24
Ayiwa, saannaa Zhoyakimu wo saanra ti caŋa ɲii li ni, Babilɔni saan Nabukodonozɔɔri ya shɛ kashɛn kɔn wu na. A saannaa Zhoyakimu di guu wu mu na ta yee taanri. Ga lee kadugo na, a Zhoyakimu di ba nʼa she le wuyɛ ni. 2 Wee tuun wu ni a Tɛhɛnɛ Baa Kilɛ di kashɛnŋmuu pii yirige wu fɛni na yìri Babilɔni fiige ke, ni Aramu fiige ke, ni Mowabu fiige ke, ni Amɔ shi shɛɛn pu wo fiige ki ni. A Tɛhɛnɛ Baa Kilɛ di pee yaha na pa Zhuda koomɔ pu fɛni, kɔnhɔ pʼi ba Zhuda ɲuŋɔ tugo, na saha ni Tɛhɛnɛ Baa Kilɛ wo nijoyo yi ni wu kapyebyii, Kilɛ tudunmɔɔ pu ɲɔ na.3 Lee ya pye na saha ni Tɛhɛnɛ Baa Kilɛ yɛpyaa ki wo ɲɔjomɔ pu ni, bani wu funŋɔ ki bye wu Zhuda shɛɛn pu lɔ di laha wuyɛ ɲaha tàan Manase wo jurumu wu bɛɛri wuu na. 4 Manase bi jaagi baa fɛɛ shishan wo, wu bi jaagi baa fɛɛ shishan wo na Zheruzalɛmu kulo li ɲi, fo na li pye Tɛhɛnɛ Baa Kilɛ ya ta sɔɔ na wee jurumu wu yafa wɛ.
5 Ayiwa, Zhoyakimu wo kapyegee kisaŋaa, lemu bɛɛri wʼa pye ge, yee ya ka Zhuda koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni. 6 A Zhoyakimu di shɛ binnɛ ni wu tii pu ni yaŋa kanha na. A wu ja Zhoyakini di diin saanra ti na wu tɛgɛ. 7 Misira saan wu ya ta foro nige wu fiige ki ni wɛ, bani xuu wemu bɛɛri wu bye Misira saan wu wo ge, Babilɔni saan wu bi wee xuu wu bɛɛri co, na lɔ Misira dugo ki na, fo na shɛ nɔ Efirate gba wu na.
Zhuda shɛɛn pu conɔ shuun wuu
(2 Caŋa Ɲɛhɛɛ Jomɔ 36:9-10)
8 Ayiwa, Zhoyakini teŋɛduun wu ni saanra ti na wu shi wu bye yee kɛ ni gbarataanri. A wu yebyaa taanri pye saanra ti ni Zheruzalɛmu kulo li ni. Wu nu wu mɛgɛ ki bye na Nexhushita, wee bye Zheruzalɛmu shɛɛn Elinatan wo poro. 9 Lemu lʼa kolo Tɛhɛnɛ Baa Kilɛ mu ge, lee wu bi byi cibɛ ba wu to wʼa bi li pye toro wɛ.
10 Ayiwa, wee tuun we ni Babilɔni saan Nabukodonozɔɔri wo namaa pʼa yìri na shɛ do Zheruzalɛmu na, na kashɛn taga kulo li kuuri. 11 Na Babilɔni saan Nabukodonozɔɔri wo namaa pu yaha pʼa kashɛn taga kulo li maha, a Nabukodonozɔɔri yɛpyaa bɛ di yìri kari kulo li ɲɔ na. 12 Ba lee ya pye wɛ, a Zhuda saan Zhoyakini di foro, na shɛ wuyɛ kan Babilɔni saan wu mu, wu ni wu nu we, ni wu kashɛnŋmuu pee, ni wu fanha ki ɲuŋɔfɛɛ pee, ni wu fanhafɛɛ pee. A Babilɔni saan wu wu pye bulo wu saanra ti yee gbarataanri wuu li na. 13 Naafuu wemu bɛɛri wu ɲɛ Tɛhɛnɛ Baa Kilɛ wo puga ki ni ge, ni wemu bɛɛri wu ɲɛ saan wu wo puga ki ni ge, a Babilɔni wo saan wu gari ni wee bɛɛri ni. Izirayɛli saannaa Solomani bi sanni yagbegeye yemu bɛɛri yàa na yaha Tɛhɛnɛ Baa Kilɛ wo pɛɛŋɛ pugbɔhɔ ki ni ge, a wu yee bɛɛri tɔnhɔnɔ ma na jo ba Tɛhɛnɛ baa Kilɛ bi yi jo wɛ. 14 A wu gari ni Zheruzalɛmu shɛɛn pu bɛɛri ni, fanha ki ɲuŋɔfɛɛ pu bɛɛri, ni kashɛn naŋmaya yi bɛɛri. Pu bɛɛri ya pye sipyii kabɔfoŋɔɔ kɛ (10.000). A wu gari ni kacebyii pu bɛɛri, ni tudugoo pu bɛɛri ni. Piimu pu ɲɛ kulo li bɛɛri wo labaafɛɛ pu ge, a wu pee yɛ nigin yaha kulo li ni. 15 A wu gari ni Zhoyakini bɛ ni Babilɔni ni. A wu gari ni saan wu nu wu bɛ ni, ni saan wu cèe pee, ni wu fanhafɛɛ pee, na fara fiige ki sipyigbɔɔ pu bɛɛri na. A wu gari ni pu bɛɛri ni, na yìri Zheruzalɛmu ni, na kari Babilɔni ni. 16 A Babilɔni saan wu kashɛnŋmuu kabɔfoŋɔɔ gbarashuun (7.000), ni kacebyii ni tudugoo kabɔfonɔ nigin (1.000) co na kari Babilɔni ni. Pee bɛɛri bye kashɛn naŋmaya.
17 A Babilɔni saan wu Zhoyakini to wu ceborona Mataniya teŋɛ saanra ti na wu tɛgɛ, na wu mɛgɛ ɲɛri na Sedesiya.
Sedesiya ya pye Zhuda koomɔ pu saan
(Zheremi 52:1-3 ; 2 Caŋa Ɲɛhɛɛ Jomɔ 36:11-12)
18 Ayiwa, Sedesiya teŋɛduun wu ni saanra ti na, wu shi wu bye yee kɛlɛɛ shuun ni nigin (21). A wu yee kɛ ni nigin pye saanra ti na Zheruzalɛmu kulo li ni. Wu nu wu mɛgɛ ki bye na Amutali, wee bye Libina shɛɛn Zheremi wo poro. 19 Lemu lʼa kolo Tɛhɛnɛ Baa Kilɛ mu ge, lee wu bi byi cibɛ ma na jo ba Zhoyakimu bi li pyi wɛ. 20 Kii keree kii bɛɛri ya Zheruzalɛmu ni Zhuda ta Tɛhɛnɛ Baa Kilɛ wo loyire li funŋɔ ni, fo na ba wu pye wʼa pu kɔri wá taliige na laha wuyɛ ɲaha tàan. A Sedesiya di ba nʼa she le wuyɛ ni na wá Babilɔni saan wu na.