<<    <     2 Saannaa     25     >    >> 
Nabukodonozɔɔri ya kashɛn sin na Zheruzalɛmu kulo li maha
(Zheremi 39:1-7 ; 52:4-11)
25
Ayiwa, Sedesiya wo saanra ti yee gbarashɛɛrɛ wuu li wo yeŋɛ kɛ wogo ki caŋa kɛ wogo ki na Babilɔni saan Nabukodonozɔɔri ya shɛ do Zheruzalɛmu kulo li na ni wu kashɛn keŋɛ ki bɛɛri ni. A wu shɛ kashɛn keŋɛ ki sin kulo li fɛni. A pʼi taduguyo ya yàa na kulo li maha círi. 2 A pʼi kashɛn ki taga kulo li maha círi mu, fo na shɛ da Sedesiya wo saanra ti yee kɛ ni nigin wuu li na. 3 Lee yee li yeŋɛ shishɛɛrɛ wogo ki wo caŋa gbarashɛɛrɛ wogo ki na, a xuugo kʼi wɛri sipyiire ti na fo xuuni, ɲɔ yalige yaaga ka shishiin bye sipyiire ti mu wɛ. 4 A Babilɔni shɛɛn pʼi kapahaŋa ka kɔn kulo li maha maha kasɔrɔgɔ ki na. Ba piige kʼa pa wɔ wɛ, tajege kemu ki bye kulo li kasɔrɔyɔ shuun wu tɛ wu ni, saan wu wo kamahaŋa ki tàan ge, a kashɛnŋmuu pu bɛɛri di foro kee tajege ke ni, na li ta bɛ Babilɔni shɛɛn pu bi kulo li maha. A pʼi foro na Zhurudɛn fadaaŋa ki koo li lɔ na se. 5 Ga a Babilɔni wo kashɛn keŋɛ kʼi saan wu nɔhɔ niinɛ, na shɛ wu ta co Zheriko wo fadaaŋa ki na, a wu kashɛnŋmuu pu bɛɛri di jaaga foro wu tàan. 6 A Babilɔni shɛɛn pʼi Zhuda wo saan wu co, na gari ni wu ni Iribila ni, Babilɔni wo saan wu yíri. A pʼi shɛ kiiri kɔn wà wu na. 7 A pʼi saannaa Sedesiya jalaa pu gbo wuyɛ pyaa ki ɲii li na. Lee kadugo na, a Babilɔni saan wu pu pye pʼa Sedesiya ɲìi ki ja. A pʼi daɲaa shɔnhɔyɔ le wu na, na gari ni wu ni Babilɔni ni.
Pʼa Zheruzalɛmu shɛɛn pu co conɔ shuun wuu li ni
(Zheremi 39:8-10 ; 52:12-27 ; 2 Caŋa Ɲɛhɛɛ Jomɔ 36:17-21)
8 Ayiwa, yee li yeŋɛ kaguro wogo ki caŋa gbarashuun wogo ke, lee ya bɛ ni Babilɔni saan Nabukodonozɔɔri wo saanra ti yee kɛ ni gbarashɛɛrɛ wuu li ni, a Nebuzaradan di gari Zheruzalɛmu kulo li ni. Wee bye saan wu ɲuŋɔ sigevɛɛ pu wo ɲuŋɔfɔɔ, na ɲɛ saan wu wo kapyebye wa. 9 A wu shɛ na le Tɛhɛnɛ Baa Kilɛ wo puga ki na, ni saan wu wo puga ke, ni Zheruzalɛmu wo piyɛyɛ yi bɛɛri. A wu shɛ na le pugbɔyɔ yi bɛɛri na. 10 Babilɔni wo kashɛn keŋɛ kemu bɛɛri ki bye ni saan wu ɲuŋɔ sigevɛɛ pu wo ɲuŋɔfɔɔ wu ni ge, a pee di Zheruzalɛmu kulo li maha maha kasɔrɔgɔ ki ja.
