Zhɔbu 2

Zhɔbu nɔwuuro ti shuun wuuro

Ayiwa caŋa ka bɛ Kilɛ wo jalaa pʼa pa yere Tɛhɛnɛ Baa Kilɛ ɲaha tàan, a Shitaanni bɛ di ba yere pu tɛ ni Tɛhɛnɛ Baa Kilɛ ɲaha tàan. 2 A Tɛhɛnɛ Baa Kilɛ di Shitaanni pye: «Mii ma dʼa yìri wɛ?» A Shitaanni di Tɛhɛnɛ Baa Kilɛ pye: «Taɲaraya ni nɛ yìri ɲiŋɛ ke na, na shɛ ki saala.» 3 A Tɛhɛnɛ Baa Kilɛ di wu pye: «Ta mʼa na bulona Zhɔbu sɛɛri? Wu ɲɔhɔ wa ɲiŋɛ ke na wɛ. Zhɔbu ɲɛ funvige fɔɔ, na ɲɛ sipya wemu wʼa tii ge. Wʼa fyagi Kilɛ na, na laraga kɔɔn kakuuŋɔɔ na. Mu mɛhɛ bi nɛ pye nɛ wu kakara pye wu mu ɲuŋɔ baa, wu kunni ya kori yaha wu ɲɔmɛɛ fɛɛrɛ ti ni.» 4 A Shitaanni di Tɛhɛnɛ Baa Kilɛ pye: «Sɛɛgɛ ki ɲɛ sɛɛgɛ faara. Sipya na zɔɔ na wu keŋɛ yara bɛɛri kan kɔnhɔ wu wu munaa ɲuŋɔ wolo. 5 Ga ma keŋɛ taha wii wu kaciiye ye ni wu ceexaara ti na, nakaara wa li ni wɛ, wu na ma laŋi mayɛ bile li bɛ ɲii na.» 6 A Tɛhɛnɛ Baa Kilɛ di Shitaanni pye: «Ayiwa, nʼa wu ɲɔ yaha ma mu, ga ma ganha bu nɔ wu munaa li na wɛ.»

7 Wee tuun wu ni a Shitaanni di yìri laha Tɛhɛnɛ Baa Kilɛ tàan, na shɛ nɔɔkuuyo wá Zhɔbu ceesɛɛgɛ ki bɛɛri na, na co wu ɲidahaa ki na fo na shɛ nɔ wu ɲuŋɔ ke na. 8 A Zhɔbu di sisɛɛrɛ la lɔ, na ganha na wuyɛ ŋmagi ni lee ni, na shɛ diin shɔɔnrɔ ni. 9 A wu shɔ wu wu pye: «Mu ya kori yaha sanha ma wo tiimɛ pu na ya? Mɛhɛ Kilɛ laŋi mʼa mɛhɛ xu!» 10 A Zhɔbu di wu shɔ wu pye: «Mu kunni wʼa yu ba fungɔngɔ baa fɔɔ ɲɛ wɛ. Wèe ma ganha na ɲaɲiŋɛ taa Kilɛ mu yoo, wu bu ɲakpaan kan wù mu, wù ma zhe wee ni ya?» Lee bɛɛri funŋɔ ni Zhɔbu ya ta joguumɔ jo wá Kilɛ na wɛ.

Zhɔbu naɲiinɛɛ taanri ya pa wu yíri

11 Kawagaa kiimu bɛɛri kʼa Zhɔbu ta ge, a kee keree di nɔ wu naɲiinɛɛ taanri wu na. Pee ɲɛ Tema shɛɛn Elifazi ni Shuwa shɛɛn Bilidadi ni Naama shɛɛn Zofaari. Ba pee ya Zhɔbu kawagaa ki kaa logo wɛ, na jo bɛ yi na, a pu bɛɛri di yìri pu wo fiiye yi ni, na shɛ puyɛ ɲuŋɔ círi kɔnhɔ pʼi shɛ Zhɔbu pɛrɛgi pʼi wu pure. 12 Ba pʼa pa pu ɲuyɔ yirige na wu ɲa na pu yaha laraga ni wɛ, na wu te. A pʼi sipyaa le na xhuulo. A pu bɛɛri di pu fadeye shɛɛngi, na shɔɔnrɔ kuu, na tee wá fugba we ni, a tee di guri wo pu ɲuyɔ ni. 13 Lee kadugo na a pʼi diin diin ɲiŋɛ na wu tàan fo na shɛ da caya gbarashuun ni nibiiye gbarashuun. Wa shishiin ya já jo ni wu ni pu ni wɛ, bani pʼa li ɲa na wu kanhama pʼa pɛlɛ fo na kasa ye.