Eliyu ya jo ni Zhɔbu ni
(32:1—37:24)
Eliyu ya jo na lɛgɛ ya sipya kaan fungɔngɔ fɛɛrɛ wɛ
32
Ayiwa, a pee namaa taanri wu di Zhɔbu wo ɲɔshɔɔrɔ ti ɲɔ yaha, bani wʼa wuyɛ pye sipyitiimɛ. 2 Wee tuun wu ni a Barakɛli ja Eliyu luu di yìri fo xuuni. Buzi wo gbawege ki sipya wa wu bye wii na foro Aramu wo kpuun li na. A wu luu di yìri Zhɔbu tàan, bani Zhɔbu bi kaɲii kan wuyɛ mu Kilɛ ɲaha tàan. 3 Wu luu li bi yìri Zhɔbu wo naɲiinɛɛ taanri wu bɛ tàan, bani pee bɛ ya já Zhɔbu ɲɔ shɔgana cɛ wɛ. Lee funŋɔ ni a pʼi Kilɛ pye jaagi fɔɔ. 4 Zhɔbu naɲiinɛɛ taanri wu bɛɛri bi lɛ Eliyu na. A wu wuyɛ co, wu ya wɛri jo ni Zhɔbu ni wɛ. 5 Ga tuun wemu ni wʼa pa li ɲa na jomɔ wa nige wa mu pee namaa taanri wu ni wɛ, a wu luu di yìri fo xuuni. 6 Wee tuun wu ni a Eliyu di jo, Barakɛli ja we, na foro Buzi wo gbawege ki ni, a wu jo:«Nɛ ɲɛ nɔhɔcɛrɛɛ, yee di ɲɛ nɔhɔlɛɛ.
Lee lʼa nɛ pye nɛ co nayɛ na.
Nɛ bi fyagi na fungɔngɔ jo na yee mu.
7 Nɛ bi yi yu nayɛ funŋɔ ni jo:
‹Piimu wo shi wʼa fulo ge, pee na jomɔ cɛ.
Pu lɛgɛ ki na pu pye pʼa fungɔngɔ fɛɛrɛ ta.›
8 Ga can na lemu lʼa kaɲahacɛnɛ kaan sipya mu ge,
lee wa mɛ Se Bɛɛri Fɔɔ wu wo Munaa le,
wu wo ɲɔkafɛɛgɛ kemu ki wa sipya funŋɔ ni ge.
9 Na shi niɲɛhɛmɛ ta, lee ya sipya pyi fungɔngɔ fɔɔ wɛ.
Lɛgɛ ya sipya pyi ma tiimɛ koo cɛ wɛ.
10 Lee wuu na nɛ jo yi bɛ pu logo na ɲɔ na.
Nɛ bɛ ya lemu cɛ ge, na bɛ na ba lee shɛ yi na.
11 Nɛ yee sige fo na pa nɔ nimɛ na.
Nɛ ɲuwegee shan ni yee jomɔ pu ni.
Nɛ yee funŋɔ jomɔ pu logo fo na shɛ pu xɔ.
12 Nɛ sɛɛgɛ taan yee jomɔ pu na, na pu logo.
Ga yee wa shishiin ya já jomɔ xɔ Zhɔbu ɲɔ na wɛ.
Yee wa shishiin ya já wu ɲɔ shɔ wu ɲɔ shɔgana na wɛ.
13 Yʼi ganha ba yu bɛ na: ‹Wèe ya pye fungɔnyɔ fɛɛ.
Kilɛ yɛ wu da ba Zhɔbu wo piinŋɛ ki shɛ wu na, sipya bɛ wɛ.›
14 Wu jomɔ pu ya ta ɲaha tii nɛ na wɛ.
Lee na, nɛ bɛ wa da wu ɲɔ shɔ yee wo ɲɔ shɔgana le na wɛ.
15 Li wii, pu fungɔnyɔ yʼa wuregi, ɲɔshɔɔrɔ ɲɛ nige pu mu wɛ.
Jomɔ ɲɛ nige pu mu wɛ.
16 Nɛ pu sige na ganha, pu da ga jo wɛ.
Pʼa fɛhɛ fɛhɛ, pu ya ɲɔshɔɔrɔ pi nige wɛ.
17 Nɛ bɛ wʼa da jo.
Nɛ bɛ wʼa da ba na wo fungɔngɔ ki shɛ.
18 Bani jomɔ niɲɛhɛmɛ pu wa nɛ mu na yu.
Nɛ luu lʼa na ŋmunuŋɔ fo di jo.
19 Jomɔ pu wa na gani nɛ funŋɔ ki ni
ba duvɛn ma ga, na taforogo shaa wɛ,
Ba duvɛn ma ga mɛ
na wu foroyo nivoyo yi shaa di zhɛɛngi wɛ.
20 Lee na nʼa da ba jo kɔnhɔ di nayɛ ta.
Nɛ na ba na ɲɔ ki mugi di ɲɔshɔɔrɔ pye.
21 Nʼa da ba sipya wa wolo wa ni wɛ.
Nʼa da ba jomɔ taga wa shishiin faanna wɛ.
22 Bani nɛ nafaanra ɲaha cɛ wɛ.
Nɛ da bi lee pyi, na yaavɔɔ wu bi da na lɔ tɔvuyo na.»