha.
Yee ya laha wu na.
5 Ta takpɔngɔ ka bɛtii wa yee na sanha,
yee piimu pʼa se ɲaha na yi wo nʼa she wu ni ge?
Bani ɲuyɔ yi bɛɛri wa nɔɔyɔ, zɔlɔɔ pu bɛɛri fanha dʼa xɔ.
6 Ma lɔ ɲidahaa ki na, fo na shɛ nɔ ɲuyɔ yi na,
yafiin ya cuuŋɔ wɛ.
Yi bɛɛri ɲɛ tabanaya, ni kpɔɔnrɔ fɛ, ni nɔɔpiriye.
Yi ya ta je wɛ, sìnmɛ di ya le yi ni wɛ, yʼi ya ta pɔ wɛ.
7 Yee fiige kʼa kyɛɛgiguunɔ kyɛɛgi.
Yee kugbɔhɔɔ kʼa sòrogo.
Nabuun wa na yi kɛrɛyɛ yi yapyiire ti fogolo yiyɛ pyaa ki ɲii na.
Yi kyɛɛgigana ya kolo ba nabuun ma kakara pye mɛ wɛ.
8 Siyɔn kulo lʼa kori li yɛ, ba bugi ma bye mɛ ɛrɛzɛn tɛgɛ ni wɛ,
ba gba ma bye mɛ kɔnkɔnmu tɛgɛ ni wɛ.
Wʼa pye ba kugbɔɔ ɲɛ wɛ,
lemu pɛɛn ya kashɛn keŋɛ sin ma li maha ge.
9 Tɛhɛnɛ Baa Kilɛ, Kashɛn Keye yi Fɔɔ wu da bye
wu ya pii yaha wà wèe ni wɛ, wèe bi da gyɛɛgi
ba Sodɔmu ɲɛ wɛ, wèe bi da gyɛɛgi ba Gɔmɔɔric ɲɛ wɛ.
Pɛɛŋɛ kemu kʼa pɛn Kilɛ mu ge
10 Yee Sodɔmu ɲuŋɔfɛɛ piiri, yi Tɛhɛnɛ Baa Kilɛ wo jomo pu logo!
Yee Gɔmɔɔri shɛɛn piiri, yi ɲuwegee shan ni wù Kilɛ wu wo saliya wu ni!
11 Tɛhɛnɛ Baa Kilɛ ya jo: «Ɲaha yee saraya niɲɛhɛyɛ yʼi wa ɲɔgi nɛ na wɛ?
Yee ya dubyapee piimu wo saraya nisogoyo, na nupepinyɛ sìnmɛ pemu wo ge, nɛ tin yee na.
Yee nupɛhɛɛ kee, ni yee dubyapiye ye,
ni yee sikapee pu shishan pu la kʼa wolo nɛ na.
12 Yee ya ma na yeree nɛ ɲaha tàan ge,
jɔgɔ wu dʼa yee tun yʼa ma yʼa ɲaari nɛ pɛɛŋɛ pugbɔhɔ ki wo kaaŋa ki ni wɛ?
13 Yi yi ɲuŋɔ baa yakanya yi ɲɔ yaha, yi ganha ba ma nige ni yi ni na mu wɛ.
Yee nudanga yawurire tʼa ɲɛri nɛ mu
tanhaŋa yaaga.
Yee yevorovoyo yi wo kaleŋɛɛ kee, ni yee wo cadɛɛngɛ ke, ni yee wo pinnɛrɛ te,
yee ya yiyɛ pinnɛɛ na kakuuyo yemu pyi ge, nɛ funŋɔ wa nɛ wʼa yee ɲaa wɛ.
14 Yee yevorovoyo yi wo kaleŋɛɛ kee, ni yee kaleŋɛɛ ki tɔn pʼa pɛn nɛ mu.
Kʼa nɛ kana, Nɛ luu gbo kanha ki tàan.
15 Yee ba yi keye yi yirige
na nɛ ɲɛɛri tuun wemu ni,
nɛ ma na ɲaha ki tɔ wá yee na, kɔnhɔ di ganha ba yi ɲaa wɛ.
Yee mɛhɛ ɲɛrɛyɛ pye na pye, nɛ wa yee nuri wɛ.
Bani yee keye yi bɛɛri yʼa nɔhɔ sipyii shishan na.
16 Yi yiyɛ je, yʼi yiyɛ pye fɛɛfɛɛ.
Yi yi kapyegee niguuŋɔɔ ki laha
na ɲaha tàan, yʼi kakuubyii li ɲɔ yaha.
