Kilɛ ya jo ni Zhɔbu ni
(38:1—42:6)
Kilɛ ya jo ni Zhɔbu ni fugba ni ɲiŋɛ ki keree ɲuŋɔ tàan
38
Ayiwa, a Tɛhɛnɛ Baa Kilɛ di jo ni Zhɔbu ni na foro kafɛɛgbɔhɔ ki ni, na jo:2 «Wemu wʼa nibiige leŋɛɛ nɛ wo kaɲɔwuugoo ki ni
ni wu wo kaacɛbaara jomɔ pu ni ge,
jɔgɔ wu ɲɛ wii wɛ?
3 Mayɛ pɔ ba ŋmani ɲɛ wɛ, nʼa da ba ma yege,
mʼa na ɲɔ shɔ.
4 Nɛ ɲiŋɛ ki nɔhɔ shan tuun wemu ni ge,
mii mu di bi bye wɛ?
Ma bi ta mʼa kaa cɛ, yee ɲaha jo na mu.
5 Jɔgɔ wu dʼa ki ɲuŋɔkana li tɛhɛnɛ kɔn wɛ?
Ta mʼa weefɔɔ cɛ?
Jɔgɔ wu dʼa mɛɛ shan, na ki taanna wɛ?
6 Ɲaha yaaga na ki nɔhɔshanma pu dʼa teŋɛ wɛ?
Jɔgɔ wu da ki gunŋmii li faakagereŋɛ ki shan,
7 na ɲimuguɲɔ wɔrɔɔ ki yaha kʼa pinnɛ na fundanga yoyo cɛɛ,
Kilɛ jalaaa pʼi xhuulo fundanga na wɛ?
8 Tuun wemu ni suumɔ lɔhɔ
kʼa sɛri foro ɲiŋɛ ki ni ge,
jɔgɔ wu dʼa ki ɲɔ tɔ ni gburaya ni wɛ?
9 Nɛ ɲahaya ye le ki na na pye ki fadeye,
nʼa nibiige ke taga ki migile.
10 Nɛ na wo saliya wu teŋɛ ki na,
na gburaya le ki na, na shɔhɔshɔhɔyɔ le yi na.
11 A nɛ yi jo ki mu jo: ‹Ma na já ba fo naha.
Ga ma ganha bu nahamɛ ye wɛ,
naha ma lokuruyo yi wo tabaara tʼa da dani!›
12 «Mu da sii koŋɔ na ge,
mu ya ɲiga pye ɲa na ki mugi ya?
Ta mu ya ɲimuguɲɔ kpɛɛngɛ ki wo foroduun shɛ ma ɲa ki na,
13 kɔnhɔ kʼi foro kʼi ɲiŋɛ ki kabaya yi bɛɛri co,
kʼi kanɔhɔbyii pu ɲahara wo ya?
14 Ɲiŋɛ ki ma ɲɛri wee tuun wu ni,
na bye ba keŋɛ fɛ ma bye mɛ cogo na wɛ.
Yaŋmuyɔ yi bɛɛri na bye kanna favoyo yʼa le.
15 Ga sipyikuuyo wo kpɛɛngɛ ki ma biin.
Pu keye yemu pʼa bi yirige ge, yee ma gɛgi.
16 Suumɔ lɔhɔ kʼa fòro lobulowegee kiimu ni ge,
ta mu ya nɔ ɲa kee na?
Kelee ta mu ya tee locogoyo yi ɲaari ɲa?
17 Xu wo kuɲɔjii lʼa tee shɛ ɲa mu na ya?
Ta mu ya tee xu ɲimɛ pu wo tajege ki ɲa?
18 Ta mu ya ɲiŋɛ ki pɛɛrɛ ti ɲa ma ɲii li na?
Ma bi ta mʼa kee bɛɛri cɛ, yi ɲaha jo na mu.
19 «Ta mu ya kpɛɛngɛ ki wo kulo li koo li cɛ?
Mii nibiige ki wo tatɛɛngɛ kʼi wa wɛ?
20 Ta mu na já yi tɛhɛnɛ kɔn?
Ta mu ya yi tatɛɛngɛ ki koo li cɛ?
21 Mu ya yaa na ta mʼa kii bɛɛri cɛ!
Bani mʼa bi se xɔ, ma shi wu caŋa ɲɛhɛɛ kʼa ɲɛhɛ!