11 Sipyii piimusamaa pu bi kori kulo li ni ge, ni piimu pu bi puyɛ kan Babilɔni saan wu mu ge, na fara sipyiire tisara bɛɛri na, a Nebuzaradan di pee bɛɛri co na kari, saan wu ɲuŋɔ sigevɛɛ pu wo ɲuŋɔfɔɔ we. 12 Ga a saan ɲuŋɔ sigevɛɛ pu wo ɲuŋɔfɔɔ wu pii yaha wà kulo li labaafɛɛ pu ni, kɔnhɔ pee di da ɛrɛzɛn kɛrɛyɛ yi yari, pʼi da faa pyi.
13 Daɲaa benɛɛ piimu pu bye Tɛhɛnɛ Baa Kilɛ wo puga ki ni ge, ni daɲaa wotoriyo ni daɲaa wo pɛgɛ nagaŋa kemu ki bye Tɛhɛnɛ Baa Kilɛ wo puga ki ni ge, a Babilɔni shɛɛn pʼi yee bɛɛri ja ja, na gari ni wee daɲaa wu ni Babilɔni ni. 14 Shɔhɔɔ, ni shɔɔnrɔ yakuuyoa ye, ni ŋmɔhɔɔ kee, ni setigee kee, ni daɲaa yagbegeye yemu bɛɛri ni pu bi labye wu pyi ge, a pʼi yee bɛɛri lɔ. 15 A ɲuŋɔfɔɔ wu sanni yaŋmuyɔ yi bɛɛri, ni wari woyo yi bɛɛri lɔ, ma na jo na yalɔyɔ ye, ni cɛɛgbuugoo kee. 16 Saannaa Solomani bi benɛɛ shuun wemu yàa, ni pɛgɛ nagaŋa ke, ni wotoriyo ye, Tɛhɛnɛ Baa Kilɛ wo puga ki mu ge, yee bɛɛri wo daɲaa wu ɲuŋɔkana li bi pɛlɛ fo wu ya já cɛ wɛ. 17 Beni nizhiimɛ wu wo tɔɔngɔ ki bye keŋɛ ɲii kɛ ni gbarataanri. Daɲaa ɲɔtɔŋɔ ki bye wu fugba wu ni, kee ɲɔtɔŋɔ ki wo tɔɔngɔ ki bye keŋɛ ɲii taanri, na tige yasɛyɛ ya wo kacɛmɛ pa yàa na kee ɲɔtɔŋɔ ki maha, yee bɛɛri bi yàa ni daɲaa ni. Beni shuun wo wu bɛ bi bye mu lee pyegana li na ni wu wo kacɛmɛ pu ni.
18 Ayiwa, a saan wu ɲuŋɔ sigevɛɛ pu ɲuŋɔfɔɔ wu saraya ɲaha shɔɔnrivɛɛ wo ɲuŋɔfɔgbɔ wu co, wee wemu wu ɲɛ Seraya ge, ni Sofoni, wee ɲɛ saraya ɲaha shɔɔnrivɔɔ wemu wʼa taha saraya ɲaha shɔɔnrivɛɛ wo ɲuŋɔfɔgbɔ wu na ge, na fara Tɛhɛnɛ Baa Kilɛ wo puga ki wo kuɲɔsigilee taanri wu na. 19 A wu fanhafɔɔ wa co kanha ki funŋɔ ki ni, wee bye kashɛnŋmuu pu wo ɲahagbaa fɔɔ, ni saan wu wo puga ki sipyii kaguro wa, pee piimu pu bye kanha ki funŋɔ ki ni ge, ni kama kavɔɔ we, wee wemu wu bye kashɛn keŋɛ ki ɲuŋɔfɔɔ we, na fiige ki namaa pu mɛyɛ yi kani kashɛn ki na ge, ni fiige ki shɛɛn namaa kɛlɛɛ gbaara (60) pee piimu pu bye kanha ki ni ge. 20 A saan wu ɲuŋɔ sigevɛɛ pu wo ɲuŋɔfɔɔ Nebuzaradan di pu co, na gari ni pu ni Iribila ni Babilɔni wo saan wu mu. 21 A Babilɔni wo saan wu shɛ pu gbo Iribila ni, Amati fiige ki ni. A pʼi Zhuda shɛɛn pu co na kari mu lee cogana li na, na pu sanha liige pu wo ɲiŋɛ ki na.
