5
«Ayiwa, yire wá nimɛ! Ta wa na da wu ma ɲɔ shɔ?Fɛfɛɛrɛ wo wekɛ na mu wʼa da ma ɲaha tii wɛ?
2 «Loyire lʼa fungɔngɔ baa fɔɔ xuli,
ɲɛpɛnwaa di nahanaha xuli.
3 Nɛ fungɔngɔ baa fɔɔ ɲa la na faraa wu keŋɛ yara na
ba tige niyɛ ya juroo wɛ,
ga a nɛ wu tatɛɛngɛ ki laŋi lee taapile li ni.
4 ‹Wu nagoo ganha ba dɛgɛ wa shishiin taa wɛ.
Kiiri wʼa dun pu ɲuŋɔ ni,
sipya bɛ ganha bu da di pu ɲuŋɔ wolo wɛ.
5 Xuugo fɛɛ di da wu faapye shinma wu li,
ali wemu bɛ wu ɲɛ xhuyo tɛ ni ge, wu bɛ.
Piimu pu ɲɛ ni naafuu waga ni ge,
pee pu wu keŋɛ yaŋmuyɔ yi bɛɛri lɔ.›
6 «Bani bɔɔngɔ ya fòro puuro ni wɛ,
kanhama ya fin na fòro ɲiŋɛ ni wɛ.
7 Ga sipya wʼa seni bɔɔngɔ kaa na,
ba nasemuuro ma yìri na duri mɛ fugba we ni wɛ.
8 «Ga nɛ shi kaa li ge,
Kilɛ mu nɛ bi da na wo mɛyire li wá.
Kilɛ keŋɛ ni nɛ bi da na wo keree ki le.
9 Wee wʼa kakanhaŋaa pyi
kiimu ɲaha ya jɛni na daa wɛ ge.
Wʼa kagbɔhɔɔ pyi kiimu ya já tɔrɔ wɛ.
10 Wʼa zanha shaan ɲiŋɛ ki na,
na lɔhɔ leŋɛɛ kɛrɛyɛ yi ni.
11 Piimu pʼa tigi ge, wu ma pee yirige fo fugba we ni.
Piimu pu ɲɛ ni funyaŋa ni ge, na pee logoo ɲiŋɛɛ.
12 Wʼa shizhiinmɛ fɛɛ pu wo kaɲɔwuugoo ki kyɛɛgi,
keree kiimu nɔhɔ pu keye yi ma deŋɛ ge,
pʼa bye pu da se ta kee na wɛ.
13 Wʼa shizhiinmɛ fɛɛ pu coni ni puyɛ pyaa wo shizhiinmɛ pu ni,
na naŋmahara fɛɛ pu wo gbegemɛ pu kyɛɛgi.
14 Nibiige ma jé pu ɲahaya ni caŋa ni,
pu ma daala daala cafugo na ba piige ɲɛ wɛ.
15 Ga ŋmɔpara le lʼa fòro pu ɲɔyɔ yi ni ge,
Kilɛ ma funmɔ fɔɔ shuu lee na,
na wu wo fanhaɲɛhɛŋɛ fɔɔ keŋɛ ni.
16 Lee funŋɔ ni kanhama fɛɛ pu ma tadaŋa ta,
ga sipyikuuyo yi wo ɲɔyɔ yi ma dɔ.
17 «Kilɛ ya sipya wemu tiini ge, wee wʼa duba taa.
Ma ganha bu fanhara shan Se Bɛɛri Fɔɔ Kilɛ wu wo guu wu na wɛ.*
18 «Bani wee wʼa nɔɔgɔ kuun sipya na,
wee shiin wu wʼa kee nɔɔgɔ ki puu bɛ.
Wee wʼa yama waa sipya na,
wee ninumɔ keŋɛ kʼa sipya yama bɛ xuu.
19 Wu na ba ma wolo cɔnrɔmɔ ni
fo na nɔ pu tɛhɛɛ gbaara na.
Gbarashuun wuu li ni cɔnrɔmɔ pʼa da ma ta bɛ wɛ.
20 Xuugo bu jé, wu na ma shɔ xu na.
Kashɛn bu yìri, wu na ma shɔ kashɛn ŋmɔpara li na.
21 Wu na ba ma tanha sipyikuuyo wo ɲilee ki na,
bɔɔngɔ bɛ mɛhɛ nɔ, ma da ga fya wɛ.
22 Ma na ba zhɛhɛni bɔɔngɔ ni xuugo na,
ma da ba fyagi sige ki wo yacoyo ye na wɛ.
23 Bani kariɲɛɛgɛ na ba bye ma ni sige ki faakagereye yi tɛ ni.
Sige ki yacoyo yi bɛ na ba bye ni ma ni ɲaɲiŋɛ na.
24 Mayɛ pyaa ki na ba li cɛ na ɲaɲiŋɛ wa ma puga ki ni.
Ma ba shɛ ma yapɔrɔyɔ yi pɛrɛgi,
ma na yi ta na yaaga ya fɔ yi ni wɛ.
25 Ma na ba li cɛ na ma nagoo pu na ba ɲɛhɛ,
na ma tirige shɛɛn pu na ba ɲɛhɛ ba sige ɲà ki ɲɛ wɛ.
26 Ma na ba lɛ fo xuuni, na na xu
ba shinma ma lɛ mɛ pʼa wu kɔn pinnɛ wɛ.
27 «Ayiwa kaa lemu wèe ya sɛɛri na li cii co ge,
lee li wa le, mu shiin li di wa bɛ.
Mu wʼa yaa na ye logo, na yi koo ɲaari.»