22 «Nɛzhi wʼa mara yaha kpɔngɔɔ kiimu ni ge,
ta mu ya nɔ ɲa ki na?
Ta mu ya zanha kagereye yi tamaraga ki ɲa?
23 Kanhama pu wo tuun wu kaa na nɛ yi mara yaha.
Yoyo ni kashɛnyɛ yi wo caŋa ɲii li kaa na nɛ yi mara yaha.
24 Koo lemu ni kpɛɛngɛ kʼa doroo, na jaaga na se ge,
ta mu ya li cɛ?
Mii Kilɛ-nɔhɔ kafɛɛgɛ ki ma doro, na nɔ ɲiŋɛ ki na wɛ?
25 Jɔgɔ wu dʼa tatorogo wolo fugba we ni zanha mu wɛ?
Jɔgɔ wu dʼa koo wolo Kilɛ-ɲiŋɛɛ kee ni Kilɛ-sɛlɛŋɛɛ ki mu wɛ?
26 Ɲiŋɛ kemu ki ɲɛ sipya ɲɛ ki na-ɛ ge,
jɔgɔ wu zanha shaan ki na wɛ?
Siwaga kemu ki ɲɛ sipyiyawyii ɲɛ ki na-ɛ ge,
jɔgɔ wu zanha shaan ki na wɛ?
27 Ɲiŋɛ kemu kʼa wahaguunɔ waha ge,
jɔgɔ wu ma ki tin lɔhɔ na, ɲà ma fin ki na, na lɛgi wɛ?
28 «Ta zanha wa ni tosege ni?
Jɔgɔ wu dʼa mɛŋɛ ki se wɛ?
29 Jɔgɔ wu ɲɛ loŋmunɔgɔ ki wo nusege wɛ?
Jɔgɔ wu dʼa wiire ti se wɛ?
30 Wee tuun we ni lɔhɔyɔ yi ma shii ba faaga ɲɛ wɛ.
Locogoyo yi fugba wu ma ŋmunɔ na bye ba faaga ɲɛ wɛ.
31 «Ta mu na já wɔrɔɔ xhupiɲɛhɛrɛ nu we
ni wu nagoo pu pɔ gbara pu yɛ na ya?
Ta mu na já ɲuŋmoɲɔgɔ wo
wɔrɔɔ ki sanha laha ki yɛ na ya?
32 Ta mu wʼa wɔrɔɔ ki pyi ki na fòro ki foroduun ni?
Wɔrɔɔ kuruŋɔ kemu ki wa suumɔ kulo kacɛ ki na ge,
ta mu wʼa kee ɲaha coni?
33 Saliyaa piimu pu wa fugba wu ni ge,
ta mu ya pu cɛ?
Pee saliyaa pʼa keree kiimu pyi ɲiŋɛ ki na ge,
ta mu wʼa kee gbegele?
34 «Ta mu wʼa ma mujuu wá ɲahaya ye mu
yʼa zangbɔhɔ lɔhɔ taga ma tɔ ya?
35 Ta mu wʼa Kilɛ-ɲiŋɛɛ ki tunni
na se ki tashɛyɛ ni?
Ta mu ki ma byi na: ‹Wèe piiri naha?›
36 Jɔgɔ wʼa fungɔngɔ fɛɛrɛ kaan zɔ mu wɛ?
Jɔgɔ wʼa lajɛ kaan xakili mu wɛ?
37 Jɔgɔ wu da já ɲahaya yi tɔrɔ ni fungɔngɔ fɛɛrɛ ni wɛ?
Jɔgɔ wu da já fugba lɔhɔ ki tamaraya yi lɔhɔ ki wo,
38 kɔnhɔ gbagbaŋa kʼi ɲɛri puuro,
poɲilee kʼi nɔrɔ kiyɛ na wɛ?»
Kilɛ ya jo ni Zhɔbu ni sige yaŋmuyɔ yi keree na
Cɛnri ni kanraga keree
39 «Ta mu wʼa cɛnrizhɔ wo xaara ti shaa na wu kaan?
Ta mu wʼa cɛnribiire ti wo xuugo ki xuu,
40 tuun wemu ni ti ma sinnɛ ti wegeye yi ni,
kelee tuun wemu ni ti ma shɛ lara na xaara shaa ge ya?
41 Tuun wemu ni kanraga biire ti ma sipyaa waa Kilɛ mu,
ti fanha dʼa xɔ yaligee baara na ge,
jɔgɔ wu ma yalige kan ti mu wɛ?»