2 Saannaa 2

Kilɛ ya Eli lɔ durogo fugba wu ni

Ayiwa, Tɛhɛnɛ Baa Kilɛ ya Eli durogo fugba wu ni kafɛnaɲile li ni tuun wemu ni ge, Eli ni Elize bi yìri Giligali ni shiizhan. 2 A Eli di Elize pye: «Nʼa ma ɲɛɛri jo ma kori naha, Tɛhɛnɛ Baa Kilɛ wʼa nɛ tun fo Bɛtɛli ni.» A Elize di wu ɲɔ shɔ na: «Tɛhɛnɛ Baa Kilɛ ɲìi wo wu mɛgɛ na, ni mayɛ pyaa ki bɛ mɛgɛ na, nʼa da ga baha ma ni wɛ!» A pʼi gari shiizhan Bɛtɛli ni.

3 Kilɛ tudunmɔɔ piimu pu bi tiin Bɛtɛli ni ge, a pee di ba Elize pye: «Ta mʼa li cɛ na Tɛhɛnɛ Baa Kilɛ wʼa da ba ma ɲuŋɔfɔɔ wu lɔ gari fugba wu ni niɲaa ya?» A Elize di jo: «Uun, yi cari yiyɛ na, nʼa li cɛ.» 4 A Eli di Elize pye: «Nʼa ma ɲɛɛri jo ma kori naha, Tɛhɛnɛ Baa Kilɛ wʼa nɛ tun Zheriko ni.» A Elize di wu ɲɔ shɔ na: «Tɛhɛnɛ Baa Kilɛ ɲìi wo wu mɛgɛ na, ni mayɛ pyaa ki bɛ mɛgɛ na, nʼa da ga baha ma ni wɛ!» A pʼi nɔ Zheriko ni.

5 Kilɛ tudunmɔɔ piimu pu bi tiin Zheriko ni ge, a pee di fulo Elize na, na wu pye: «Ta mʼa li cɛ na Tɛhɛnɛ Baa Kilɛ wʼa da ba ma ɲuŋɔfɔɔ wu lɔ di gari fugba wu ni niɲaa ya?» A Elize di jo: «Uun, yi cari yiyɛ na, nɛ bɛ wʼa li cɛ.» 6 A Eli di Elize pye: «Nʼa ma ɲɛɛri jo ma tiin naha, Tɛhɛnɛ Baa Kilɛ wʼa nɛ tun Zhurudɛn gba wu ɲɔ ki na.» A Elize di jo: «Tɛhɛnɛ Baa Kilɛ ɲìi wo wu mɛgɛ na, ni mayɛ pyaa ki bɛ mɛgɛ na, nʼa da ga baha ma ni wɛ!» A pu shuun wu bɛɛri di gari Zhurudɛn gba wu ɲɔ ki na.

7 A Kilɛ tudunmɔɔ kɛlɛɛ kaguro (50) wa di daha pu fɛni na laraga yaha pu ni Eli ni Elize tɛ ni. A Eli ni Elize bɛ shuun wu shɛ yere Zhurudɛn wu ɲɔ ki na. 8 Wee tuun wu ni a Eli di wu fadegbɔhɔ ki lɔ, na kee kurulo na gba lɔhɔ ki kpɔn ni ki ni, a lɔhɔ kʼi daa shuun. A pu shuun wu gba wu kɔn ɲɛri tɔɔyɔ na ɲiwaga ki na. 9 Ba pʼa gba wu kɔn wɛ, a Eli di Elize pye: «Yaaga kemu fɛni ma ɲɛ ge, kee ɲɛɛri yani pu pa na lɔ laha ma tàan ge.» A Elize di wu ɲɔ shɔ na: «Munaa lemu li ɲɛ ma ni ge, lee shi tɛhɛnɛ shuun kan na mu.» 10 A Eli di wu pye: «Yaŋmuŋɔ kemu kaa lʼa waha ge, kee mu wʼa ɲɛɛri, ga ma ba na ɲa tashɛgɛ ni na lɛri ma tàan, wee tuun wu ni lemu mʼa sha ge, lee na bye ma mu. Ga ma bu bye ma ya na ɲa tashɛgɛ ni wɛ, lemu mʼa sha ge, lee da ba bye wɛ.»

