Sige woŋma
39
«Kaafalaa pʼa seni tuun wemu ni ge, ta mu ya wee cɛ?Ta mu sanha sɔ ɲa wu na seni?
2 Pu lahaa kʼa yebyaa kiimu taa na na se ge,
ta mu ya ki ɲɔ cɛ?
Ta mu ya pu nagoo pu seduun cɛ?
3 Pu ma sogolo, na pu nagoo pu se,
na shɔ pu kanhama pu na.
4 Pu nagoo pu ma fanha ta, na lɛ sige ki ni.
Pʼa ba waa, na laha pu nii pu na.
Pu da guri ba nige pu yíri wɛ.»
Sige kafaŋa keree
5 «Jɔgɔ wu dʼa sige kafaŋa yaha kiyɛ mu wɛ?
Jɔgɔ wu dʼa ki pɔɔrɔ ti sanha, na ki yaha na gaaŋi wɛ?
6 Nɛ kacaaga pye ki puga,
ɲiŋɛ kemu ki ɲɛ suumɔ ɲiŋɛ ge, na kee pye ki puga.
7 Kugbɔɔ wo tunmɔ pu ɲɛ ki mu lawuu,
kʼi ya wotoripaama wo ŋmii li nuri wɛ.
8 Faaboboyo ye ni ki ma ɲaari na ki ɲɔlige shaa.
Ɲà tuugo bɛɛri ki ɲɛ niburege ge, kee ki ma zhaa.»
Senu keree
9 «Ta senu na gbara wʼa kapyeŋɛɛ pyi mu mu?
Ta wu na zɔɔ wʼa shuun mu wo kashɔ ki ni?
10 Ta mu na já tuugo pɔ wu na di tasugo su?
Ta wu na zɔɔ di faa pye ma mu mura ni?
11 Ta mu na zɔɔ di wu pye ma tadaŋa wu baraga ki wuu na ya?
Ta ma na ba ma labye wu yaha wu keŋɛ na ya?
12 Ta mu wa daa wu na na wu na já ma yalɔɔrɔ ti lɔ,
wu shinma shuu li shinma wu kemɛ ya?»
Kɔnɔsogoŋɔ keree
13 «Kɔnɔsogoŋɔ ma ki kapaya kpɔn kpɔn, na funŋɔ taan.
Ki kapaya yi ɲɛ masageŋɛ woyo shi,
ki shifugafugara ti bɛ.
14 Ki ma cɛrɛɛ shan ɲiŋɛ na, na gari na ki yaha.
Ɲiŋɛ ki wo kafugo ki na ba ki pye kʼa kuri.
15 Ki ya ki funŋɔ kɔɔn
na yaaga ka na já ɲaari doro ki ɲuŋɔ ni wɛ.
Ki ya ki funŋɔ kɔɔn
na naŋa yaaga ka na já ki tànha ja wɛ.
16 Ki ɲuŋɔ kʼa waha ni ki nagoo ni,
ma na giin na pu ɲɛ bɛ ki wuu wɛ.
Ki ya ki funŋɔ shaa
na ki kanhama pu na bye kanhawa wɛ.
17 Bani nɛ Kilɛ ya ta fungɔngɔ fɛɛrɛ kan ki mu wɛ.
Nɛ ta shizhiinmɛ kan ki mu wɛ.
18 Ga ki bu yìri na tafɛrɛ ta co,
na toro shɔngɔ ni ki dugivɔɔ tàan,
lee ɲɛ ki mu xɔnhɔrɔ kaa.
Shɔngɔ keree
19 «Ta mu wʼa shɔngɔ wo fanha ki leni ki ni?
Jɔ we wu wa ki katige ki ni ge,
ta mu wʼa wee le ki na?
20 Ta mu wʼa ki pyi ki na sirani ba kabeeŋɛ ɲɛ-ɛ ya?
Ki naɲiige mɛɛ lʼa cere ɲaari.
21 Fanha ke ki wa ki ni ge,
kee ma ki funŋɔ taan, kʼa ganha na nɛɛmugi wo.
Kʼa gburogi na diini kashɛn keye yi na.
22 Ki jate ya nɔ fyaara na wɛ.
Yafiin bɛ ya ki jaa yirige wɛ.
Ki ya dɛrɛɛ kadugo yíri ŋmɔpara ɲaha na wɛ.
23 Ki ba ki dugivɔɔ wu wo ŋmakɔŋɔ ki tunmɔ nuri,
canmi we ni ŋmɔpara lʼi ɲí,
24 kʼa sige kanha, na tafɛrɛ le.
Maga ki mɛɛ li bu foro, ki da yere nige wɛ.
25 Maga mɛɛ bɛɛri lʼa foro ge,
kʼa lee ɲɔ shɔ na: ‹Xan-xan-xan!›
Na ki yaha taliige ni, kʼa ganha na kashɛn ki nugo wo.
Kʼa kashɛn ɲuŋɔfɛɛ pu wo xuguŋɔɔ kee,
ni kashɛn ki wo sipyaa ki cɛ.
Kalaga ni ɲaa keree
26 «Ta mu wo fungɔngɔ fɛɛrɛ tʼa ma kalaga pye kʼa yìri,
na ki kapaya pii na gaaŋi woroo kulo kacɛ ki na ya?
27 Ta mu wo ɲɔmɛɛ na ɲaa ma yìri,
na gari fo fugba we ni?
Ta mu wo ɲɔmɛɛ na wʼa wu shiire tɛri
faaboboyo ye ɲidegee ni?
28 Faaya yi ɲɛ wu tatɛɛngɛ, ni wu tashɔngɔ,
wʼa shɛ do fo faaga ka wo gaan la ɲidii ni,
wu tama da daan xuu wemu ni-i ge.
29 Wee xuu wu ni wu ma diin, na wu xaara peele.
Wu ma ti ɲaa fo taliige ni.
30 Shishan wu nagoo ya gbuu.
Yaxuyo wa xuu wemu ni ge, wà wʼa daa*.»