Kilɛ ya jo na Zhɔbu wu wee ɲɔ shɔ
40
Ayiwa, a Tɛhɛnɛ Baa Kilɛ di Zhɔbu pye sanha na:2 «Mu wemu wʼa Se Bɛɛri Fɔɔ wu kaala ge,
ta mu na gbara mu wu zɔ taha Kilɛ na?
Mu wemu wʼa jaagi shaan Kilɛ na ge,
ta mu na já ye yegeye ye ɲɔ shɔ ya?»
3 Ayiwa, a Zhɔbu di Tɛhɛnɛ Baa Kilɛ ɲɔ shɔ na:
4 «Nɛ ɲɛ yaaga bɛ wɛ, nɛ ma já yekɛ taga mu ɲɔ shɔ wɛ?
Nʼa da keŋɛ taha na ɲɔ na, di cari nayɛ na.
5 Nɛ jo tɔɔɲii nigin, nʼa da yaaga jo nige wɛ.
Nɛ jo tɔɔɲii shuun, nʼa da ya taha yee na nige wɛ.»
Kilɛ ya li shɛ na se ɲɛ Zhɔbu ni wɛ
6 A Tɛhɛnɛ Baa Kilɛ di diin kafɛɛgbɔhɔ ki ni, na Zhɔbu pye:
7 «Mayɛ niŋɛ pɔ nimɛ ba naŋmaga ɲɛ wɛ,
nʼa da ba ma yege mʼa na ɲɔ shɔ.
8 Ta nɛ wo tiibaara bɛ mʼa giin di jo wɛ?
Ta bɛ mu wʼa giin mʼa nɛ pye jaagi fɔɔ,
mʼa mayɛ pye jaagi baa fɔɔ wɛ?
9 Ta mu bɛ wo keŋɛ ki ɲɛ ba nɛ Kilɛ wogo ki ɲɛ-ɛ ya?
Ta mu bɛ wo mujuu lʼa dinni ba nɛ wuu li ɲɛ-ɛ ya?
10 Saanra ni pɛɛŋɛ le mayɛ na,
mʼa ɲafɛ ni nɔɔrɔ taga mayɛ to.
11 Ma wo loyire li turi sipyiire ti na ba lɔhɔ ɲɛ wɛ.
Mʼa tɔɔɲii nigin ɲɛwiinɛ taga tabaara fɛɛ pu bɛɛri tirige.
12 Oo dɛ, ma ɲɛwiinɛ nigin yɛ taga tabaara fɛɛ pu bɛɛri ɲuyɔ sogi!
Mʼa sipyikuuyo yi tɔnhɔnɔ taapile ni!
13 Pu bɛɛri pinnɛ le ɲiŋɛ ni!
Pu tɔ faŋa nibiige ki ni!
14 Lee bu bye, nɛ bɛ na ba ma sɔ,
bani mayɛ pyaa wo fanha ki na já ma shɔ!»
Kilɛ ya lɔhɔ kidiriŋɛ keree jo Zhɔbu mu
15 «Ayiwa, kidiriŋɛ wii, nɛ wʼa ki da ba nɛ mu da mɛ wɛ.
Ɲà kʼa li ba nù ɲɛ wɛ.
16 Li wii, ki sɛrɛɛ kii ni ki fanha ki wa.
Ki kaanwaa li wa ki yacɛrɛ li wo xamyɛ pe ni.
17 Ki ma ki naŋa ki yirige, na ki shii ba sɛdiri tige ceefuu ɲɛ wɛ.
Ki shegee ki kavaan pʼa suri suri puyɛ ni.
18 Ki kaciiye yi ɲɛ ba daɲaa tɔɔrɔ begeye ɲɛ wɛ.
Ki gbodiye kaciiye yi ɲɛ ba toowɔ pubegee ɲɛ wɛ.
19 Kilɛ wo yaŋmuyaaya yi ni,
kee ki ɲɛ Kilɛ wo yayaaya yi bɛɛri ɲiizhe.
Ki yaavɔɔ wu yɛ wʼa já se ta ki naa.
20 Faaboboyo yʼa ɲà kaan ki mu.
Sige yaaya yi bɛɛri yi ma bye wà na xɔnhɔrɔ pyi.
21 Ga tiye nɔhɔ ni kʼa sinnɛɛ.
Dugo tiire ti wo faɲagaya yi ni ki ma shɛ lara.
22 Tiye yi wo ɲimɛ pu ma ki tɔ,
dutiire ti ma ki maha.
23 Ali lɔhɔ ki kafugo mɛhɛ bɛlɛ pɛlɛgana bɛɛri na, ki yaaga ɲɛ wa wɛ.
Ali Zhurudɛn Gba wu lɔhɔ ki mɛhɛ dugi
fo na ba ki co ki ɲɔ ke na, lee wa ki mu kaa wɛ.
24 Na ki yaha kʼa ɲìi mugi, jɔgɔ wu da já ki co wɛ?
Jɔgɔ wu da já ki pɛri, mʼa ki co, ma ki munaa furi wɛ?»
Lɔhɔ yakanhaŋa Leviyatan wu keree
25 «Ayiwa, lɔhɔ yakanhaŋa kemu mɛgɛ ki ɲɛ na Leviyatanb ge,
ta mu na já ŋmɛhɛnɛ taga ki co?
Ta ma na já mɛɛrɛ taga ki ɲile li pɔ?
26 Ta ma na já tire le ki munaa li na?
Ta ma na já ki keeshɛnhɛ ki furi ni ŋmaa ni?
27 Ta kʼa da ba ma ɲɛɛri xuuni?
Kayetanya kʼa da ba jo ni ma ni gɛ?
28 Ta ɲɔmɛɛ kʼa da ba lɔ ma mu
na kee na ba bye yaha ma wo bulo fo gbee ya?
29 Ta ma da ba xhɔnhɔni ni ki ni ba shazhira ɲɛ-ɛ ya?
Kelee ta ma da ba ki pɔ,
ma pushaa pu da xhɔnhɔni ni ki ni ya?
30 Ta pii na já binnɛ, na wá ki na, na ki co pɛrɛ,
piimu pʼa ki shɔ ge, na ki taa taa pee na ya?
31 Ta ma na já ki ceesɛɛgɛ ki furegi ni ŋmaya ni?
Ta ma na já canmi taga ki ɲuŋɔ ki furi?
32 Ma keŋɛ taha wii ki na yɛ sa!
Lee na gori yaha ma funŋɔ ni,
ma puge di wa da jé bɛ li shi na nige wɛ.»