Eliyu ya jo na ɲuŋɔ baa jomɔ Zhɔbu ya yu
35
Ayiwa, a Eliyu di shɛ ɲaha na na Zhɔbu pye:2 «Yemu mu ya jo ge Zhɔbu,
na saha ni yee ni, mu ya giin na kaɲii li wa mu mu ya?
Mu ya jo na: ‹Nɛ tii Kilɛ ɲaha tàan.›
3 Mu bi ma yu na: ‹Nɛ ma nayɛ tanha jurumu na,
li kaɲɔɔ lekɛ lʼi wa nɛ na wɛ?
Kilɛ di wa da kuduun wekɛ ta lee ni wɛ?›
4 Nɛ wa da ba ma ɲɔ shɔ,
ma ni ma naɲiinɛɛ pu bɛɛri ni.
5 «Ɲuŋɔ ki yirige, mʼa fugba wu wii!
Ɲahaya yi wii, yi sanha wa lii ma na liigana lemu na ge!
6 Mu bu jurumu pye,
lee ma ɲaha kyɛɛgi Kilɛ mu wɛ?
Mu ba la faraa ma wo nʼa she wu na,
lee mʼa lekɛ pye Kilɛ na wɛ?*
7 Mu bu dii, mu na ɲaha kan Kilɛ mu wɛ?
Yaaga kekɛ wʼi ɲɛ ma da mu mu wɛ?
8 Mu wo kuumɔ pe, ma sipyiɲii yɛ pu wa gana.
Ma wo tiimɛ pu bɛ, sipyiyawyii na pu bɛ kaɲɔɔ wa.
9 «Ɲaa wu fanha bu bɛlɛ,
piimu na wʼa woni ge, pee ma ganha na sipyaa waa.
Pu ma mɛhɛɛ suu na pu pa pee shɔ fanhaɲɛhɛŋɛ fɛɛ pu na.
10 Ga sipya wa shishiin da ga jo na:
‹Mii nɛ yaavɔɔ Kilɛ wʼi ɲɛ wɛ?
Wee wemu wʼa masɔŋɔ yoyo leni sipya ɲɔ ni piige ge.
11 Wee wemu wʼa kalaa kaan wèe mu,
na toro ɲiŋɛ ki ɲìi yaŋmuyɔ yi tàan ge.
Wee wemu wʼa wèe pyi fungɔnyɔ fɛɛ,
na toro fugba shazhɛɛrɛ ti tàan ge.›
12 Sipyiire ti wa na xhuulo, ga Kilɛ di wa da pu ɲɔ shɔ wɛ,
ma li kaɲuŋɔ pye kakuubyii pu wo tabaara te.
13 Oo dɛ, tawaga ni pʼa xhuulo, bani Kilɛ wa da pu ɲɔ shɔ wɛ.
Se Bɛɛri Fɔɔ wu wa da ɲuwii tagi pu yíri wɛ.
14 «Mu wuu dʼa pe, mu wemu wʼa go na mu ya wu ɲa-i ge,
na mu ya ma keree le wu keŋɛ ni, na wu ɲaha wii na ganha ge.
15 Ayiwa, ni Kilɛ di wa sanha da wu wo loyire li tirige wɛ,
ni wu wa sanha ɲaha tagi kee nʼa she keree kii yíri wɛ,
16 lee lʼa Zhɔbu pye wu na ɲuŋɔ baa jomɔ yu.
Kacɛbaana jomɔ niɲɛhɛmɛ wʼa yu.»