Eliyu ya jo na Kilɛ wo keree ki bɛɛri kʼa tii
34
Ayiwa, a Eliyu di shɛ ɲaha na ni wu jomɔ pu ni, na jo:2 «Yee fungɔnyɔ fɛɛ, yi na jomɔ pu logo!
Yee lajɛ fɛɛ, yi ɲuwegee shan ni na jomɔ pu ni!
3 Bani ɲuwii lʼa jomɔ suguri
ba ɲile wa yalige ɲɛhɛni wɛ.
4 Lemu lʼa tii ge, wù bɛɛri pu lee shɔɔnri lɔ shiizhan.
Kaa lemu lʼa ɲɔ ge, wù lee sha wùyɛ tɛ ni.
5 «Zhɔbu ya jo na:
‹Nɛ tii, ga Kilɛ ya she kaɲii gan ni nɛ mu.
6 Nɛ wii kafinɛjo, na ta nɛ ɲɛ bɛ kaɲii fɔɔ we.
Na yama pʼa xɔ kanha, na ta di wa jurumu pye wɛ.›
7 «Sipya wekɛ wu ɲɛ ba Zhɔbu ɲɛ wɛ?
Lawuu ya faha wu mu ba logbaga ɲɛ wɛ.
8 Kakuubyii ni wʼa binnɛɛ na ɲaari.
Wu ni kuumɔ fɛɛ pʼa ɲaari shiizhan.
9 Bani wʼa jo na: ‹Sipya wemu bu wuyɛ kaa taan Kilɛ mu,
kuduun wekɛ wʼi da da lee ni wɛ?›
10 «Lee wuu na, yee pii pu ɲɛ kaɲahacɛmɛɛ ge,
yi na jomɔ pu logo!
Kakuuŋɔɔ sanha ya lii Kilɛ na.
Tiibaara sanha ya lii Se Bɛɛri Fɔɔ wu na.
11 Ga sipya bu lemu pye, lee foo Kilɛ wʼa da dɔ wu mu.
Ma ba ɲaarigana lemu ɲaari, lee comɔ ni Kilɛ wʼa da ma co.
12 Can na, Kilɛ ya kakuunɔ pyi bada wɛ.
Se Bɛɛri Fɔɔ wu ya tiimɛ pu wo koo li yari bada wɛ.
13 Jɔgɔ wu dʼa wu teŋɛ na pye ɲiŋɛ ki bɛɛri ɲuŋɔfɔɔ wɛ?
Jɔgɔ wu da koŋɔ ki niboŋɔ kaa le wu keŋɛ ni wɛ?
14 Wu da bye wu ya wu funŋɔ kɔɔn kaa latii na,
ma ye wuyɛ pyaa ki na wɛ,
wu da bi wu Munaa le, ni wu ŋmɔgara ti yiri na pa wuyɛ mu,
15 munaa ɲɛ yaaga yaaga ni ge, yee bɛɛri yi bi da binnɛ xhuu.
Sipya bɛ na guri puuro ni.
16 «Zhɔbu, ma bu da mʼa keree ɲaha cɛ, na jomɔ pu logo,
mʼa ɲuwegee shan xuuni ni na jomɔ pu ni.
17 Tiimɛ ya pɛn sipya wemu mu ge, wee na já ɲuŋɔfɛɛrɛ pye ya?
Kilɛ wemu wʼa tii, na ɲɛ sefɔɔ ge, ta mu na zɔɔ di wee jaagi ya?
18 Wee yɛ nigin pe wʼa já saan pye na: ‹Laɲɔbaaa›
Na sipyigbɔɔ pu pyi: ‹Yee niguuyo ye!›
19 Wu ya faraa sipya na, na ma ɲɛ sipyigbɔ wɛ.
Wu ya naafuu fɔɔ pɔrɔŋɔ funmɔ fɔɔ na wɛ.
Bani wu keye yʼa pu shuun wu bɛɛri yàa.
