Elifazi wo jomɔ nizhiimɛ pe
4
Wee tuun wu ni a Tema shɛɛn Elifazi di jomɔ pu lɔ na Zhɔbu pye:2 «Wa bu jo wu jo ni ma ni, ta lee na waha ma na?
Ga sipya wekɛ wʼi da já wuyɛ co jo baa wɛ?
3 Li wii, mu ya sipyiɲɛhɛmɛɛ kalaa.
Piimu keye baraga kʼa xɔ ge, mu ya baraga le pee keye ni.
4 Sipya wemu bu guruŋɔ na gaaŋi zhɛ do,
mu jomɔ pu bi ma weefɔɔ círi.
Nugunyɔ yemu fanha kʼa bi xɔ ge,
mu bi fanha leni yee ni.
5 Ga nimɛ lʼa nɔ muyɛ pyaa ki na ge,
a mu yatɛnyɛ di dɛrɛ xu.
Lʼa nɔ muyɛ pyaa ki na nimɛ ge,
a ma xakili wu gyɛɛgi.
6 Ta mu wo Kilɛ ɲìi fyaara ti bi yaa na mu fungɔngɔ teŋɛ wɛ?
Ta mu wo tiimɛ pu bi yaa na pye mu mu tadaŋa wɛ?
7 Ma funŋɔ ki kɔn ma wii,
jaagi baa fɔɔ wekɛ mu dʼa ɲa wʼa kyɛɛgi wɛ?
Sipya wemu wʼa tii ge,
mii mu dʼa bɔɔngɔ ɲa kʼa nɔ wee wa na wɛ?
8 Nɛ kunni ya li ɲa jo
piimu pʼa tiibaara faa pyi, na kanhama nuri ge,
wee shinma we pee ya guun.
9 Kilɛ wo ɲɔ kafɛɛgɛ ki ma ba pu kyɛɛgi na pu xɔ.
Wu loyire li kafɛɛgɛ ki ma ba pu xɔ.
10 Cɛnri wo guuri we ni yacoŋɔ ki wo mɛkaaga kʼa xɔ,
cɛnripepinŋɛ ki wo ganhaa kʼa kɛgi kɛgi.
11 Xaara baara tʼa cɛnri xuli,
cɛnrizhɔ wu nagoo pu ma jaaga.
12 «Ŋmɔhɔrɔ jomɔ pa pʼa nɔ nɛ na,
nɛ ɲuwii lʼa pu kalɔhɔrɔ ti logo.
13 Tuun wemu ni piige ŋmunujeye ma sipya jaa yirige ge,
tuun wemu ni ŋmunugbɔ mʼa sipyii shan ge*,
14 wee tuun wu ni nɛ fya fo na fuguri,
fo nɛ yatɛnyɛ yi bɛɛri yʼa shɔ na jɛlɛ.
15 Kafɛɛgɛa ka ya pa doro nɛ ɲaha ki na,
a nɛ cere ti shiire ti bɛɛri di yìri yere.
16 Sipya wa ya pa yere nɛ ɲaha tàan,
ga nɛ já wu sɛɛri cɛ wɛ.
Womɔ pu bi yere yaha nɛ ɲaha gbaa na,
a nɛ mujuu nifɛnhɛfɛnhɛnɛ la logo na:
17 ‹Sipyiyawyii na já dii Kilɛ ɲaha tàan ya?
Sipyiyawyii na já bye fɛɛfɛɛ wu yaavɔɔ wu ɲaha tàan ya?
18 Ni Kilɛ di ya daa wu kapyebyii pu bɛ na wɛ,
ni Kilɛ di jaagi taa wu mɛlɛkɛɛ puyɛ pyaa bɛ na,
19 wee tuun wu ni sipya wu ɲɛ cogo ge,
sipya wʼa yàa ni puuro ni ge,
wee wemu pu ma fɔnhɔri ba fyɛngɛ ɲɛ-ɛ ge,
ta wee woyo ya yu wà?
20 Sipya ma dɔnhɔnɔ na pye myɛ ɲisɔɔgɔ ni yakoŋɔ tɛ ni.
Wʼa xhɔ laha wà fɛɛfɛɛ, ali sipya bɛ da bye li fiin wɛ.
21 Wu shi wu caya yi mɛɛrɛ tʼa kɔn,
a wʼi xhu fungɔngɔ fɛɛrɛ baa.› »