Zhɔbu ya Bilidadi ɲɔ shɔ
9
Ayiwa, a Zhɔbu di Bilidadi pye:2 «Can na nɛ li cɛ jo ba mʼa yi jo wɛ, mu lʼa byi.
Ga dii sipya di da já kaɲii ta Kilɛ ɲaha tàan wɛ?
3 Ma bu jo mʼa nakaara suri ni Kilɛ ni,
Kilɛ na já yegeye kabɔfonɔ nigin pye,
sipya dʼa já ali ki nigin bɛ ɲɔ shɔ wɛ.
4 Kilɛ wo fungɔngɔ fɛɛrɛ tʼa sii pɛlɛ,
wu sefɛɛrɛ ti bɛ dʼa pɛlɛ fo xuuni.
Jɔgɔ wu da já zhaanra le ni wu ni
mʼa gori lee wo tɔɔri tabaa wɛ?
5 «Wʼa faaboboyo lɛri yi tatɛɛngɛ ni yiyɛ kategee,
wu luu bu yìri, wʼa yi ɲɛri buri.
6 Ma ɲiŋɛ ki yaha ki tasinŋɛ ni, na ki pye kʼa cɛlɛ,
na ki benɛɛ pu ɲahara.
7 Wu ma caŋa pye na ki ganha bu foro wɛ,
kʼa gori foro baa.
Wu ma wɔrɔɔ ki tɔ, ki kpɛɛngɛ dʼa voro wɛ.
8 «Wu yɛ nigin wʼa fugba wu pii,
na ɲaari suumɔ lokuruyo yi ɲuŋɔ ni.
9 Wee wʼa wɔrɔɔ kii tuuyo ye bɛɛri yàa:
Urusi ni Oriyɔn ni Pileyadi,
ni woroo kulo kacɛ ki wo wɔrɔɔ keea.
10 Wʼa kagbɔhɔɔ pyi kiimu ya toro sipya fungɔngɔ fɛɛrɛ tàan ge,
na kakanhaŋaa pyi kiimu ɲɔ ya jɛni wɛ.
11 «Li wii, wu na já doro nɛ tàan nɛ da wu ɲa wɛ.
Wu na já laha nɛ tàan, na gari nɛ da voro kaa fiin wɛ.
12 Wu bu yaaga ka co, jɔgɔ wu da já ki shɔ wu na wɛ?
Jɔgɔ wu da já wu pye: «Ɲaha mʼa byi mɛ wɛ?»
13 Kilɛ ya wu wo loyire li yereŋɛ wɛ.
Suumɔ lɔhɔ ki yakanhaŋab niguuŋɔ kemu ki ɲɛ Araxavu ge,
kee ni ki wɔɲii pu bɛɛri ma nuguro sin wu fɛɛ ni.
14 «Wee tuun wu ni nɛ ma já wu ɲɔ shɔ dii wɛ?
Nɛ ma jomɔ ta mii da surulo ni wu ni wɛ?
15 Ali nɛ mɛhɛ bi tii bɛ, nɛ wʼa da já wu ɲɔ shɔ wɛ.
Nɛ kunni na já wu ɲɛɛri yɛ,
bani wee wu wa nɛ wo kiiri wu kɔnvɔɔ.
16 Nɛ bu wu yiri, wu mɛhɛ nɛ ɲɔ shɔ bɛ,
nɛ da dà li na jo wu na zɔɔ wu ɲuwegee shan ni nɛ jomɔ pu ni wɛ.
17 Wʼa kafɛɛgbɔhɔ taga na tɔnhɔnɔ,
na na tabanaya yi ɲɛhɛ na ta di ya la toro wɛ.
18 Wu ya na yari di da na ŋmɔgara ti taa wɛ,
na kasoroyo taga na na tinni.
19 «Di bu li pye fanha kaa, go wee wu ɲɛ sefɔɔ we.
Di bu li pye kiiri,
jɔgɔ di da ba shɛ jomɔ pu kan nɛ mu kɔnhɔ nɛ na fiin jo wɛ?
20 Ali nɛ mɛhɛ bi tii bɛ, na ɲɔ ki na ba na jaagi.
Nɛ tanga mɛhɛ bi ɲɛ bɛ, na ɲɔ ki na ba na nahana.
21 Ta nɛ zɔ wʼa fiinŋɛ?
Nɛyɛ pyaa ki ya lee cɛ nige wɛ.
Nɛ ɲiifɛɛrɛ ti la kʼa wolo nɛ na.
22 Yi bɛɛri yi ɲɛ nigin nɛ mu. Lee wuu na nɛ jo:
«Kilɛ ya sipyitiimɛ ni sipyitiibaaga bɛɛri kyɛɛgi.»
23 Kakuunɔ la bu gɔn to sipyii ɲuŋɔ ni, na gbo,
kee bɔɔngɔ kemu ki ma sipyiitiimɛɛ pu ta ge,
Kilɛ ma ganha na zhɛhɛni pu na.
24 Fiige fanha bu gan sipyikuuŋɔ mu,
Kilɛ ma kiirikɔɔn pu ɲaha pɔ.
Ni Kilɛ bɛ wɛ, jɔgɔ wu da lee pye wɛ?
25 «Nɛ shi wu caŋa ɲɛhɛɛ ki tɔrɔ lʼa wɛri toro tafɛbaama bɛ na.
Kʼa fe na doroo ɲaɲiŋɛ ɲabaa.
26 Kʼa doroo tɔvuyo na ba lɔhɔ ɲuŋɔ kɔrɔ ɲɛ wɛ,
lemu lʼa taŋi ge,
ba ɲaa ma diri mɛ yaaga fɛni di joo wɛ.
27 «Nɛ bu nayɛ pye:
«Nʼa da na funŋɔ wɔ na kanhama pu na.
Nʼa da ɲatanhaŋa ki yaha, di funŋɔ taan».
28 Nɛ ma ganha na fyagi wee tuun wu ni
na kanhama pu keree ki bɛɛri ɲaha na.
Bani nɛ li cɛ jo mu wa da ba kaɲii kan nɛ mu wɛ.
29 Oo dɛ, nɛ na ba jaagi!
Ɲaha na di da da nayɛ kana tawaga ni wɛ?
30 Ali nɛ mɛhɛ bu wuu bɛ ni loceŋɛ ni,
nɛ mɛhɛ bu jege bɛ taga na keye yi je,
31 lee bɛ na mu na ba nɛ curi ɲɔrɔyɔ ni,
fo na na fàya yi bɛ pye yi na na tanha.
32 «Kilɛ ya ta pye sipyiyawyii ba nɛ ɲɛ wɛ.
Nɛ da já wu ɲɔ shɔ, di wu yiri fanha mu wɛ.
33 Susurodɛgɛmɛ da bi ɲɛ wèe tɛ ni,
wu wu keye yi taha wèe bɛshuun wu na!
34 Kɔnhɔ Kilɛ di wu pubiin li laha na na,
wu fyaara kagbɔhɔɔ ki ganha ba na jaa wu yirige nige wɛ.
35 Wee tuun wu ni, nɛ na já jo ni wu ni fyaara baa.
Ga ni lʼi wa mu wɛ, nʼa kori na yɛ ni na yɛ.