Gedaliya ya pye Zhuda koomɔ pu wo gbafɛnɛɛri
(Zheremi 40:7—41:18)
22 Ayiwa, sipyii piimusamaa pʼa kori Zhuda fiige ki ni ge, Babilɔni saan Nabukodonozɔɔri bi sɔɔ na piimu yaha pʼa kori wà ge, a wu Gedaliya teŋɛ na pye pee wo ɲuŋɔfɔɔ. Gedaliya bi bye Ayikamu wo ja, Ayikamu di bi bye Shafan wo ja.
23 Ayiwa, Zhuda koomɔ pu wo kashɛn ɲuŋɔfɛɛ, ni kashɛnŋmuu piimusamaa bɛɛri pu bi kori wà ge, ba pee ya logo na Gedaliya Babilɔni saan wʼa teŋɛ na pye ɲuŋɔfɔɔ wɛ, a pʼi gari Gedaliya yíri, Misipa kulo li ni: Pee bye Netaniya ja Isimayɛli, ni Kareya ja Yowana, ni Tanumɛti ja Seraya na yìri Netofa kulo li ni, ni Maaka shɛɛn Yazaniya. 24 A Gedaliya di ba gàa pee sipyii pee ni pu wo kashɛnŋmuu pu mu, na pu pye: «Yi ganha bu fya Babilɔni shɛɛn pu na wɛ, yi kori fiige ki ni, yʼi guu Babilɔni saan wu mu, lee na la ɲɔ yi na.» 25 Ga yee li yeŋɛ gbarashuun wogo ki na, a Isimayɛli di ba ni namaa kɛ ni. A pʼi ba Gedaliya gbo, Zhuda shɛɛn ni Babilɔni shɛɛn piimu bɛ pu bye ni wu ni ge, a pʼi pee bɛ gbo Misipa kulo li ni. Isimayɛli bi bye Netaniya wo ja, Netaniya di bi bye Elishama wo ja na foro saan wu wo kpuun li na. 26 Ba lee ya pye wɛ, a sipyiire tisara bɛɛri di yìri, nɔhɔcɛrɛɛ fara sipyilɛgɛ na, na fara kashɛnŋmuu pu wo ɲuŋɔfɛɛ pu na, a pu bɛɛri di yìri na gari Misira fiige ki ni, bani pu bi fya Babilɔni shɛɛn pu na.
Babilɔni saan Merodaki ya ɲuŋɔ ɲaari saannaa Zhoyakini na
(Zheremi 52:31-34)
27 Ayiwa, Zhuda saannaa Zhoyakini na co na kari Babilɔni ni, li yee kɛlɛɛ taanri ni gbarashuun (37) wuu li wo yeŋɛ kɛ ni shuun wogo ki cabyaa kɛlɛɛ shuun ni gbarashuun (27) wogo ki na, a Babilɔni saan Evili-Merodaki di ɲuŋɔ ɲaari Zhoyakini na, Zhuda wo saan we, na wu yeege kasogbaha ki ni. Lee yee le Merodaki ya tiin saanra ti na Babilɔni fiige ki ni. 28 A wu funŋɔ di daan ni Zhoyakini ni, saannaa piimu bɛɛri pu bi co kari Babilɔni ni ge, a wu wu durogo pee bɛɛri fugba ni. 29 A pʼi kasolemɛɛ wo fàya yi wolo wu na, a Zhoyakini di ganha na binnɛɛ na li ni Babilɔni wo saan wu ni caŋa bɛɛri wu wo shi wu caŋa ɲɛhɛɛ ki bɛɛri ni. 30 Saan wu bi pu pye pu na wu caŋa bɛɛri wo mago ɲɔ yaŋmuyɔ kaan wu mu ɲiga bɛɛri, wu shi wu caŋa ɲɛhɛɛ ki bɛɛri ni.