Zhɔbu
Sɛmɛ wemu ni Zhɔbu kaa ya yu ge
Zhɔbu wo ɲaarigazaana le
1
Ná wa bye Uzi fiige ki ni, wu mɛgɛ ki bye na Zhɔbu. Wee bye funvige fɔɔ, na ɲɛ sipya wemu wʼa tii ge. Kilɛ ɲìi fyaara fɔɔ wu bye wii, wʼa bi laraga kɔɔn kakuuŋɔɔ na. 2 Jalaa gbarashuun ni pushaa taanri wu bye wu mu. 3 Yapɔrɔyɔ ye yi bye wu mu ge, yee ɲɛ dubyaa kabɔfoŋɔɔ gbarashuun (7.000) ni ɲɔhɔyɔ kabɔfoŋɔɔ taanri (3.000), ni faa niiyɛ pɔgɔɔ xhuu kaguro (500), ni kafazhaa xhuu kaguro (500). Kapyebyii niɲɛhɛmɛɛ bɛ pu bye wu mu. Wee wu bye Kilɛ-nɔhɔ kacɛ ki sipyii pu bɛɛri wo sipyigbɔ.4 Zhɔbu jalaa pʼa bi kaleŋɛɛ gbuu na mari puyɛ mu. Pu ba gaaŋi wa puga kalenɛ li tagbaga ni, pʼa pu ceboroshaa taanri wu bɛ yiri, pu bɛɛri na shɛ li, na gba shiizhan. 5 Ga ba kalenɛ li cabyaa kʼa toro wɛ, Zhɔbu na wu nagoo pu yiri, na ba pu pye fɛɛfɛɛ. Wʼa ba soo yìri ɲisɔɔgɔ ki tàan na saraya nizogoyo nigin nigin wolo wu nagoo pu bɛɛri nigin nigin mu. Bani Zhɔbu bi ma ye yu wuyɛ funŋɔ ni na: «La wa la ni nɛ nagoo pu na zhɛ da pʼa nahana Kilɛ mu. Pu na já da pʼa jurumu pye Kilɛ na pu fungɔnyɔ ni.» Zhɔbu bi lee pyi tuun bɛɛri ni.
Zhɔbu nɔwuuro ti nizhiire
6 Ayiwa caŋa ka Kilɛ wo jalaaa pʼa pa yere Tɛhɛnɛ Baa Kilɛ ɲaha tàan, a Shitaannib bɛ di ba yere pu tɛ ni. 7 A Tɛhɛnɛ Baa Kilɛ di Shitaanni pye: «Mii ma dʼa yìri wɛ?» A Shitaanni di Tɛhɛnɛ Baa Kilɛ pye: «Taɲaraya ni nɛ yìri ɲiŋɛ ke na, na shɛ ki saala.» 8 A Tɛhɛnɛ Baa Kilɛ di wu pye: «Ta mʼa na bulona Zhɔbu sɛɛri? Wu ɲɔhɔ wa ɲiŋɛ ke na wɛ. Zhɔbu ɲɛ funvige fɔɔ, na ɲɛ sipya wemu wʼa tii ge. Kilɛ ɲìi fyaara fɔɔ wu ɲɛ wii, wemu ya laraga kɔɔn kakuuŋɔɔ na ge.» 9 A Shitaanni di Tɛhɛnɛ Baa Kilɛ ɲɔ shɔ na: «Ta mu wʼa giin na kaɲuŋɔ baa Zhɔbu wʼa fyagi Kilɛ na gɛ?* 10 Ta mu bɛ wʼa wu ni wu puga shɛɛn ni wu yaŋmuyɔ yi bɛɛri maha círi, na pu kasɛɛgɛ pyi wɛ? Mu ya baraga le wu keŋɛ labye wu bɛɛri ni. Go wu yapɔrɔyɔ yi wa fiige ki bɛɛri ɲi. 11 Ga ma keŋɛ ki yeege, mʼa gbɔn yɛ wu keŋɛ yaŋmuyɔ yi bɛɛri na, nakaara baa, wu na ma laŋi mayɛ bile li bɛ ɲii na.» 12 A Tɛhɛnɛ Baa Kilɛ di Shitaanni pye: «Ayiwa, wu keŋɛ yaŋmuyɔ yi bɛɛri wa ma kacɛ na, ga ma keŋɛ ganha bu nɔ yɛ wuyɛ pyaa ki na wɛ.» Wee tuun wu ni a Shitaanni di laha Tɛhɛnɛ Baa Kilɛ tàan.
