29
Ayiwa, a Zhɔbu di shɛ ɲaha na sanha ni wu zagunnuŋɔ ki ni:2 «Ee, Kilɛ bi nɛ mara maragana lemu na taɲaa ge,
nɛ da bi da guri lee maragana le ninunɔ ta sanha!
3 Tuun wemu ni wu sokinna wu bi ɲí nɛ ɲuɲɔ na ge,
tuun wemu ni wu kpɛɛngɛ ki bi nɛ ɲaha coni nibiige ki ni ge.
4 Ee, nɛ da bi bye sanha na lɛvɛɛrɛ ti wo tuun wu shi,
tuun wemu ni nɛ puga ki bye
Kilɛ wo naɲɛɛgɛ ki wo niimɛ wu ni ge,
5 Se Bɛɛri Fɔɔ wu bye sanha ni nɛ ni.
Nɛ jalaa pu bi ma dɛɛn dɛɛn ma nɛ maha.
6 Wee tuun wu ni, nujirimɛ ni nɛ bi na tɔɔyɔ jii.
Wee tuun wu ni sinmè tawologo faaga ki bi
sìnmɛ niɲɛhɛmɛ kaan nɛ mu fo pu na fúu.
7 Nɛ bye nɛ bu foro yere kulo li tajege ki ɲɔ na,
nɛ bye nɛ bu foro tiin kulo li kpɛɛngbɔhɔ ki na,
8 ba lɛvɛɛ pʼa nɛ ɲa wɛ, pʼa koo yaha nɛ mu,
nɔhɔlɛɛ pu ma yìri yere.
9 Kulo li sipyigbɔɔ pu na pu wo jomɔ pu kɔn,
na pu keye taha pu ɲɔyɔ na.
10 Ɲuŋɔfɛɛ pu na pu wo mujoŋɔɔ ki tirige,
pu ɲilee ki ma dara dara.
11 Ɲuwii bɛɛri lʼa na jomɔ pu logo ge, lee bi na sɔni.
Ɲii bɛɛri lʼa taha na na ge, lee bi na saama pu yu.
12 Bani la baa fɔɔ wemu wu bi dɛgɛ shaa ge, nɛ wee tɛgɛ.
Cirimɛ wemu bye tɛgɛvɔɔ baa ge, nɛ wee bɛ tɛgɛ.
13 Piimu pu bi taxuyo shaa ge, pee bi duba pyi nɛ mu.
Nɛ bi fundanga leni naxhugoshɔ zɔ wu ni.
14 Tiimɛ pu bye nɛ fàya, pee nɛ bi leni.
Pee pu ɲɛ na fadeboroŋɔ ni na ɲumiginɛ.
15 Nɛ wu bye fyɛn wo ɲii le,
na ɲɛ losiyaŋa fɔɔ wu wo tɔrɔ le.
16 Nɛ wu bye la baa fɛɛ pu wo to we.
Nɛ bi nabuun pu bɛ wo keree ki jate kɔɔn saama na.
17 Nɛ bi ma sipyitiibaaga ki wo kasanya yi kɛgi,
na wu yaŋmucoŋɔ ki wolo wu ɲɔ ki ni.
18 Wee tuun wu ni nɛ bi ma nayɛ pyi jo:
‹Nɛ shi wu caŋa ɲɛhɛɛ ki na ba ɲɛhɛ ba gbazhɛnhɛpya ɲɛ wɛ.
Nɛ na ba xhu ma na yaha na puga shɛɛn pu niŋɛ ni.
19 Nɛ ɲɛ ba tige ɲɛ wɛ, kemu niyɛ yi ɲɛ lɔhɔ ni ge.
Mɛŋɛ ma ba piige ki bɛɛri pye na ki geye yi fyɛnmɛɛ.
20 Nɛ wo nɔɔrɔ wu ma ganha na byi nivomɔ tuun bɛɛri ni.
Nɛ wo sindaa ki ma guri fanha ta.›
21 Wee tuun wu ni sipyii pu bi ma niwegee shan,
na yere na nɛ wo fungɔngɔ ki sigee.
Pu ma pu wo yɔgɔnɔ li yereŋɛ, na nɛ wo yɛrɛ li logo.
22 Nɛ bye nɛ bu jo xɔ, wa da jo nige wɛ.
Nɛ jomɔ pu bi ma niŋɛɛ na dun pu na.
23 Pu bi ma nɛ ɲaha wii, ba sipya ma zanha ɲaha wii mɛ wɛ.
Pu ma pu ɲɔyɔ mugi ba ɲiŋɛ ma zanha lɔhɔ shuu mɛ wɛ.
24 Nɛ bu mɔhɔmɔhɔ círi pu na, pu ɲɛ ma dà lee na wɛ.
Pu funŋɔ bye pu fɔ nɛ wo ɲaha ki kpɛɛngɛ
ki wo kaa la shishiin ni wɛ.
25 Nɛ wu bi pu ɲaha co, na diin pu ɲuŋɔ ni.
Nɛ bye pu tɛ ni ba saan ma bye mɛ
wu kashɛn keye yi niŋɛ ni wɛ.
Nɛ bye ba loɲinɛ kanvɔɔ ɲɛ mɛ
funyaŋa fɛɛ mu wɛ.»