Eliyu ya jo na sipya ya Kilɛ kaala wɛ
36
Ayiwa, a Eliyu di shɛ ɲaha na sanha na Zhɔbu pye:2 «Na sige sanha jɛɛrɛ funŋɔ ni di ma kalaa,
bani nʼa giin di jomɔ patii jo ma mu Kilɛ shizhaa na.
3 Nɛ na ba na wo lajɛ wu kile fo na shɛ nɔ taliige ni.
Nɛ na ba kaɲii kan na yaavɔɔ wu mu.
4 Can na nɛ jomɔ pu wa kafinɛyɛ wɛ.
Sipya wemu wu wa ni see see wo lajɛ wu ni ge,
wee wu wa mɛ ma ɲahagbaa na.
5 «Li wii Kilɛ ɲɛ sefɔɔ.
Wu ya sipya wa shishiin cɛrɛŋɛ wɛ.
Wu sefɛɛrɛ tʼa pɛlɛ,
wu fungɔngɔ fɛɛrɛ ti baraga ni.
6 Wu ya sipyikuuŋɔ yɛri ki na shi taa wɛ.
Wʼa kaɲii kaan la baa fɔɔ mu.
7 Sipya wemu wʼa tii ge, wu ya ɲaha luu na waa weefɔɔ tàan wɛ.
Ga wu ma pu teŋɛ saanra korogoo na ni saannaa ni.
Wu ma pu teŋɛ yaha wà gbee, kɔnhɔ wu pu durugo.
8 Shɔnhɔyɔ bu le pu na,
kelee kanhama bu pɔɔrɔ durogo pu na,
9 pu kapyegee Kilɛ ya zhɛɛ pu na,
katiibaagaa kiimu pʼa pye pu wo tabaara ti funŋɔ ni ge.
10 Wʼa pu ɲuwegee mugi, kɔnhɔ pʼi fundogo kalaa wu logo.
Wʼa pu pye: ‹Yi kadugo le kakuuŋɔɔ ni.›
11 Pu bu yi logo, na guu Kilɛ mu,
pu shi wu caŋa ɲɛhɛɛ ki na ba xhɔ fɛrɛmɛ ni.
Pu na ba pu shi wu yee ki torogo ni fundanga ni.
12 Ga pu bu zhe pu da logo wɛ, canmi na ba pu gbo.
Pu wo kacɛbaana li na ba xu nɔ pu na.
13 Piimu pʼa she Kilɛ ni ge,
pee ma pu wo loyiregee ki mara yaha.
Kilɛ ba shɔnhɔyɔ leni pu na tuun wemu ni,
pu ya sipyaa suu wu fɛni wɛ.
14 Lee na pʼa xhuli na pu yaha pu lɛvɛɛrɛ ti ni.
Dɔdɔɔ ya xhuli xugana lemu na ge,
lee xugana li na pu bɛ ya xhuli.
15 «Ga Kilɛ ya kanhama fɔɔ ɲuŋɔ wo
wu wo kanhama pu tɔɔgɔ fɛni.
Wu ma pee kanhama pu taga wu gbegele
kɔnhɔ wu da nuri wu ɲɔ na.
16 Wu na ba mu bɛ kile zhɔ kanhama pu na
wu ma le fɛrɛmɛ ni.
Ma talige ki na ba ɲi yalidanya na.
17 Ga nimɛ, jaagi kanhama pemu
pʼa yaa ni kakuubyii ni ge, pee pʼa nɔ mu na.
Kiiri ni jaagi wu na ba do ma ɲuŋɔ ni.
18 Loyire bɛ ganha bu ma pye mʼa Kilɛ la wo wɛ.
Wa ganha bu kagurogo nijeŋɛ bɛ taga ma ɲɔ fɔrɔgɔ
lee di ma le piinŋɛ ni wɛ.
19 Ta ma sipyaa ki na já ma shɔ
ma kanhama pu na ya?
Kelee ta ma wo baraga ki na já ma shɔ ya?
20 Ma ganha bu piige sige kanha kʼi wɔ wɛ.
Kee kʼa sipyii pu luu na lɛri pu tatiinyɛ ni.
21 Kasɛɛgɛ yaha mayɛ na,
ma ganha bu mayɛ le katiibaagaa ni wɛ.
Bani lee wuu na mʼa jé kanhama ni.»
Kilɛ wo sefɛɛrɛ tʼa pɛlɛ
22 «Li wii, Kilɛ ya pɛlɛ,
wu sefɛɛrɛ ti bɛ dʼa pɛlɛ.
Wekɛ wʼi já sipyii kalaa ba Kilɛ ɲɛ-ɛ wɛ?
23 Jɔgɔ wʼi koo shɛɛ wu na wɛ?
Jɔgɔ wu da já wu pye na kakuunɔ wʼa pye wɛ?
24 Ma fungɔngɔ yaha wu kapyegee ki na,
ma da ki sɔni.
Sipyii pu wa kee kapyegee ki wo masɔŋɔ yoyo yi cɛɛ.
25 Sipyii pu bɛɛri wʼa ki ɲaa.
Sipyii pu wa ki wii na pu yaha taliige ni.
26 Li wii, Kilɛ ya pɛlɛ.
Wu pɛɛrɛ tʼa toro wèe wo funyɔ yi kɔngana li tàan.
Sipya da ga já wu shi wu yee ki tɔrɔ wɛ.
27 Wu ma lɔhɔyɔ yi kilee na duri fugba wu ni.
Yee ma shɛ bye zanha na foro ɲahaya yi ni.
28 Ɲahaya yi ma kee zanha ki shan,
kʼa digi wo sipyiire ti bɛɛri ɲuŋɔ ni.
29 Fugba ɲahaya yʼa jaaga caagagana lemu na ge,
ni Kilɛ-sɛlɛŋɛɛ kiimu kʼa fòro wu puga ki ni ge,
jɔgɔ wu da já yee ɲaha cɛ wɛ?
30 Li wii, Kilɛ wu ma ɲi ɲi fugba wu ni,
na shɛ suumɔ lɔhɔ ki nɔhɔdaan wu tɔ.
31 Kee keree kii tɔɔgɔ fɛni
Kilɛ wʼa shi wu maraa,
na yaligee niɲɛhɛŋɛɛ bɛ kaan pu mu.
32 Wu ma Kilɛ-ɲiŋɛɛ co wu keye ni,
na tashɛgɛ shɛ ki na, na ki tun kari wà.
33 Kilɛ-sɛlɛŋɛɛ ki wo tunmɔ pu pʼa wu ba wu kaa yu.
Ali yapɔrɔyɔ yi bɛ wa ma li cɛ na wʼa tɛɛŋɛ.»