13 Ayiwa, caŋa ka, na Zhɔbu jalaa pee ni wu pushaa pu yaha pu na li, na duvɛn wu gbuu pu bɛɛri wo ɲahafɔɔ wu kaban, 14 a tudunmɔ di nɔ Zhɔbu na, na wu pye: «Faa niiyɛ yi bi faa wu pyi, kafazhaa pʼi ɲɛ na li yi kabanugo na. 15 Taapile ni a Saba shɛɛn di ba do yi na, na yi bɛɛri kɔri lɔ, na kapyebyii pu bɛɛri gbo ni ŋmɔparaa ni. Nɛ yɛ nigin wʼa mɔɔri shɔ, na ba di ba yee ɲaha jo ma mu.» 16 Na wee yaha pee jomɔ pu na, a tudunmɔ wa bɛ di nɔ na jo: «Kilɛ wʼa sɛlɛ ma yatɔɔnahamaa pee ni dubyaa pu bɛɛri na, a na kʼi yatɔɔnahamaa pee ni dubyaa pu bɛɛri sòrogo. Nɛ yɛ nigin wʼa mɔɔri shɔ, na ba di ba yee ɲaha jo ma mu.» 17 Na wee yaha pee jomɔ pu na, a tudunmɔ wa bɛtii di nɔ na jo: «Kalide shɛɛn kashɛn keye taanri wʼa nɔ to ɲɔhɔyɔ yi na, na yi bɛɛri kɔri lɔ. A pʼi kapyebyii pu bɛɛri gbo ni ŋmɔparaa ni. Nɛ yɛ nigin wʼa mɔɔri shɔ, na ba di ba yee ɲaha jo ma mu.» 18 Na wee yaha pee jomɔ pu na, a tudunmɔ wa bɛtii di nɔ sanha na jo: «Ma jalaa pee ni ma pushaa pu bi li, na duvɛn wu gbuu pu bɛɛri wo ɲahafɔɔ wu kaban. 19 Taapile ni a kafɛɛgbɔhɔ ka di nɔ na yìri siwaga ki yíri. Ma nagoo pu bye puga kemu ni ge, a kafɛɛgbɔhɔ kʼi ba kee wo guzheŋɛɛ shishɛɛrɛ wu kɛgi shan pu ɲuŋɔ ni, a pu bɛɛri di xhu. Nɛ yɛ nigin wʼa mɔɔri shɔ, na ba di ba yee ɲaha jo ma mu.»
20 Wee tuun wu ni a Zhɔbu di yìri, na wu fadegbɔhɔ ki shɛɛngi, na wu ɲuŋɔ ki kuu. Lee kadugo na a wu do ɲiŋɛ na, na Kilɛ pɛlɛ. 21 A wu jo: «Nɛ lize mɛɛ baa wo wʼa se, nɛ lize mɛɛ baa wo wʼa da ba guri bɛ. Tɛhɛnɛ Baa Kilɛ wʼa yara li kan, Tɛhɛnɛ Baa Kilɛ wʼa yara li shɔ. Pɛɛŋɛ ki taha Tɛhɛnɛ Baa Kilɛ mɛgɛ na.»
22 Kii kawagaa kii bɛɛri funŋɔ ni Zhɔbu ya ta jurumu pye wɛ, wu ya ta Kilɛ mɛpɛngɛ jo wɛ.