Dii fungɔngɔ fɛɛrɛ di daa wɛ
28
«Tawologo wa warifyɛn natajege ni tayaaga wa sanni na.
2 Tɔɔrɔ ti ge, tee wʼa wo ɲiŋɛ ni.
Faaya di ɲani, na daɲaa tɔɔrɔ ti wo yee ni.
3 Sipyii wa jin ɲiŋɛ ki nɔhɔdaan ni kpɛɛngɛ ni.
Ma sii ɲiŋɛ ki su fo na cogi fo xuuni,
fo na shɛ nɔ pɛɛwa faaya yi na,
yee yemu yʼa ŋmɔhɔ wà nibiicogoŋɔ ki ni ge.
4 Pu ma wecogoyo su yemu sanha ya lii sipyii tatɛɛngɛ na ge.
Xuu wemu wu ɲɛ tobanaŋmo ya sinni wa-ɛ ge.
Pʼa mɛɛrɛ le tɔɔrɔ ti wolovɛɛ pu na, pʼa ganha na fagi wà,
pu sanha dʼa lii sipyiire tisara na.
5 Ɲiŋɛ ke fugba we ya ɲɔlige kaan,
ma li ta ki nɔhɔdaan we dʼa ɲɛri ɲɛri shan
kanna na kʼa wu sòrogo.
6 Yee faaya yi ni pʼa safiiria kagereye yi wo,
na fara sanni myɛ pu na.
7 Shazhɛɛyɛ yemu ya xaara coni ge,
yee ya lee koo li sanha cɛ wɛ.
Tobinŋɛ sanha ɲii taha wee xuu wu na wɛ.
8 Yacoŋɔ niguuŋɔ ka shishiin sanha tɔrɔ shan ɲa wà wɛ.
Cɛnri sanha doroo ɲa wà wɛ.
9 Ga sipya ya sɔɔ na shɛ do faaya yi na,
na yi ja fo yi nɔhɔshanma pe.
10 Sipya ya kalaraya suu faaya yi ni.
Yara bɛɛri li ɲɛ wà naafuu yara ge,
wu ɲii li ma ganha na li bɛɛri ɲaa.
11 Wu ma sɔɔ na lɔhɔ ɲaha kɔn ki da da fúu wɛ.
Yaaga kemu kʼa ŋmɔhɔ ge, na kee yeege kpɛɛngɛ na.
12 «Ga fungɔngɔ fɛɛrɛ ti ti ge, mii tee di daa wɛ?
Kaɲahacɛnɛ li wo tatɛɛngɛ kʼi ɲɛ mii wɛ?
13 Sipyiyawyii ya fungɔngɔ fɛɛrɛ pɛrɛmɛ cɛ wɛ.
Ti di ya daa bɛ wyii bɛ wo ɲiŋɛ ki na wɛ.
14 Locogoŋɔ kʼa jo na: ‹Ti wa naha wɛ.›
A suumɔ lɔhɔ kʼi jo: ‹Ti wa nɛ yíri wɛ.›
15 Sipya ya já sanni nidiimɛ taga ti faa wɛ.
Warifyɛn di ya ti taa wɛ.
16 Ti ɲɛ taanma ni Ofiiri sanni wu ni wɛ.
Ti ɲɛ taanma ni onikisib kelee ni safiiri ni wɛ.
17 Ti tayerege ya pɛlɛ ye sanni kelee pɛɛwa vɛɛric na.
Sanni nidiimɛ shɔɔ bɛ da já daga ti faa wɛ.
18 Korayi ni zhasipud ɲɛ yaaga bɛ ti ɲaha tàan wɛ.
Fungɔngɔ fɛɛrɛ ya ye na kanha pɛɛwa kuun na.
19 Ti ɲɛ pʼa ti taanna ni Ecopi fiige ki bɛ wo topazie wu ni wɛ.
Ti ɲɛ pʼa ti taanna ni sanni nidiimɛ wu bɛɛri wo nidiimɛ wu ni wɛ.
20 Ga fungɔngɔ fɛɛrɛ ti ti ge, tʼi wa yìri mii wɛ?
Kaɲahacɛnɛ li wo tatɛɛngɛ kʼi ɲɛ mii wɛ?
21 Tʼa ɲaha ŋmɔhɔ yawyii tuugo bɛɛri na.
Fugba shazhɛɛrɛ ti bɛ ya ti ɲaa wɛ.
22 Kakara wecogoŋɔ ke ni xu yɛpyaa bɛ ya jo na:
‹Wèe ya ti kaa yɛ logo›.
23 Kilɛ yɛ nigin pe wʼa ti koo cɛ.
Wee wʼa ti tatɛɛngɛ cɛ.
24 Bani wee wʼa ɲiŋɛ ki kabaya yi bɛɛri wii na jirini.
Yaaga bɛɛri ki wa ɲahaya ye nɔhɔ ni ge,
wu ɲii wa ki ni.
25 Tuun wemu ni wʼa kafɛɛgɛ ki wo tidugumɔ pu tɛhɛnɛ kɔn ge,
tuun wemu ni wʼa suumɔ lɔhɔyɔ yi wo ɲuŋɔ kaŋaa ki taanna,
na ki tɛhɛŋɛɛ wolo ge,
26 tuun wemu ni wʼa zanhaya yi wo saliya wu teŋɛ,
na Kilɛ-ɲiŋɛɛ kee, ni Kilɛ-sɛlɛŋɛɛ ki wo korogoo ki wolo ge,
27 wee tuun wu ni wʼa fungɔngɔ fɛɛrɛ ɲa, na ti kemɛ sɛɛri.
A wu fungɔngɔ fɛɛrɛ ti wo ɲidaa li shan, na li suguri.
28 Lee kadugo na a wu sipya pye:
‹Kafɔɔ ɲìi fyaara, tee ti ɲɛ fungɔngɔ fɛɛrɛ te!
Na kadugo le kakuuŋɔɔ ni, lee di ɲɛ kaɲahacɛnɛ le.› »