20 Pʼa xhuli taapile ni. Na piige ki yaha ki niŋɛ ni,
fiige ki sipyii pu na já nʼa she le puyɛ ni, na ɲuŋɔfɛɛ pu gbo.
Sipyigagaŋa ma biin ali na ta sipya keŋɛ bɛ da nɔ ki na wɛ.
21 Bani Kilɛ wʼa sipya torogana li bɛɛri kasɛɛgɛ pyi.
Wʼa wu ɲidaɲii ki bɛɛri nigin nigin wu wii.
22 Nibiige ka shishiin wa wà kakuubye na já zhɛ lara kemu ni wɛ,
ali xu nibiige bɛ wɛ.
23 Kilɛ mago wa li na wu na sipya keree sɛɛri tɔɔɲii niɲɛhɛŋɛɛ ni,
wu na wu kiiri kɔn wɛ.
24 Wʼa sipyigagaya yi kɛgɛɛ, na ta wu ya pu keree ki nɔhɔ faa wɛ,
na piitiilee teŋɛɛ pu faara.
25 Bani wʼa pu kapyegee ki cɛ.
Piige nigin ni wu ma pu ɲɛri buri, na pu tɔnhɔnɔ.
26 Wu ma pu kpɔn sipyiire ti bɛɛri ɲii na,
ba pʼa sipyikuuŋɔ kpɔɔn wɛ.
27 Bani pʼa bi she Kilɛ ni,
Pʼa bi kadugo le wu korogoo ki ni.
28 Pʼa la baa fɛɛ sipyaa pye kʼa foro ma nɔ Kilɛ na,
a wu kanhama fɛɛ pu wo sipyaa ki logo.
29 «Ga Kilɛ bye wu ya yaaga jo wɛ, jɔgɔ wʼa da já wu jaagi wɛ?
Wu bu wuyɛ ŋmɔhɔ, jɔgɔ wu da já wu ɲa wɛ?
Mu na lee wa shi wu mu, mu na lee wa sipyii pu mu,
30 kɔnhɔ Kilɛ ɲìi fyaara baa fɔɔ ganha ba diin fanha ki na wɛ,
kɔnhɔ pu ganha ba sipyii pu pɛri ni tifuuyo ni wɛ.
31 Li ta kanna sipya wa ya Kilɛ pye:
‹Nɛ na wo kakuuŋɔɔ ki wo jaagi wu kanhama pu pye xɔ.
Nʼa da kakuunɔ latii pye nige wɛ.
32 Lemu lʼa pye nɛ lee ɲa-ɛ ge, mu wu lee shɛ na na.
Nɛ bu da nɛ kakuuŋɔɔ pye, nʼa da lee la shi pye nige wɛ.›
33 Ayiwa, mu wemu wʼa Kilɛ jaagi ge, mu wo fungɔngɔ na,
ta Kilɛ ya yaa na weefɔɔ ɲaha wɛrɛŋɛ?
Ye yi wa ma mu ge, yee jo,
bani mu wu wa da la shɔɔnri lɔ, nɛ bɛ wɛ.
34 Sipyii piimu ɲɛ kaɲahacɛmɛɛ ge,
pee ni fungɔnyɔ fɛɛ piimu pu wa nɛ jomɔ pu nuri ge,
pee na ba nɛ pye na:
35 ‹Zhɔbu ya yu ba kacɛbaama ɲɛ wɛ.
Fungɔngɔ fɛɛrɛ ta shishiin ɲɛ wu jomɔ pu ni wɛ.›
36 Zhɔbu nɔhɔ ya yaa na wolo fo wu tɛhɛnɛ,
bani wʼa ɲɔshɔɔrɔ pye ba sipyikuuŋɔ ɲɛ wɛ.
37 Wʼa nʼa she bɛ le wuyɛ ni wu jurumu wu kadugo na.
Wʼa nakaara leni wèe zɔlɔɔ pu ni,
na jomɔ niɲɛhɛmɛ yu na waa Kilɛ na.›»