2 Saannaa
Eli ya Akaziya wo nahama pu jo
1
Ayiwa, ba saannaa Akabu ya xu wɛ, a Mowabu shɛɛn di nʼa she le puyɛ ni na wá Izirayɛli wo koomɔ pu na.2 Wee tuun wʼa bi saannaa Akaziya ta wʼo wolo to wu zangaso wu fɛnɛtiri wu ni, Samari kulo li ni, na wuyɛ bana. A wu tudunmɔɔ pʼi tun Ekurɔn kulo li ni, na pu pye: «Yi shɛ Baali-Zebubi yege, Ekurɔn shɛɛn wo kilɛ we, nɛ bu da nɛ na da yìri pe yama pe na.» 3 Wee tuun wu ni, a Tɛhɛnɛ Baa Kilɛ wo mɛlɛkɛ wʼi yi jo Tishibi shɛɛn Eli mu na: «Dugi, mʼa shɛ Samari shɛɛn saan wu tudunmɔɔ pu ɲuŋɔ círi, mʼa pu pye: ‹Ta Kilɛ baara na mu ya pye Izirayɛli wo koomɔ pu ni, na tudunmɔɔ tun pu shɛ Ekurɔn wo kilɛ Baali-Zebubi yege ya? 4 Lee wuu na yemu Tɛhɛnɛ Baa Kilɛ wa yu ge, yee yi wa mɛ na: “Yasinnɛgɛ kemu na mu ya dugi ge, ma da ga digi ki na wɛ. Ma da xhuu.”› » Lee kadugo na, a Eli di gari.
5 A tudunmɔɔ pʼi guri pa Akaziya mu, a wee di ba pu yege na: «Ɲaha na yi dʼa kuri wɛ?» 6 A pʼi wu ɲɔ shɔ na: «Ná wa wʼa shɛ wèe ɲuŋɔ círi, na wèe pye: ‹Yi kuri, saan we wʼa yi tun ge, yʼi shɛ wu pye na yemu Tɛhɛnɛ Baa Kilɛ ya jo ge, na yee yi wa mɛ na: “Ta Kilɛ baara na mu ya pye Izirayɛli wo koomɔ pu ni, na tudunmɔɔ tun pu shɛ Ekurɔn wo kilɛ Baali-Zebubi yege ya? Lee wuu na, yasinnɛgɛ kemu na mu ya dugi ge, ma da ga digi ki na wɛ. Ma da xhu.”› » 7 A Akaziya di pu pye: «Ná we wʼa shɛ yee ɲuŋɔ círi, na pe jomɔ pe jo yee mu ge, dii wu ɲɛ wɛ?» 8 A pʼi wu ɲɔ shɔ na: «Shiire fàya wu bi le, na sɛɛgɛ wo kirige taga wuyɛ pɔ niŋɛ ke ni.» Wee tuun wu ni, a Akaziya di jo: «Tishibi shɛɛn Eli wu wa!»
Akaziya ya giin wu Eli co
9 Ayiwa, a Akaziya di kashɛnŋmuu kɛlɛɛ kaguro (50) wo ɲuŋɔfɔɔ wa ni wu wo kashɛnŋmuu kɛlɛɛ kaguro (50) wu tun kari Eli fɛni. Lee bi Eli nidɛɛngɛ ta faaboboŋɔ ki ɲidii li ni, a wee ɲuŋɔfɔɔ wu dugi kari wu fɛni, na shɛ wu pye: «Kilɛ wo ná we, saan wʼa jo na ma tigi!» 10 A Eli di kashɛnŋmuu kɛlɛɛ kaguro (50) wo ɲuŋɔfɔɔ wu pye: «Nɛ bu da Kilɛ wo ná, na ki yìri fugba we ni, kʼi ba ma ni ma namaa kɛlɛɛ kaguro (50) wu sorogo!» Ayiwa, a na ka di yìri fugba wu ni, na ba wu ni wu namaa kɛlɛɛ kaguro (50) wu sorogo.
11 A Akaziya wu kɛlɛɛ kaguro (50) wo ɲuŋɔfɔɔ wa bɛ ni wu wo kɛlɛɛ kaguro (50) wu tun Eli mu. A wee di shɛ Eli pye: «Kilɛ wo ná we, yemu saan wʼa jo ge, yee yi wa mɛ na: ‹Tigi tɔvuyo na!› » 12 A Eli di pu pye: «Nɛ bu da nɛ na ɲɛ Kilɛ wo ná we, na ki yìri fugba we ni, kʼi ba ma ni ma namaa kɛlɛɛ kaguro (50) wu sorogo!» Ayiwa, a Kilɛ wo na ka di yíri fugba wu ni na ba wu ni wu namaa kɛlɛɛ kaguro (50) wo sorogo.
13 A Akaziya di kɛlɛɛ kaguro (50) wo ɲuŋɔfɔɔ taanri wo ni wu wo namaa kɛlɛɛ kaguro (50) wa bɛ tun sanha. A wee kɛlɛɛ kaguro (50) wo ɲuŋɔfɔɔ taanri wo wu bɛ di dugi kari. Ba wee ya shɛ nɔ wɛ, na nuguro sin Eli fɛɛ ni, na wu ɲɛɛri na: «Kilɛ wo ná we, nʼa ma ɲɛɛri, na munaa le, ni pii namaa kɛlɛɛ kaguro (50) we, ma kapyebyii pee, wù wo munahaa ki yaha ki kaa di waha ma mu! 14 Na kʼa yìri fugba wu ni, na ba kɛlɛɛ kaguro (50) wo ɲuŋɔfɛɛ nizhiilee shuun we ni pu wo namaa kɛlɛɛ kaguro kaguro (50) wu sorogo. Ga nimɛ, na munaa li yaha li kaa di waha ma mu!» 15 A Tɛhɛnɛ Baa Kilɛ wo mɛlɛkɛ wʼi Eli pye: «Pinnɛ tigi ni wu ni, ma ganha bu fya wu ɲaha na wɛ.» A Eli di digi, na binnɛ kari ni wu ni saan wu yíri. 16 A wu shɛ saan wu pye: «Yemu Tɛhɛnɛ Baa Kilɛ wa yu ge, yee yi wa mɛ na: ‹Mu ya tudunmɔɔ tun na pu shɛ Ekurɔn shɛɛn kilɛ Baali-Zebubi yege, a lʼi gari kanna Kilɛ wa Izirayɛli ni wa na já zhɛ wemu yege kunni-i? Lee wuu na, yasinnɛgɛ kemu na mu ya dugi ge, ma da ga digi ki na wɛ. Ma da xhuu.› » 17 A Akaziya di xhu na saha ni Tɛhɛnɛ Baa Kilɛ wo jomɔ pu ni, Eli ya pemu jo ge. A wu ceborona Zhoramu di diin saanra ti na wu tɛgɛ, bani ja bi ta pye wu mu wɛ. Lee ya bɛ ni Zhozafati ja Zhoramu wo saanra ti yee shuun wuu ni, Zhuda koomɔ pu wo saan we. 18 Akaziya wo kapyegee kisaŋaa, lemu wʼa pye ge, lee ya ka Izirayɛli koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni.