Zhɔbu ya kaɲii kan Kilɛ mu
42
Wee tuun wu ni a Zhɔbu di Tɛhɛnɛ Baa Kilɛ pye:2 «Nɛ li cɛ jo mʼa jani keree bɛɛri na,
jo kaa la shishiin ya mu wo kaɲɔwuunɔ la fɛnri wɛ.
3 Mu ya jo na:
‹Wemu wʼa nibiige leŋɛɛ nɛ wo kaɲɔwuugoo ki ni
ni wu wo kaacɛbaara jomɔ pu ni ge, jɔgɔ wu ɲɛ wii wɛ?›
Can wu ɲɛ wii,
keree kiimu ki ɲɛ nɛ ki cɛ-ɛ ge, kee nɛ jo.
Kakanhaŋaa kiimu kʼa pɛlɛ ye nɛ wo lajɛ na ge,
kee nɛ jo.
4 Mu ya jo na:
‹Ɲuwegee shan, di jo.
Nʼa da ba ma yege, mʼa na ɲɔ shɔ.›
5 Nɛ ɲuwii lʼa bi mu kaa logo,
ga nimɛ nayɛ pyaa ki ɲii lʼa ma ɲa.
6 Lee wuu na nɛ nayɛ jaagi,
na daajeŋɛ jo na kapyegee ki na,
na gbazhɛnhɛ ni shɔɔnrɔ wo nayɛ na.»
Kilɛ ya Zhɔbu naɲiinɛɛ taanri wu jaagi
7 Ayiwa, ba Tɛhɛnɛ Baa Kilɛ ya jo xɔ ni Zhɔbu ni wɛ, na Tema shɛɛn Elifazi pye: «Nɛ luu lʼa yìri mu ni ma naɲiinɛɛ shuun wu tàan, bani yee ya ta nɛ kaa jo na saha ni can wu ni, ma na jo ba nɛ bulona Zhɔbu ya li pye pyegana lemu na wɛ. 8 Ayiwa, nimɛ yi nupɛhɛɛ gbarashuun ni dubyapee gbarashuun co, yʼi shɛ ni yi ni na bulona Zhɔbu mu, yʼi shɛ saraya nizogoyo wolo yiyɛ wuu na. Nɛ bulona Zhɔbu wu na ba nɛ ɲɛɛri yi mu. Nɛ na ba wu ɲɛrɛgɛ ki logo. Wee yɛ nigin wuu na nʼa da ba yi yaha wà, na da ba yi saraa na bɛ ni yi wo fungɔngɔbaara ti ni wɛ. Bani yee ya ta nɛ kaa jo na saha ni can wu ni ba nɛ bulona Zhɔbu ya li pye wɛ.»
9 Ayiwa, a Tema shɛɛn Elifazi ni Shuwa shɛɛn Bilidadi ni Naama shɛɛn Zofaari di gari. Tɛhɛnɛ Baa Kilɛ ya yemu jo pu mu ge, a pʼi shɛ lee pye. A Tɛhɛnɛ Baa Kilɛ di Zhɔbu wo ɲɛrɛgɛ ki logo.
Kilɛ ya kuri fɛrɛmɛ da sanha Zhɔbu mu
10 Ayiwa, ba Zhɔbu ya xɔ Kilɛ-ɲɛrɛgɛ ki na wu naɲiinɛɛ pu mu wɛ, a Tɛhɛnɛ Baa Kilɛ di Zhɔbu kuruŋɔ na pa yaha wu siimɛ na. Naafuu wemu wu bi fɛnhɛ pye wu mu ge, a Tɛhɛnɛ Baa Kilɛ di wee bɛɛri tɛhɛɛ shuun shuun kan wu mu. 11 A wu ceboronamaa ni wu ceboroshaa ni wu cɛvɛɛ nilɛɛ pu bɛɛri di ba wu mu. A pu bɛɛri di ba binnɛ li ni wu ni wu kaban. Tɛhɛnɛ Baa Kilɛ ya bɔɔngɔ kemu bɛɛri shan wu ɲuŋɔ ni ge, a pʼi wu pure, na wu luu ɲiŋɛ kee shizhaa na. A pu bɛɛri nigin nigin wu warifyɛn tuuyo nigin nigin ni sanni kabeleŋɛɛ nigin nigin kan wu mu.
12 Ayiwa, a Tɛhɛnɛ Baa Kilɛ di baraga le Zhɔbu ni fo na toro wu taashiinɛ li bɛ tàan. A wu dubyaa kabɔfoŋɔɔ kɛ ni shishɛɛrɛ (14.000) ta, ni ɲɔhɔyɔ kabɔfoŋɔɔ gbaara (6.000) ni faa niiyɛ pɔgɔɔ kabɔfonɔ nigin (1.000) ni kafazhaa kabɔfonɔ nigin (1.000). 13 A wu jalaa gbarashuun ni pushaa taanri bɛ ta. 14 A wu poro pushɔ nizhiimɛ wu mɛgɛ le na Zhemima, na shuun wo wu mɛgɛ le na Kesiya, na taanri wo wu mɛgɛ le na Kɛrɛni-Apuki. 15 Zhɔbu pushaa pu ɲɔhɔ bye saana ni fiige ki bɛɛri ni wɛ. A Zhɔbu di pu bɛ tahaa kan cɛn wu ni ni pu ceboronamaa pu ni.
16 Kee keree ki bɛɛri kadugo na, a Zhɔbu di yee xhuu nigin ni kɛlɛɛ shishɛɛrɛ (140) pye. A wu wu nagoo ni wu ɲabiye ɲa fo na shɛ nɔ pu sii li shishɛɛrɛ wuu li na. 17 A Zhɔbu di sii shi ta xuuni, a wu sii lɛ na da xu.