27
Ayiwa, a Zhɔbu di shɛ ɲaha na sanha ni wu zagunnuŋɔ ki ni:2 «Na Kilɛ yaha ɲìi na, wee wemu wʼa kaɲii li shɔ nɛ na ge,
Se Bɛɛri Fɔɔ wemu wʼa funyaŋa wà nɛ na ge,
3 ma nɛ yaha nɛ na ŋmɔgara yeege,
na Kilɛ wo ɲɔ kafɛɛgɛ ki yaha nɛ munawegee ki ni,
4 jomɔ wa da ga foro nɛ ɲɔ ke ni pemu ɲɛ tiibaara jomɔ wɛ.
Nɛ ɲile li da ga kafinɛyɛ kɔn wɛ.
5 Kilɛ wu na tanha nɛ wu kaɲii kan yee mu!
Fo na shɛ nɛ gbo, nʼa da ga na wo tiimɛ pu ɲɔ yaha wɛ.
6 Nɛ dà li na jo nɛ tii, nɛ di wa da tɔrɔ laha bɛ yee na wɛ.
Nɛ zɔ wu sanha nɛ jaagi caŋa ka shishiin bɛ wɛ.
7 Nɛ pɛn wu wu co ba sipyikuuŋɔ ya joni wɛ.
Sipya wemu wʼa yìri nɛ kaa na ge,
lemu lʼa byi kakuubye na ge, lee li pye weefɔɔ na.
8 Kilɛ bu Kilɛ ɲìi fyaara baa fɔɔ wo ɲiifɛɛrɛ ti mɛɛ li kɔn,
na wu munaa li shɔ wu na,
tadaŋa kekɛ kʼi da bye wu mu wɛ?
9 Cɔnrɔmɔ bu nɔ wu na,
ta Kilɛ na wu mɛkaaga logo sanha?
10 Ta wu na Se Bɛɛri fɔɔ wu pye sanha wu funŋa kataan?
Ta wu na ba Kilɛ ɲɛɛri sanha tuun bɛɛri ni?
11 Nʼa da yi kalaa Kilɛ wo sefɛɛrɛ ti keree ki ni.
Nʼa da ga Se Bɛɛri Fɔɔ wu wo fungɔngɔ ki ŋmɔhɔ yi na wɛ.
12 Yee bɛɛri ya lee cɛ fiinŋɛ!
Wee tuun wu ni ɲaha na yee di pe ɲuŋɔ baa jomɔ pe yu wɛ?
13 Taa lemu Kilɛ wʼa gaan sipyikuuŋɔ mu ge,
lee li wa mɛ ;
sipyigagaŋa ya cɛn wemu taa Se Bɛɛri Fɔɔ wu mu ge,
wee wu wa mɛ:
14 Ali pu mɛhɛ nagoo niɲɛhɛmɛɛ ta,
ŋmɔpara ɲɔ na pu bɛɛri wa da ba xhɔ.
Pu ɲabiye na ba xuugo pyi.
15 Piimusamaa pu da gori ge, kafɛɛyɛ yama na pee gbo.
Pu naxhugoshaa puyɛ pyaa bɛ da ba yamɛhɛɛ suu pu na wɛ.
16 Ali pu ɲɛhɛ wari faari pinnɛ ba puuro ɲɛ wɛ,
kelee na fàya faari pinnɛ ba cogo ɲɛ wɛ,
17 pu yi pinnɛ gɛ:
Sipya wemu wʼa tii ge, wee wu da ba yee fàya yi leni.
Jaagi baa fɛɛ na ba wee wari wu taa taa puyɛ na.
18 Puga kemu sipyikuuŋɔ ya yereŋɛ ge,
kee ma bye fyɛngɛ forogo.
Ki ma bye ba shazhɔnsigimɛ wo bugi ɲɛ wɛ.
19 Wu naafuu fɛɛrɛ wo ma sinnɛ, lee ma bye wu keree tɛhɛnɛ.
Wu ba wu ɲìi ki mugi, yaaga ɲɛ nige wɛ.
20 Fyaara kagbɔhɔɔ na ba wu ta ba gba lɔhɔ ɲɛ wɛ.
Kafɛnaɲile na ba gari ni wu ni piige ni.
21 Kilɛ-nɔhɔ kafɛɛgɛ ki na ba gari ni wu ni, wʼa juri.
Kee na ba wu lɔ laha wu tatɛɛngɛ ki ni fanha na.
22 Kilɛ na da wu ŋmuu ɲiɲaara baa.
Wʼa la le wuyɛ ni na fe, kɔnhɔ wu shɔ Kilɛ wo keŋɛ ki na.
23 Pu na ba kadahara kpɔɔn wu gyɛɛgi wu wuu na.
Pu na ba siwegee wi wu tatɛɛngɛ ki keree na.»