Eliyu ya jo na Kilɛ wo yaŋmuyaaya yi ɲɛ kakanhaŋaa
37
Ayiwa, a Eliyu di jo sanha na:«Kii keree kii wo ɲɛɲaa
li ma nɛ zɔ wu pye wu na guuni,
na sirani na lɛri wu tatɛɛngɛ ni.
2 Yi ɲuwegee shan, yʼi wu mujuu li logo!
Sɛlɛŋɛɛ kiimu kʼa fòro wu ɲɔ ki ni ge, yi ki logo!
3 Kee ma fòro fugba wu bɛɛri ni,
Kilɛ-ɲiŋɛɛ ki kpɛɛngɛ kʼi nɔni
ɲiŋɛ ki tɛhɛnɛ li bɛɛri na.
4 «Lee kadugo na, mujuu la ma foro.
Kilɛ-sɛlɛnɛ li wa wu wo ɲuŋɔfɛɛrɛ ti wo mujuu le.
Ba wu mujuu lʼa foro yɛ wɛ, wʼa Kilɛ-ɲiŋɛɛ ki yaha pa.
5 Kilɛ wo mujuu li tunmɔ pu ɲɛ kakanhana.
Wʼa kagbɔhɔɔ pyi wèe ya kiimu ɲaha cɛni wɛ.
6 Wu ma zanha kagereye pye na yi to ɲiŋɛ ke na.
Wʼa zanhaya shaan, ali zannagaya ye bɛ.
7 Lee ma bye kaɲuŋɔ na sipyii ɲaha kɔn pu nibyegee na,
kɔnhɔ wa bɛɛri di li cɛ na wee Kilɛ kabee li wa le.
8 Naŋa yaaya yi ma shɛ jé yi talaraya yi ni,
na shɛ sinnɛ yi tasinniyɛ ni.
9 Zanha kafɛɛgɛ ki ma yìri woroo kulo kacɛ ki na,
suumɔ kulo kacɛ ki wo kafɛɛgɛ ki ma ba ni wiire ni.
10 Kilɛ wo ɲɔkafɛɛgɛ ki ma lɔhɔyɔ yi ŋmunɔ,
logbɔyɔ yi bɛɛri na ɲɛri na pye ba faaga ɲɛ wɛ.
11 Wu ma lɔhɔ taga ɲahaya yi ɲi,
na ganha na yi caaga, yʼi ɲí.
12 Wu ma yi luu na ɲɛri wuyɛ ɲidaan na,
wu la ɲɛ yi lemu bɛɛri pye ge, kɔnhɔ yʼi lee pye ɲiŋɛ ke na.
13 Wu bu jo wu wu pubiin li taga ɲiŋɛ ki kpɔn,
wu shiin bu jo wu wu saama pu shɛ,
yee ɲahaya ye wu ma dun.
14 «Zhɔbu, ma ɲuwii li kan pe jomɔ pe mu,
mʼa yere, mʼa ma funŋɔ sha ni Kilɛ wo kakanhaŋaa ki ni.
15 Kilɛ wa ye yaŋmuyɔ ye ɲaha ɲɛri ɲɛrigana lemu na ge,
ta mʼa lee cɛ?
Wʼa Kilɛ-ɲiŋɛɛ ki yeege ɲahaya yi ni yeegegana lemu na ge,
ta mʼa lee cɛ?
16 Wʼa ɲahaya yi yɛrɛŋɛ yɛrɛŋɛgana lemu na fugba wu ni ge,
ta mʼa lee cɛ?
Wemu wu ɲɛ ni lajɛ ni, wu ɲɔ na fa ge,
wee wo kakanhaŋaa ki wa kiiri.
17 Woroo kulo kacɛ ki wo kafɛɛgɛ ki bu ɲiŋɛ ki wɛrɛŋɛ,
mu wemu wo faleye yi ma kafugo pɛlɛ ma na ge,
18 ta mu na já fugba ɲahaya yi pii ba Kilɛ ɲɛ-ɛ,
mʼa yi gbile ba tɔɔrɔ jaawiigea ɲɛ-ɛ ya?
19 Yemu wèe ya yaa na jo wu mu ge,
ta mu na já wèe kalaa yee ni?
Bani wèe wo lajɛbaara nibiige kʼa pɛlɛ,
wèe da já jo ni wu ni wɛ.
20 Nɛ ba yu, ta lʼa nɔ fo wa wu na shɛ wu funŋɔ to?
Ta lʼa nɔ pu kaa jo Kilɛ mu, wu na foro li fiin ya?
21 Kpɛɛngɛ ki ma ba biin taapile ni, bani ɲahaya yi ma ki tɔ.
Ga ba kafɛɛgɛ ya yìri wɛ, kee ma yi bɛɛri pɔ laha wà.
22 Kpɛɛngɛ sanni wogo ka ma foro suumɔ kulo kacɛ ki na.
Kilɛ wo nɔɔrɔ wu ɲɛ fyaara yagbɔhɔŋɔ dɛ!
23 Se Bɛɛri Fɔɔ wu ɲɛ wii. Wèe da ga já nɔ wu na wɛ.
Wu sefɛɛrɛ tʼa pɛlɛ, wu tiimɛ pu bɛ dʼa pɛlɛ.
Bani wu ya dun kaɲii fɔɔ na wɛ.
24 Lee wuu na sipyii ya yaa na fyagi wu na.
Piimu pʼa puyɛ wii fungɔnyɔ fɛɛ ge,
wu ya pee wii yaaga bɛ wɛ.»