Zhɔbu ya wu niɲaa wo ɲaa wu kaa yu
30
«Ga, nɛ lɛ piimu na ge, nɛ wʼa ɲɛri nimɛpee wo lawuu yaaga,
pee piimu wo sefɛɛ yahagana li bi kolo,
fo nɛ bi da ga sɔɔ di pu pinnɛ ni na puun bɛ ni
pʼa na yapɔrɔyɔ kasɛri wɛ ge.
2 Fanha ke ki bye pu ni ge, lekɛ kee di bi da já le nɛ ni wɛ?
Pu fanha ki bɛɛri ki bi xɔ.
3 Pu bi sii shɔgɔ shɔgɔ funmɔ ni xuugo keŋɛ ni.
Pu bi ma ɲaari na yeree sipoŋɔ ki ni,
kacaaya ni takokaya yi ni.
4 Yawyeye pu bi ma gɔɔn tahaŋaa ki ni,
na tige niyɛ turi na guri pu yaligee.
5 Pu bi ma pu kɔri yeege sipyii pu tɛ ni.
Sipyii bi ma soŋɔɔ pu fɛni ba nagaalaa ɲɛ wɛ.
6 Pu bi ma se na laraa faaya wegeye,
ni ɲiŋɛ wegeye yi ni.
7 Pu ma se na puyɛ pinnɛɛ xhuyo tiye yi nɔhɔ ni.
Pu ma mɛɛyɛ waa tahaya yi ni ba kafaya ɲɛ wɛ.
8 Zɔguuyo fɛɛ, mɛpɛnyɛ fɛɛ pu ɲɛ pii.
Pʼa kashɛngɛɛ lɔ pu na, na pu kɔri yeege fiige ki ni.
9 «Ga nimɛ, nɛ wo mɛgɛ ke ki ɲɛ pee sipyii pii mu ciire.
Nɛ ɲɛri pu mu lawuu yaaga.
10 Nɛ wu ɲɛ pu mu tanhaŋa yaaga,
a pʼi laraga kɔn nɛ na.
Pu ya puyɛ kaala bɛ ɲɔlɔhɔ wá na nɛ ɲaha ki ni wɛ.
11 Bani Kilɛ ya nɛ wo sindaa ki mɛɛ li sanha, na nɛ tirige.
Lee lʼa pu pye pu ya puyɛ coni nige
kaa la shishiin bye na nɛ na wɛ.
12 Sipyikuuyo niɲɛhɛyɛ yi wa nɛ kanige cɛ kɔnhɔ pʼi na jaagi.
Pʼa na tɔɔyɔ yi ŋmunuŋɔ na lɛri koo li ni.
Pʼa koo gbɛri fo na pa nɔ na na, kɔnhɔ pʼi na kyɛɛgi.
13 Pʼa na kodorogoo ki bɛɛri kɔn.
Pʼa gbegemɛ pyi kɔnhɔ pʼi na kyɛɛgi,
ali na ta sipya bɛ ya pu tɛri wɛ.
14 Pʼa jin nɛ fɛni ba pu ma wege tabaaga kɔn
kasɔrɔgɔ na ma jé wɛ.
Pʼa gburogi nɛ fɛni kasɔɔtoyo yi dufaanjaya yi tɛ wu ni.
15 «Fyaara nigbɔɔrɔ tʼa jé nɛ ni.
Nɛ paŋa kʼa foro ba kafɛɛgɛ ma yaaga lɔ mɛ wɛ.
Nɛ wo fɛrɛmɛ pʼa xɔ ba ɲahaŋa ɲɛ wɛ.
16 Nimɛ kunni, nɛ shi wu wa xhuu na gaaŋi.
Caguuyo yʼa nɔ na na.
17 Piige bu wɔ, yama pu ma nɛ kaciiye yi furegi.
Yama pe pu wa nɛ ɲuŋɔ ni ge, pu ya ɲiŋɛɛ wɛ.
18 Kilɛ ya nɛ co na fadeŋɛ na ni wu fanha ki bɛɛri ni,
na na ŋmɔhɔri ba fadeŋɛ katige ma fiin mɛ
sipya katige ni wɛ.
19 Kilɛ ya nɛ wá ɲɔrɔyɔ yi ni.
Nɛ ɲɛri ba puuro ɲɛ wɛ, ba shɔɔnrɔ ɲɛ wɛ.
20 Ee Kilɛ, nɛ na mɛɛ suu ma fɛni,
ma di wa da na ɲɔ shɔ wɛ.
Nɛ we na yere ma ɲaha tàan,
ma dʼa tiin na wii yɛ, ma da yaaga pye wɛ.
21 Ɲiɲaara ɲɛ nige ma ni nɛ shizhaa na wɛ.
Mʼa to na na ni ma fanha ki bɛɛri ni.
22 Mʼa shɔngɔ kafɛɛgɛ wogo taga na lɔ,
na zanha kafɛɛgɛ ki taga na kyɛɛgi.
23 Uun, nɛ li cɛ jo xu mu mʼa gaaŋi ni na ni,
wee wemu wu ɲɛ sipyii pu bɛɛri wo kodoronɔ ge.
24 Ga sipya wemu wʼa taxuyo shaa ge,
ta wee ya yaa wu keye yeege mu mu wɛ?
Kapegee ya sipya wemu le ge,
ta wee ya yaa wu sipile wa mu mu wɛ?
25 Ta nɛ mɛɛ pinnɛ su ni kanhama fɛɛ pu ni
pu wo kanhama pu tuun wu ni wɛ?
Ta funyaŋa bye nɛ ni fo xuuni funmɔ fɛɛ pu shizhaa na wɛ?
26 Fɛrɛmɛ ɲaha nɛ bi wii, ga a bɔɔngɔ di ba nɔ nɛ na.
Kpɛɛngɛ ɲaha nɛ bi wii, ga a nibiige di dɛrɛɛ pa.
27 «Nɛ funŋɔ kʼa gani funbɛɛnrɛ keŋɛ fo xuuni.
Ɲaa wu wo caŋa ɲɛhɛɛ ki kʼa nɔ nɛ na.
28 Nibiige ni nɛ wʼa ɲaari, na sanha wʼa lii caŋa ki na.
Nɛ ma yìri sipyiire ti niŋɛ ni, na sipile wá.
29 Nɛ ɲɛri sige poyo wo ceboro,
ni kɔnɔsogoyo yi wo kariɲii
30 Nɛ ceesɛɛgɛ kʼa wɔ mini-mini.
Ceefuuro tʼa na kaciiye yi sòrogo.
31 Nɛ wo gbogo ki ya ciire tatii cɛɛ nige ni kpɔn ciire yɛ bɛ wɛ.
Nɛ wo faan li ya ciire tatii shuu nige ni yamɛhɛɛ yɛ bɛ wɛ.»