Zhɔbu wo tataara jomɔ pe
3 «Caŋa ɲii lemu na nɛ se ge, lee li kyɛɛgi
piige kemu kʼa jo na funana yacɛrɛ li wa lɔ niɲaa ge,
kee ki kyɛɛgi
4 Kee caŋa ki kunni ki ɲɛri nibiige.
Na Kilɛ yaha fugba we ni,
wu ganha bu kasɛɛgɛ yaha kee caŋa ki na wɛ.
Kpɛɛngɛ ka shishiin ganha bu foro kee caŋa ki wɛ!
5 Nibiicogoŋɔ ni xu ɲimɛ pu lee caŋa ɲii li co,
ɲahaya yi li tɔ,
piige ki kee caŋa ki co fo ki funbɛɛnrɛ wá ki na!
6 «Nibiicogoŋɔ ki kee piige ki co!
Kee piige ki ganha bu funŋɔ taan ni yee li wo caya yisaya ni wɛ!
Kee piige ki ganha bu dɔrɔ le yeye yi wo piiye yi ni wɛ!
7 Oo dɛ, kee piige ki pye seganha piige,
fundanga mujuu la shishiin ganha da voro kee piige ki ni wɛ!
8 Piimu pʼa caya yi laŋi ge, pee pu kee piige ki laŋi,
pee piimu pʼa Leviyatana wu ɲɛgana cɛ ge!
9 Nibiige ki jé kee piige ki wo ɲimuguɲɔ wɔrɔɔ ki ni!
Kee piige ki ki ɲimuguŋɔ sige kanha,
ki ganha bu caŋa foro foro ɲɛɛgɛ ɲa wɛ!
10 «Bani kee piige ki ya ta nɛ yacɛrɛ li sige lɔ na,
kɔnhɔ na ɲìi kʼi bye pe kanhama pe ɲabaa wɛ.
11 Ɲaha kʼa li pye nɛ ya ta xu na nu wu funŋɔ ni-i wɛ?
Ɲaha kʼa li pye nɛ ŋmɔgara ti ya ta yere
nɛ foroduun wu ni na nu wu funŋɔ ni-i wɛ?
12 Ɲaha na sipya dʼa ta na nɛ taha wu nugunyɔ na wɛ?
Ɲaha na nɛ dʼa jire ta na ŋmari wɛ?
13 Bani nimɛ bi da nɛ nizinnɛgɛ ta ɲaɲiŋɛ na na faŋa funŋɔ ni.
Nimɛ bi da na ta ŋmunumɔ na di na ŋmɔni
14 ni ɲiŋɛ ki ɲuŋɔfɛɛ pee ni ki sipyigbɔɔ pu ni,
pee piimu pʼa pu faya yari na yɛri ge.
15 Nɛ bi da bye ni saannaa ni sanni ɲɛ piimu mu ge,
piimu ya warifyɛn taga pu piyɛyɛ yi ɲi ge.
16 Kelee nɛ bi da bye kanna nɛ pye ɲa wɛ,
bani pu bi da nɛ ɲuŋɔ ŋmɔhɔ ba laa ɲɛ-ɛ lemu ya wowo se ge.
Nɛ bi da bye ba pya ɲɛ wɛ, wemu ma xhu
na ta wu ya ɲii taha pkɛɛngɛ na-ɛ ge.
17 «Sipyikuuŋɔ ya kakuuŋɔɔ ki ɲɔ yaha wà,
sipyii piimu pʼa kanha fanha bɛ di ɲɛ pu ni-i ge,
pee wa ŋmɔni wà.
18 Kasolemɛɛ pu bɛɛri wa wà ɲaɲiŋɛ na.
Pu ya pu ɲaavɔɔ wa shishiin mujuu nuri nige wɛ.
19 Sipyifɛnhɛfɛnhɛŋɛɛ ni sipyigbɔɔ bɛɛri pu ɲɛ wà nigin,
bulo ɲɛ wà nige wu kafɔɔ wu wo fanha ki nɔhɔ ni wɛ.
20 «Ɲaha na Kilɛ di kpɛɛngɛ yeege kanhama fɔɔ mu wɛ?
Ɲaha na funyaŋa fɛɛ di ɲɛ shi na wɛ?
21 Pee wa na xu sigee, wʼi da ga ba wɛ.
Pee wa xu shaa na toro naafuu bɛ tàan.*
22 Pee da bi faya ta,
lee bi da bye pee mu fundanga fo xuuni.
23 Sipya wemu kozhɛɛ lʼa ŋmɔhɔ wu na ge,
Kilɛ ya sipya wemu kuuri maha taforogo baa ge,
ɲaha na wee di ɲɛ shi na wɛ?
24 Bani shiinnɛ li ɲɛ nɛ wo yalige,
nɛ mɛkaaga ki wa na sɛrɛni na fòro ba lɔhɔ ɲɛ wɛ.
25 Kaa lemu ɲaha na nɛ bi fyagi ge, lee lʼa nɛ ta.
Kaa lemu lʼa bi nɛ funŋɔ pɛn ge, lee lʼa nɛ le.
26 Di wa ni ɲaɲiŋɛ ni wɛ, di wa ni ceeɲire ni wɛ,
di wa ni ŋmɔnɔ wɛ, ga fo ɲakpaan ni wu ɲakpaan.»