Zhɔbu ya kaɲii kan wuyɛ mu
31
«Nɛ bi kariɲɛɛgɛ ɲɔmɛɛ lɔ ni na ɲìi ki ni.Jo nʼa da ga doɲiŋɛ fucɛri nacɛbaa wii ni bɔhɔ ni wɛ.
2 Lekɛ na ba bye nɛ wo taa Kilɛ mu fugba wu ni wɛ?
Cɛn wekɛ Se Bɛɛri Fɔɔ Kilɛ di da ba gan nɛ mu
na yìri fugba wu ni wɛ?
3 Ta sipyikuuŋɔ kaa na bɛ kakara ya gbegele yaha wɛ?
Ta kakuubyii ɲaha na bɛ bɔɔngɔ ya gbegele yaha wɛ?
4 Ta Kilɛ wʼa nɛ ɲaarigana li bɛɛri ɲaa wɛ?
Ta Kilɛ wʼa nɛ ɲidaɲii ki bɛɛri ɲɔ cɛ wɛ?
5 «Nɛ bu da nɛ kafinɛyɛ koro ɲaari,
nɛ bu da nɛ togaaya lɔ ma naŋmahara kaa la pye,
6 Kilɛ wu na taanna wu wo daanna yaaga ki ni,
kee kemu kʼa tii ge, wu na na wo tiimɛ pu ɲa.
7 Nɛ tɔɔyɔ yi bu da yʼa fiin foro tiimɛ koo li tàan,
nɛ zɔ wu bu shɛ da wʼa taha nɛ ɲìi ki fɛni,
nɔhɔmɔ pa bu da pʼa mara nɛ keye yi na,
8 wee tuun wu ni nɛ ba shinma nugi,
watii wu pa wu kɔn, wu wu li.
Pʼi nɛ wo nuguro ti bɛɛri kɔɔngi.
9 «Cee wa bi na faanna ta, a di ɲaha yeege wu fɛni,
kelee nɛ bi ta nɛ na gbuulo gbuulo
na tiinɲii wa wo kuɲɔɔ ɲɔ na wu shɔ fɛni.
10 Wee tuun wu ni Kilɛ wu na wo shɔ wu yaha wu tira tire ná watii mu,
namaa piitiilee di da sinnɛɛ ni wu ni.
11 Bani shiige ki ɲɛ kere,
kapetiinɛ li ɲɛ lii kiiri ya yaa na kɔn lemu na ge.
12 Na ki ɲɛ kere kemu ya sori
na gaaŋi fo kakara wecogoŋɔ ki ni ge.
Ki na já nɛ keŋɛ yaŋmuyɔ yi bɛɛri xɔ.
13 «Li bu shɛ da na go kaa la lʼa jé toro nɛ ni na bulona we,
kelee na bulozhɔ wu tɛ ni, a nɛ bye nɛ ya tii wɛ,
14 wee tuun wu ni Kilɛ ba yìri di wee kiiri wu kɔn,
nɛ ma lekɛ pye wɛ?
Wu bu na yege, di yekɛ jo wɛ?
15 Kilɛ wemu wʼa nɛ yàa na nu wu funŋɔ ni ge,
ta wee bɛ wʼa pu bɛ yàa wɛ?
Ta wee Kilɛ wu ninumɔ bɛ wʼa wù bɛɛri yàa wù nii pu funyɔ ni wɛ?
16 «La baa fɔɔ bu da wʼa na ɲɛɛri ɲa, a di wu kun,
nɛ bu da nɛ naxhugoshɔ wo tadaŋa ki kyɛɛgi ɲa,
17 nɛ bu da nɛ na yalige li nayɛ nigin,
na ta di ya cirimɛ kan wɛ,
18 Bani fo na levɛɛrɛ ti tuun wu ni nɛ ɲɔ co na cirimɛɛ biini,
na bye ba pu to ɲɛ wɛ.
Nɛ naxhugoshaa ɲaha coni ma co fo na seduun wu na.
19 Nɛ bu da nɛ sipya wa ɲa fafunmɔ ni,
kelee na funmɔ fɔɔ wa ɲa fatɔŋɔ baa,
20 a wu bye wu ya duba pye nɛ mu
ma li kaɲuŋɔ pye nɛ wo dubya shiire tʼa ta wu wyiire ti xɔ wɛ,
21 Nɛ bu da nɛ cirimɛ wa fuguri kiiri takɔngɔ ni,
ma li kaɲuŋɔ pye na kiirikɔɔn pu na ba fara nɛ na,
22 wee tuun wu ni na kapaŋa ki ki waa laha na cére ti na,
na keŋɛ kʼi gɛgi kasinnaŋmii le ni.