11 Na pu yaha jomɔ pu na na gaaŋi, a na wo wotoriyo ni na wo shɔnyɔ di ba pu waa laha puyɛ na. A Eli di dugi fugba wu ni kafɛnaɲile ni. 12 A Elize di wu ɲa tashɛgɛ ni, na xhuulo na: «Na to! Na to! Izirayɛli wo wotoriyo ye ni wu shɔnyɔ fɛɛ pee!» Elize ya wu ɲa nige wɛ. Wee tuun wu ni a Elize di wuyɛ pyaa wo fadegbɔhɔ ki shɛɛngi shuun. 13 Eli wo fadegbɔhɔ kemu kʼa bi laha wu kapaŋa na na to ge, a Elize di kee lɔ, na guri pa Zhurudɛn gba wu ɲɔ ki na, na ba yere wà. 14 Eli wo fadegbɔhɔ kemu kʼa laha wu kapaŋa ki na na to ge, a Elize di kee lɔ na gba lɔhɔ ki kpɔn ni kee ni, na jo: «Mii Tɛhɛnɛ Baa Kilɛ di ɲɛ wɛ, Eli wo Kilɛ we?» Ba Elize bɛ ya gba lɔhɔ ki kpɔn mu wɛ, a lɔhɔ kʼi daa shuun, a Elize di doro na kari gba wu kogii wu na.

15 Ba Zheriko wo Kilɛ tudunmɔɔ pʼa Elize ɲa pu ɲahatiimɛ pu ni wɛ, na jo: «Eli munaa li ɲɛ Elize na.» A pʼi fulo wu na, na pu ɲahaya buri ɲiŋɛ ki na wu tàan. 16 A pʼi wu pye: «Naŋmaya kɛlɛɛ kaguro (50) wa naha wèe tɛ ni, ma kapyebyii pee. Pee yaha pʼi shɛ ma kafɔɔ wu sha! La wa la ni Tɛhɛnɛ Baa Kilɛ wo munaa lʼa wu lɔ, na shɛ wu wá tɛgɛ ka ni, faaboboŋɔ ka na, kelee faaya yi tɛ fawii la ni.» A Elize di jo: «Yi ganha bu pu tun zhɛ wɛ!» 17 Ga a pʼi diin na wu ɲɛɛri gbee, fo wʼa pa ganha na pu pye: «Yi pu tun shɛ.» A pʼi namaa kɛlɛɛ kaguro (50) wu yaha kari, a pee di shɛ Eli sha fo na ta cabyaa taanri, pu ya wu ɲa wɛ. 18 A pʼi guri pa Elize mu, lee bi wee ta wʼa kori Zheriko kulo li ni, a wu pu pye: «Ta nɛ yee pye jo yi ganha bu shɛ-ɛ wɛ?»

Elize ya Zheriko lɔhɔ ki ɲɛri lofɛɛfɛɛgɛ

19 Ayiwa, a Zheriko shɛɛn pʼi Elize pye: «Wù Kafɔɔ we, ba mʼa li ɲaa wɛ, kulo li tiinmɛ pʼa taan. Ga li lɔhɔ ki ya ɲɔ wɛ, li ɲiŋɛ ki bɛ ya ɲɔ wɛ.» 20 A Elize di jo: «Yi pa ni golɛgɛ nivoŋɔ ka ni, yʼi suumɔ le ki ni.» A pʼi ba ni kee ni wu mu. 21 A wu foro kari lobulowii li yíri, na shɛ suumɔ pa le li ni, na jo: «Yemu Tɛhɛnɛ Baa Kilɛ wa yu ge, yee yi wa mɛ na: ‹Nɛ ke lɔhɔ ke pye fɛɛfɛɛ, ki wa da xu nɔ nige wa na wɛ, kʼi wa da ɲiŋɛ ki bɛ lɔhɔ pɛn wɛ.› » 22 A lɔhɔ kʼi bye fɛɛfɛɛ, fo na pa nɔ niɲaa na, na saha ni Elize wo jomɔ pu ni.

Elize ya kari Bɛtɛli ni

23 Ayiwa, a Elize di yìri Zheriko ni, na dugi kari Bɛtɛli ni. Na wu yaha wu na gaaŋi koo li na, a funabiire ta di foro kulo li ni na shɛ ganha na wu la wo, na yu: «Dugi shɛ ɲudɛmuugo! Dugi shɛ ɲudɛmuugo!» 24 A wu ŋmahana ɲɛri, na pu wii, na pu laŋi Tɛhɛnɛ Baa Kilɛ mɛgɛ na. Wee tuun wu ni, a yacoyo urusii shuun di foro taha ki ni, na funabiire kɛlɛɛ shishɛɛrɛ ni shuun (42) cere cere. 25 A wu yìri wà, na gari Karimɛli wo faaboboŋɔ ki na, na yìri wà, na gari Samari kulo li ni.