Zhɔbu ya wu wo yama pu kaa jo Kilɛ mu
7
A Zhɔbu di jo sanha na:«Sipyiyawyii ya li wo ɲiifɛɛrɛ ti bɛɛri pyi
ɲiŋɛ ke na ba kashɛnŋmɔ ɲɛ wɛ.
Wu shi wu caŋa ɲɛhɛɛ ki bɛɛri ɲɛ
ba kapyebye wogoo ɲɛ wɛ.
2 Ba bulona ma ɲimɛ sige kanha pʼi digi nɔ wu na wɛ.
Ba kapyebye ma wu saraa ɲaha wii mɛ wɛ,
3 mu na nɛ wo taa li ɲɛ kanhama yeye.
Kanhama pʼa pɔri yaha nɛ ɲaha na
piiye niɲɛhɛyɛ funŋɔ ni.
4 Nɛ bu sinnɛ, nɛ ma jo:
‹Tuun wekɛ ni nɛ da ba yìri wɛ?
Tuun wekɛ ni piige kʼi da ba xhɔ wɛ?›
Nɛ ma ganha na ɲɛri na dun
fo na shɛ ɲiga mugi.
5 Nɛ cere ti bɛɛri ti ɲɛ fyɛɛnrɛ ni woriyoa.
Nɛ ceesɛɛgɛ ki ma shɛɛngi shɛɛngi, na fiinmɛ le.
6 Nɛ shi wu caŋa ɲɛhɛɛ kʼa doroo tɔvuyo na
ba gbee kuku ɲɛ wɛ. Na shi wʼa xɔ tadaŋa baa.
7 «Ee Kilɛ, ma funŋɔ yaha nidogo na nɛ shi wu ɲɛ ɲɔkafɛɛgɛ yɛ.
Nɛ ɲii wa da ɲaɲiŋɛ ɲa nige bada wɛ.
8 Ɲii lemu li wa nɛ ɲaa nimɛ ge,
lee wa da ba na ɲa nige wɛ.
Ma na ba nɛ shaa ɲama,
ga nɛ da ba bye wà nige wɛ.
9 Ba ɲahaŋa ma doro na biin mɛ wɛ,
sipya wemu bɛ bu gari yaŋa kanha na,
weefɔɔ bɛ da guri nige wɛ.
10 Wufɔɔ wʼa da guri di ba nige wu puga wɛ.
Wu tatiinlɛgɛ ki bɛ da ga wu cɛ nige wɛ.
11 «Lee lʼa nɛ pye nɛ da ga gori jobaa wɛ.
Nɛ na ba jo na munaa li wo kanhama pu shizhaa na.
Na funyaŋa wo wʼa da ba na wo yama pu kaa jo.
12 Suumɔ lɔhɔ di ɲɛ laa,
ta suumɔ lɔhɔ funŋɔ yakanhaŋab di ɲɛ,
fo mu wu na kasɛɛgɛ pyevɛɛ yaha pu nɛ kuuri ya?
13 Nɛ ma yu jo: «Nɛ bu sinnɛ,
kajaŋa ki na loɲinɛ kan nɛ mu,
nɛ tasinnɛgɛ ki na ba la wolo na kanhama pu ni.»
14 Ga nɛ bu sinnɛ, mʼa dɛrɛɛ na na fyagi
ni ŋmunɔyɔ niguuyo ni.
Kashɛgɛɛ kiimu nɛ da da ɲaa ge, kee ma nɛ jaa wu yirige.
15 Ma na geŋmajonɔ li fɛri, na na gbo,
nɛ wa lee fɛni na toro nɛ wu xɔ di zhɛ yaha na kaciiye yɛ na.
16 Ɲiifɛɛrɛ ti la kʼa wolo na na!
Nʼa da ba gori yaha ɲìi na gbee wɛ.
Na yaha wà mɛ, bani nɛ munaa li ɲɛ ba ɲɔ kafɛɛgɛ ɲɛ wɛ.
17 «Sipya ɲɛ ɲaha fo mu wʼa ma funŋɔ shaa ni wu kaa ni wɛ,
fo mu wʼa wu kasɛɛgɛ pyi wɛ?
18 Fo mu wu kasɛɛgɛ yaha wu na ɲisɔɔgɔ bɛɛri,
ma da wu nɔhɔ wo tuun bɛɛri ni wɛ?
19 Tuun wekɛ ni mu di da ba ma ɲaha ki wolo nɛ ni wɛ?
Tuun wekɛ ni mu di da ba tɛɛ kan nɛ mu
nɛ bɛ di ɲɔlɔhɔ jɔ wɛ?
20 Sipyii kasɛɛgɛ pyevɔɔ, nɛ bu da nɛ jurumu pye,
wee di ɲɛ jurumu wekɛ wɛ?
Ɲaha na mʼa na peele na na ŋmuu ni ma ŋmaya yi ni wɛ?
Ta nʼa ɲɛri ma mu tuguro?
21 Ɲaha na mu di da já nɛ wo jurumu wu yafa nɛ mu,
mʼa nɛ wo tiibaara ti bɛɛri jɔgɔ laha wa-ɛ wɛ?
Bani nɛ wʼa gaaŋi nimɛ di zhɛ sinnɛ ɲiŋɛ puuro ti ni.
Ma na ba na shaa, ga nɛ wa da ba ɲa wɛ.»