Zhɔbu ya Elifazi ɲɔ shɔ
6
Ayiwa, a Zhɔbu di jo:2 «Ee! Nɛ kanhama pu da bi da já peze!
Nɛ wo bɔɔngɔ ki da binnɛ na ki taha kilo na!
3 Ki bi da dugo ali suumɔ lɔhɔ ɲɔ gbazhɛnhɛ na.
Lee lʼa na jomɔ pu pye pʼa ɲɛhɛ.
4 Bani Se Bɛɛri Fɔɔ Kilɛ wo ŋmaya yʼa nɛ su.
Na munaa li wa na yi sɔɔnrɔ ti gbuu.
Kilɛ wo fyaara kagbɔhɔɔ kʼa gbegele nɛ fɛni.
5 «Sige kafaŋa na já da mɛɛ suu xuugo na
ɲapurege di ɲɛ ki tàan ya?
Nù na já da mɛɛ suu na wu yaha wu yaliire tàan ya?
6 Yalige kemu ki ɲɛ tipoomɔ baa ge,
kee na já lii suumɔ baa ya?
Ta tipoomɔ ya daa xhucɛrɛ tafige ni?
7 Nɛ la bye di gbɔn bɛ yaaga kemu na-ɛ ge,
kee kʼa pye nɛ yalige, ali ki mɛhɛ bi pɛn bɛ nɛ mu.
8 «Ee! Lemu nɛ ɲɛɛri ge, nɛ da bi da lee ta!
Kaa lemu wo la ki wa nɛ na fo xuuni ge,
Kilɛ da bi sɔɔ na lee kan nɛ mu!
9 Kilɛ wu sɔɔ wu nɛ tɔnhɔnɔ,
wu wu keŋɛ ki yeege wu nasama keree xɔ!
10 Na luu li bi da ganha ɲiŋɛ,
di ma ganha na sirani fundanga keŋɛ ni,
na kanhama tɛhɛnɛ baa wo pu ni.
Bani nɛ ta Fɛfɛɛrɛ wo wu saliya
ɲɔmɛɛ la shishiin kyɛɛgi wɛ.
11 Fanha kekɛ ki wa na ni di já da Kilɛ ɲaha wii wɛ?
Shi wekɛ wu wa na mu sanha di da luu gbo wɛ?
12 Nɛ wo fanha ke, ta faaga wogo ki ɲɛ kii?
Nɛ ceepuuro te, ta daɲaa tɔɔrɔ ti ɲɛ tii?
13 Ta tɛgɛvɔɔ wa nɛ na sanha?
Taforogo ka shishiin wa nige na mu wɛ?
14 «Tɔɔri ɲɛ sipya wemu na ge,
wee ɲiɲaara ya yaa na jé wu naɲiinɛɛ ni.
Ali wu mɛhɛ bu da
wʼa Se Bɛɛri Fɔɔ Kilɛ wo ɲìi fyaara ti koo yaha.
15 Ga nɛ cebooloo pʼa nɛ nɔhɔ yaha
ba dugoro lɔhɔ ɲɛ wɛ, ba dugoro ɲɛ wɛ, lemu lʼa waha ge.
16 Ba wiire tʼa ɲɔ kɔn na xhuu wɛ,
gilasi we ni nɛzhi wu ma ɲa na pye loduruduruyo na li ɲi.
17 Ga ba kpanga ya foro wɛ, lɔhɔ ki na xhuuŋɔ.
Ba kafuyo yʼa jé wɛ, li lɔhɔ ki ma xhɔ.
18 Wee tuun wu ni ɲɔhɔyɔ fɛɛ piimu pʼa doroo
siwaga ki ni ge, pee na pu kozhɛɛ li yaha,
na jaaga siwaga ki ni, na biin, na xhu wà.
19 Tema fiige ki ɲɔhɔyɔ ɲaarivɛɛ
pu ma ɲuyɔ yirige na kee lɔhɔ ki shaa.
Saba fiige ki jagipyii pu ma daa kee lɔhɔ ki na.
20 Ga pu tadaŋa kʼa pu shiige,
bani ba pʼa nɔ lee dugoro li na wɛ, a daajeŋɛ di jé pu ni:
21 «Ayiwa mu yee ya pye nimɛ nɛ mu.
Bɔɔngɔ kemu kʼa nɔ nɛ na ge, ba yee ya kee ɲa wɛ, na fya.
22 Ta nɛ sanha yi pye jo yi yaaga ka kan na mu?
Ta nɛ sanha yi pye jo yi lɔ yi keŋɛ naafuu ni
yi kan na ɲuŋɔ tàan?
23 Ta nɛ yi pye yi na shɔ na pɛɛn na?
Ta nɛ yi pye yi na shɔ sipyigagaŋa na?
24 Yi na ɲaha to, nɛ na jari nayɛ na.
Yi na wo piinŋɛ ki shɛ na na.
25 Jomɔ pemu ɲɛ can ge, baraga wa pee ni.
Ga jomɔ pemu yee wa daga na nɛ jaagi ge,
pee na ɲaha ɲɔ nɛ na wɛ?
26 Na jomɔ pu wuu na yʼa giin yi na jaagi,
yʼi tadaŋa baa fɔɔ jomɔ pu yaha ba kafɛɛgɛ ɲɛ-ɛ gɛ?
27 Yee na zɔɔ na do ali cirimɛ bɛ na.
Yee na zɔɔ na yi naɲii pɛrɛ.
28 «Ayiwa nimɛ yi na wii na ɲaha niŋɛ ni!
Ta nɛ na zɔɔ di kafinɛyɛ jo yi mu?
29 Nʼa yi ɲɛɛri yi kuri kadugo,
yi ganha ba tiibaara pyi wɛ.
Oo dɛ, yi kuri kadugo koyi,
yʼi li cɛ na tigire wa nɛ na wɛ.
30 Ta tiibaara jomɔ pa pu wa na ɲɔ ni?
Ta nɛ ɲɔ ki ya joguumɔ cɛ shɔɔnri-i ya?