41
«Wemu wʼa giin na wee na já se ta ki na ge,wuyɛ wʼa faanna.
Ki ɲɛɲaa li yɛ wo fyaara wʼa sipya shaan.
2 Wa shishiin wo lowaa sanha wu pye wu to ki na wɛ.
Wee tuun wu ni sipya wekɛ na sɔɔ
di wu gbaa kuu nɛ wuu na wɛ?
3 Sipya wekɛ wu dʼa fɛnhɛ yaaga ka kan nɛ mu,
nɛ dʼa yaa na kee foo tɔ wu mu wɛ?
Yara yara li ɲɛ ye ɲahaya ye nɔhɔ ni ge,
lee bɛɛri ɲɛ nɛ wuu.
4 «Nɛ da já gori ki yatɛnyɛ yi bɛ kaa jo baa wɛ.
Nʼa da ki fanha ki kaa jo,
ni ki ceepuuro ti yaagana li bɛ.
5 Jɔgɔ wu da já ki sɛɛgɛ ki wolo ki na wɛ?
Jɔgɔ wu da já jé ki ganhaa ki tɛ wu ni wɛ?
6 Jɔgɔ wu da já ki ɲɔ ki wahaŋa wɛ?
Ki ganhaa kʼa sipya jaa yirige.
7 Ki kɔrɔyɔ yi ɲɛ ba ŋmasigiye ɲɛ wɛ.
Yee ya taanni, na dara dara yiyɛ na,
ba keŋɛ fɛ faakagereye ɲɛ wɛ.
8 Yʼa kemɛ fɔri yiyɛ ni, fo kafɛɛgɛ bɛ ya já
jé toro yi tɛ ni wɛ.
9 Kɔrɔgɔ ka bɛɛri ya nɔrɔ gbara ki kaafɔɔ wu na.
A yi bɛɛri di yiyɛ co.
Yafiin bɛ da já yi waraga laha yiyɛ na wɛ.
10 «Ba kʼa cìri wɛ, kpɛɛngɛ na ɲí
ma foro ki ɲɔ ke ni.
Ki ɲìi kʼa ɲí ba caŋa foro foro ɲɛɛgɛ ɲɛ wɛ.
11 Na ma gaanni na fòro ki ɲɔ ke ni.
Nasemuuro ma fòro ki ɲɔ ki ni.
12 Wurege ma gɔɔn na fòro ki munawegee ni,
ba shokana kafugo ma yìri na duri wɛ.
13 Ki ŋmɔgaŋa na já na shɔ kanhaa na.
Na ma gaanni na fòro ki ɲɔ ki ni.
14 Ki katige ki ni ki fanha ki ɲɛ.
Ba mʼa ki ɲa wɛ, ma jaa na yìri.
15 Ki ceesɛɛgɛ ki kurukuruyo yʼa gbile, na nɔrɔ yiyɛ na,
na sii shii xuuni, na dara ki na.
16 «Ki zɔ wʼa waha ba faapinnɛ ɲɛ wɛ,
wʼa waha ba tira ɲɛ wɛ.
17 Ki bu yiri,
ali naŋmaya yi bɛ wo jaalaa ma yìri,
yʼa fya, na baa.
18 Ma bu jo mʼa do ki na, ŋmɔpara wa yaaga pyi ki na wɛ,
ŋmaga, kelee canmi, kelee shazhinŋmaya bɛ kaɲɔɔ wa wà wɛ.
19 Toowɔ ɲɛ ki mu ba ɲawaya ɲɛ wɛ.
Daɲaa tɔɔrɔ di ɲɛ ki mu ba tinnɛ ɲɛ wɛ,
lemu ya xu ge.
20 Ki ya fe ŋmaŋmɔyɔ ɲaha na wɛ.
Sɔ kagereye di ɲɛ ki mu ba ɲawaya ɲɛ wɛ.
21 Kabege ɲɛ ki mu ba kamuu ɲɛ wɛ.
Ŋmaŋmɔŋɔ tunmɔ ɲɛ ki mu yaaga wɛ.
22 «Ki yacɛrɛ li wo kɔrɔyɔ yi ɲɛ ba shɔjaya ɲɛ wɛ,
yemu ɲɔyɔ yʼa taan ge.
Ki ba ɲaari, yee wo fɛ pu ma bye puuro ti ni.
23 Ki ma locogoŋɔ pye ki na gani ba shokana ɲɛ wɛ.
Ki ma gba lɔhɔ duuri ba nudanga sìnmɛ shɔɔ ɲɛ wɛ,
24 Ki tatorogo ki ma ganha na yɛrɛ ki kadugo yiri.
Wee xuu wu wo lɔhɔ ki ma bye kanna shifiire ti ɲɛ ki fugba ni.
25 «Ɲuŋɔfɔɔ wa ki mu naha ke ɲiŋɛ ke na wɛ.
Kʼa da kɔnhɔ ki ganha ga fya ɲa yaaga na wɛ.
26 Kʼa ɲii leni sige yakanhaya yi ni.
Kee ki ɲɛ sige yaŋmuyɔ tabaara woyo yi bɛɛri wo saan.»