Bilidadi wo jomɔ nizhiimɛ pe
8
Ayiwa, Bilidadi wemu wʼa yìri Shuwa ni ge, a wee di Zhɔbu pye:2 «Ɲaha tuun ni mu di da ba pe jomɔ pe tuugo jo ɲɔ yaha wɛ?
Mu jomɔ pu ɲɛ ba kafɛɛgbɔhɔ ɲɛ wɛ.
3 Ta Kilɛ ya tiimɛ ɲɛri na zhaan?
Ta Se Bɛɛri Fɔɔ ya can ɲɛri na zhaan?
4 Ma nagoo pu bu shɛ da pʼa jurumu pye Kilɛ na,
wee wo footɔnɔ Kilɛ ya kan pu mu.
5 «Mu wi ge, mu bu Kilɛ sha,
mu bu Se Bɛɛri Fɔɔ wu kemɛ ɲɛɛri,
6 ma bu da mʼa fiinŋɛ, na dii,
Kilɛ na ba kasɛɛgɛ yaha ma na.
Ma puga kʼa yaa ni lemu ni ma wo tiimɛ pu funŋɔ ni ge,
wu na ba lee kan ma mu.
7 Yahama pemu ni ma bye taashiinɛ li ni ge,
pee na ba jɛrɛ ma ɲaha tàan.
Bani Kilɛ na ba lemu pye ma mu ge,
lee na ba bɛlɛ fo xuuni.
8 «Taashiinɛ li wo sipyii pu yege wii,
pu sefɛɛ pʼa keree kiimu taanni cɛ ge,
ma funŋɔ yaha kee na.
9 Bani taɲaa yɛ wèe ya se, wèe ya yaaga cɛ wɛ.
Wèe shi wu caŋa ɲɛhɛɛ kʼa doroo tɔvuyo
na ɲiŋɛ ke na ba tige ɲimɛ ɲɛ wɛ.
10 Ga taashiinɛ li wo sipyii pu na ba ma kalaa,
pu na ba jo ni ma ni.
Pu na ba pu zɔlɔɔ pu mugi ma mu, na jo ni ma ni.
11 Ta buugo ya fin xuu wa ni dugo ɲɔ kadugo na?
Ta faɲa na já lɛ lɔhɔ baa?
12 Lɔhɔ bu ki xuuŋɔ, ki na waha tɔvuyo na
ɲà kisaŋa bɛɛri ɲaha na, na ta wa sanha ki kɔn wɛ.
13 «Sipyii piimu pʼa funŋɔ wuu Kilɛ na ge, mu pee ɲɛ.
Kilɛ ɲìi fyaara baa fɔɔ wo tadaŋa ki na ba gyɛɛgi.
14 Lemu na wʼa keŋɛ kuri ge, lee na ba gyɛɛgi.
Lemu na wʼa daa ge, lee na ba bye ba bolovaan ɲɛ wɛ.
15 Wu bu wuyɛ tiiŋɛ wu puga na,
kee na jɛlɛ. Wu bu suri ki ni, kʼa da li já wɛ.
16 «Wu ɲɛ ba tige ɲɛ wɛ,
wɛrɛ ɲɛ kemu na kʼi lɛgi caŋa na ge.
Ki geye yi ma naxhoo wu bɛɛri tɔ.
17 Ki niyɛ yi ma migile yiyɛ ni,
na juri juri faakagereye yi tɛ ni,
na juri kari fo faaya yi nɔhɔdaan.
18 Ga pu ga ki kɔɔngi laha wee xuu wu ni,
wee xuu wu na jo: «Nɛ sanha mu ɲa ɲa bada wɛ.»
19 Piimu pʼa funŋɔ wɔ Kilɛ na ge,
pee wo xɔgana li wa lere.
Tige katii na fin ki tɛgɛ wee xuu wu ninumɔ ni.
20 «Ayiwa, sipya wemu wʼa tii ge, Kilɛ kunni ya ma wáa wɛ,
wu di ya kakuubye bɛ tɛri wɛ.
21 Wu na ba ma ɲɔ ki ɲi kataanra na caŋa ka,
na masɔŋɔ yoyo le ma ɲɔ ni.
22 Piimu ya ma kɔ ge, pee wo fatɔŋɔ na ba bye shiige.
Sipyikuuyo wo piyɛyɛ yi na ba gyɛɛgi fɛɛfɛɛ.»