17 Yʼa kasaaŋaa bye taanni, yʼi da tiimɛ shaa.
Piimu pʼa pu sipyiɲii ɲaani ge, yʼa pee ɲaha kɔɔn lee bye na,
yʼi da cirimɛɛ kiiri kɔɔn ni tiimɛ ni, yʼi da yogo yu naxhugoshaa kaa na.
18 Ayiwa, Tɛhɛnɛ Baa Kilɛ ya jo: «Yi pa wù ba binnɛ tiin wù jo.
Yee jurumu wu mɛhɛ bi ɲaaŋa ŋmani ŋmani,
wu na ba fiinŋɛ lagi lagi.
Wu mɛhɛ bi ɲaaŋa fo na wuu mini mini,
wu na ba fiinŋɛ ba favige ɲɛ wɛ.
19 Yee bu sɔɔ na nɛ ɲɔmɛɛ co,
yee na ba fiige ki yalizaaya yi li.
20 Ga yee bu zhe, na nʼa she le yiyɛ ni,
ŋmɔpara li da ba yee kyɛɛgi,»
Tɛhɛnɛ Baa Kilɛ ɲɔjomɔ pu wa pii.
Kilɛ na ba Zheruzalɛmu pye fɛɛfɛɛ
21 Ba di gɛ! Kulo lemu li bye ɲɔmɛɛ fɔɔ ge,
a go lee lʼa ɲɛri mɛ navarashɔ!
Li bɛɛri bi ɲi tiimɛ na. Can bye li funŋɔ ni.
Ga nimɛ li bɛɛri ɲɛ sipyigbuu.
22 Ma warifyɛn wʼa ɲɛri pye tɔɔvire,
a lɔhɔ di jé ma duvɛn nidan wu ni.
23 Ma ɲuŋɔfɛɛ pu ɲɛ nʼa she fɛɛ, ni nagaalaa kariɲii.
Pu bɛɛri funyɔ yi wa pʼa pu ɲɔyɔ fɔrɔgɔ. Pu bɛɛri pʼa fe mamama yakanya fɛni.
Pu ya cirimɛ kiiri kɔɔn ni tiimɛ ni wɛ,
pʼi ya ɲuwegee shaan ni naxhugoshɔ mɛyire ni wɛ.
24 Lee wuu na, Tɛhɛnɛ Baa Kilɛ, Kashɛn Keye Yi Fɔɔ,
Izirayɛli wo Se Bɛɛri Fɔɔ wʼa jo na:
«Kapii dɛ! Nɛ na ba na funŋɔ ɲiŋɛ na doburoɲii pu ni.
Nɛ na ba gɔɔrɔ wolo na pɛɛn pu na.
25 Nɛ na ba na keŋɛ ki yirige sanha ma fɛni.
Nɛ na ba ma ɲa na ma pye fɛɛfɛɛ, na tɔɔvire ti wolo ma ni ba lofiinmɛ ya yaaga muuni wɛ.
Nɛ na ba tɔɔvire ti bɛɛri wolo ma ni.
26 Nɛ na ba kiirikɔɔn kan ma mu, piimu ɲɛ taashiinɛ li wuu pu shi ge,
na yɛrɛ kanvɛɛ bɛ kan ma mu piimu ɲɛ taalɛɛ li wuu pu shi ge.
Lee kadugo na, pu na ba ma yiri na, tiimɛ kugbɔɔ, kulo ɲɔmɛɛ wuu.»
27 Tiimɛ na ba Siyɔn kulo li ɲuŋɔ wolo.
Piimu na ba guri ba Kilɛ mu ge, pee ɲuŋɔ na ba wolo tiimɛ gbɔɔrɔ ni.
28 Ga nʼa she fɛɛ ni jurumupyii pu na ba binnɛ gyɛɛgi.
Piimu pʼa Tɛhɛnɛ Baa Kilɛ yaha ge, pee ɲuyɔ na ba dugo.
29 Terebɛnti tiye yemu yee wa gaan, yee di ɲɛ yi wo ɲidaan wu ge,
shiige na ba jé yee ni yee wuu na.
Kamahaya yemu yee ya shɔɔnri lɔ ge,
yee ɲuyɔ na ba sogi yee wuu na.
30 Bani yee na ba bye ba terebɛnti tige ɲɛ wɛ,
kemu wɛyɛ yʼa fanhaŋa ge,
kelee ba kamahaya ɲɛ wɛ, lɔhɔ ya yemu xuuŋɔ ge.
31 Nà fanhaɲɛhɛŋɛ fɔɔ wu na ba bye ba ɲawaya ɲɛ wɛ.
Wu kapyegee ki ma bye ba nasemuro ɲɛ wɛ.
Yi shuun wu bɛɛri na ba binnɛ zorogo.
Sipya wa shishiin wa da ba da wu kee na ki fugi wɛ.