Eliyu ya jo na Kilɛ ya sipya kalaa ma kanhama tuun ni
33
«Ayiwa Zhɔbu, na jomɔ pu logo nimɛ,mʼa ɲuwegee shan ni na kafila wu bɛɛri ni.
2 Li wii, nʼa da ba na ɲɔ ki mugi,
na ɲile li na ba ɲɛhɛ ɲɛhɛ na ɲɔ ki ni.
3 Zɔ wemu ya tii ge, wee ni nɛ jomɔ pʼa da ba foro.
Lemu nɛ cɛ ge, lee nʼa da ba fiinŋɛ jo ma mu.
4 Kilɛ wo Munaa li lʼa nɛ yàa.
Se Bɛɛri Fɔɔ wu wu ɲɔ kafɛɛgɛ kʼa ɲiifɛɛrɛ kaan nɛ mu.
5 «Mu bu da ma na da já na ɲɔ shɔ, mʼa na ɲɔ shɔ.
Mayɛ gbegele, mʼa na ɲuŋɔ círi.
6 Li wii, nɛ ni mu bɛɛri wu ɲɛ nigin Kilɛ ɲaha tàan.
Puuro ni nɛ bɛ ya yàa ba mu ɲɛ wɛ.
7 Lee na, mu ya yaa mu wu fya mʼa jɛlɛ nɛ ɲaha tàan wɛ,
nʼi wa da ba na wo fanha ki shɛ bɛ ma na wɛ.
8 «Ga mu ya yi jo nɛ ɲuwii li ni,
nɛ mu jomɔ pu logo.
9 Mu ya jo na: ‹Jaagi wa nɛ na wɛ, jurumu wa nɛ na wɛ.
Nɛ fa, tanahaŋa ka shishiin wa nɛ na wɛ.
10 Ga lee bɛ na, Kilɛ di jaagi shaa di daha nɛ na,
na nɛ co ba wu pɛn ɲɛ wɛ.
11 Wʼa shɔnhɔyɔ le na tɔɔyɔ yi na,*
na na tashɛyɛ yi bɛɛri kasɛɛgɛ pyi.›
12 «Nʼa dʼa yi jo ma ɲii na, Kaɲii wa mu mu lee ni wɛ,
bani Kilɛ ya pɛlɛ sipya na.
13 Ɲaha na mu di kayuu shaan wu na,
na bani wu ya go wu mu wo yegeye yi ɲɔ shɔ-ɛ wɛ?
14 «Ma li ta bɛ Kilɛ di yu.
Wu ma jo jogana la na tuun wa ni,
na ba jo jogana labɛtii na tuun wa bɛ ni.
Ga sipya wu ɲɛ wu ya kasɛɛgɛ yɛri lee na wɛ.
15 Tuun wemu ni ŋmunugbɔ ma sipyii shan ge*,
tuun wemu ni pʼa ŋmunɔ pu yasinnɛgɛ na ge,
wee tuun wu ni Kilɛ ya yu ni pu ni ŋmunɔyɔ,
ni kashɛgɛɛ ni piige.
16 Wee tuun wu ni wu ma sipya ɲuwii mugi,
na keree kii taga wu kemɛ kaala,
17 kɔnhɔ wu sipya waa laha wu katiibaagaa na,
wu sipyigbɔ tánha tabaara na.
18 Lee funŋɔ ni, wʼa wu shɔ faŋa na,
na wu shɔ canmi wu bɛ wo xu wu na.
19 «Kilɛ ya yama bɛ taga na sipya tiini,
na wu yaha wu yama yasinnɛgɛ ki na.
Lee ma wu kaciiye yi bɛɛri ta yi na jɛlɛ tayerege baa.
20 Yaligee tuugo bɛɛri la na wolo wu na.
Yalidanga ka shishiin kaa da wu ta wɛ.
21 Wu ceesɛɛgɛ ki ma baa, wʼa shɔgɔ.
Wu kaciiye ye yi bye yi yʼa ɲaa wɛ ge,
yi bɛɛri na foro kpɛɛngɛ na taapile ni.
22 Wʼa ganha na faŋa wege ki tɛɛŋɛ.
Wu munaa li ma le xu wo mɛlɛkɛɛ pu keŋɛ ni.
23 «Ga mɛlɛkɛ nigin bɛ bu shɛ da wu tàan,
wee na ɲɛ susurodɛgɛmɛ wu ni Kilɛ tɛ ni.
Mɛlɛkɛ susurodɛgɛmɛ nigin pe na foro pu kabɔfonɔ nigin (1.000) wu ni,
wee wemu na ba tiimɛ koo li shɛ wu na ge.
24 Wee mɛlɛkɛ wu na ɲuŋɔ ɲaari wu na,
na Kilɛ pye na: ‹Ma ganha bu wu yaha
wu tigi jé faŋa ki ni wɛ, bani nɛ wu ɲuwuupɛrɛmɛ pu ta.›
25 «Wee tuun wu ni wu ceesɛɛgɛ ki ma juuŋɔ,
na guri pun ba ki bye wu nɔhɔpiire ti tuun wu ni wɛ.
26 Wu bu Kilɛ ɲɛɛri, Kilɛ na wu ɲɛrɛgɛ ki ɲɔ shɔ.
Wʼa yere Kilɛ ɲaha tàan ni fundanga wo xuguŋɔɔ ni.
Bani Kilɛ ya kuri wu pye sanha sipyitiimɛ
27 Wʼa ganha na ciire cɛɛ sipyiire ti ɲii na na yu:
‹Nɛ jurumu pye, na tiimɛ pu koo li kyɛɛgi.
Ga nɛ bi yaa ni jaagi kanhama pemu ni ge,
Kilɛ ya ta pee shan nɛ ɲuŋɔ ni wɛ.
28 Bani Kilɛ ya nɛ shɔ faŋa wege ki wo jé wu na.
Nɛ munaa li na ɲiifɛɛrɛ pye sanha kpɛɛngɛ ki na.›
29 «Kii keree ki bɛɛri Kilɛ wʼa byi sipya mu.
Wʼa ki pyi na nɔni fo tɔɔɲii shuun, tɔɔɲii taanri na sipya mu,
30 kɔnhɔ wu wu munaa ɲuŋɔ wolo xu ni,
wyii pu wo kpɛɛngɛ kʼi da ɲi wu mu.
31 Wee tuun wu ni ma ɲuwegee ki shan Zhɔbu,
mʼa logo na ɲɔ na!
Cari mayɛ na, mʼa na yaha di da yu!
32 Ga ɲɔshɔɔrɔ ta bi ɲɛ ma mu, ti pye,
Bani ma bu kaɲii ta, lee li wa dan nɛ ni.
33 Jomɔ bu da pu wa ma mu wɛ,
wee tuun wu ni, ma ɲuwegee ki shan.
Co mayɛ na, di ma kalaa fungɔngɔ fɛɛrɛ ni.»