23 Bani nɛ bi fyagi fo xuuni Kilɛ wo loyire li na.
Nɛ da ga já yafiin bɛ pye wu saanra ti wo nɔɔrɔ wu ɲaha tàan wɛ.
24 «Nɛ bu da nɛ sanni pye na tadaŋa,
nɛ bu da nɛ yi jo ɲa sanni nidiimɛ mu jo: ‹Mu na nɛ daa›,
25 nɛ bu da nɛ funŋɔ taan ɲa na naafuu wu ɲɛhɛ wu wuu na,
kelee yaŋmuɲɛhɛyɛ yemu na keye ya sha ge,
26 nɛ bu da nɛ caŋa ki wii ki ɲiduun wu ni,
nɛ bu da nɛ yeŋɛ wii ki paduun wu ni ni ki saanna li bɛɛri ni,
27 nɛ zɔ wu bu da wu ɲuŋɔ ya peele kyɛɛgi,
a di yi co ba Kilɛ ɲɛ wɛ, na yi pɛlɛ,
28 Nɛ da bi da nɛ lee pye, kapetiinɛ nɛ bi da bye
kiiri ya yaa na kɔn lemu na ge,
bani nɛ bi da Fugba Kilɛ wu nɔhɔ yaha.
29 «Nɛ bu da nɛ funŋɔ taan ɲa na kanhama pʼa nɔ na pɛn na,
Bɔɔngɔ na nɔ wu na, nɛ bu da nɛ sira ɲa fundanga keŋɛ ni lee na,
30 na wu laŋi na Kilɛ ɲɛɛri na wu wu gbo,
nɛ ta sɔɔ ɲa li na na ɲɔ ki wee jurumu we pye wɛ.
31 Nɛ puga ki sipyijii pu bu da pu bi ye yu wɛ na,
‹Sipya wekɛ wu ɲɛ wu ya xaara xa fo na din ti na-ɛ wɛ?›
32 Nabun ya shɔn ɲa kpɛɛngɛ na wɛ,
bani nɛ bi na kuɲɔɔ li mugi yaha ɲaaɲaalaa pu bɛɛri mu.*
33 «Nɛ bu da nɛ na wo jurumu wu ŋmɔhɔ
ba sipyii pusamaa ya li pyi wɛ,
nɛ bu da nɛ na wo katiibaagaa ki ŋmɔhɔ na zɔ wu na,
34 ma li kaɲuŋɔ pye nɛ fyagi sipyiire ti wo nijoyo yi ɲaha na
kelee na fya na puga shɛɛn pu wo lawuu wu ɲaha na
na ɲɔ tɔ jomɔ pa na, kelee na she forogo na na puga:
35 «Ee, nɛ da bi da sipya ta wemu na zɔɔ na nɛ jomɔ pu logo kunni!
Na jozama pu wa pe. Se Bɛɛri fɔɔ wu wu na ɲɔ shɔ!
Jaagi jomɔ pemu na kiiri-kɔnɲii wʼa ka sɛmɛ wu ni ge,
36 nɛ na ba pee taha na kapaŋa ki na,
di pu pɔ na gbaa li na ba saanra ɲudɔnɔ ɲɛ wɛ.
37 Ɲidaɲii kiimu bɛɛri nɛ pye ge, nɛ bi da kee bɛɛri ɲɔ jo Kilɛ mu.
Nɛ bi da ba fulo wu na ba saan ja ɲɛ wɛ.
38 «Nɛ wo kɛrɛyɛ yi bu da yi na na jaagi,
nɛ bu da nɛ yi sobuun a ki pye kʼa ɲɛsinmɛ wo,
39 nɛ bu da nɛ tige yasɛyɛ li na ta nɛ yi pɛrɛmɛ kan wɛ,
piimu pʼa yi baari pyi ge, nɛ bu da nɛ na bi dun pee na,
40 wee tuun wu ni xhuyo yi foro alikama wu tɛgɛ,
ɲakuuŋɔ di foro ɔrijɛ wu tɛgɛ!»
Naha Zhɔbu wo jomɔ pʼa xɔ.