Nɛ ya se kɔnhɔ di ba gyɛɛgi yɛ
10
«Nɛ ɲiifɛɛrɛ tʼa na sanri.Lemu bɛɛri li wa na na ge, nʼa da li bɛɛri jo yeege kpɛɛngɛ na.
Na funyaŋa wo wʼa da ba jo.
2 Nɛ na ba Kilɛ pye: Ma ganha bu na jaagi wɛ.
Lemu na mʼa na jaagi ge, lee jo na mu.
3 Ta ma na zɔɔ ma na kanha,
mʼa ma keŋɛ labye wu laha mayɛ ɲaha tàan,
mʼa baraga le sipyikuuŋɔ wo keŋɛ labye wu ni ya?
4 Ta sipyiyawyii wo ɲìi ki ɲɛ mu mu?
Ta sipyii wo wiigana na mu bɛ wʼa keree wii?
5 Ta ma shi wu caŋa ɲɛhɛɛ ki ɲɛ ba sipyiyawyii wogoo ɲɛ wɛ?
Ta ma shi wu yee ki ɲɛ ba sipya wogoo ɲɛ wɛ?
6 Ɲaha na mʼa na tiibaara ti shaa di jɛ wɛ?
Ɲaha na mʼa nɛ wo jurumu wu suguri wɛ.
7 Na ta mu dʼa li cɛ bɛ na jaagi wa shishiin wa nɛ na wɛ,
sipya bɛ di wa da já nɛ shɔ mu na wɛ.
8 «Muyɛ pyaa keye yʼa nɛ faanri, na nɛ bɛ nibomɔ wu yàa!
Ga mu di nɛ shaa di gyɛɛgi nimɛ.
9 Nʼa ma ɲɛɛri ma funŋɔ yaha li na
na mu ya nɛ faanri ba cogo ɲɛ wɛ.
Ta mʼa giin mʼa na kuruŋɔ le sanha puuro ti ni?
10 Mu ya nɛ fiinni ba pʼa nujirimɛ fiinni wɛ,
na nɛ ŋmunɔ ba pʼa nulɛɛ ŋmunɔɔ wɛ.
11 Mu wʼa ceesɛɛgɛ ni ceexaara taha nɛ na,
na nɛ sogi sogi nayɛ na ni kavaan ni kaciiye ni.
12 Mʼa ɲiifɛɛrɛ kan na mu, na ma saama pu shɛ na na,
na kasɛɛgɛ yaha na munaa li na.
13 «Ga kaŋmɔhɔnɔ lemu li bye mu zɔ wu ni ge,
lee li wa le. Nɛ li cɛ jo le li bye mu funŋɔ ni:
14 Di ba jurumu pye, mʼa ba na fo,
wee jurumu we di yaha wà na ɲuŋɔ ni
wu ganha bu yafa na mu wɛ.
15 Nɛ bi ta nɛ jaagi, bɔɔngɔ ki wa nɛ wogo.
Ali nɛ mɛhɛ bi ɲɛ jaagi baa,
nɛ da já na ɲuŋɔ yirige fugba ni wɛ.
Nɛ bɛɛri wʼa ɲi shiige na,
na kanhama pu bɛ dʼa pɛlɛ toro.
16 Nɛ mɛhɛ na ɲuŋɔ ki yirige, ma na na niinɛ ba cɛnri ɲɛ wɛ,
ma na ma sefɛɛrɛ nigbɔɔrɔ ti fanha ki digi na na.
17 Sɛɛrɛɛ piitiilee bɛ mu ya yirige nɛ fɛni,
a la di fara ma loyire li na nɛ fɛni.
Ma kashɛn keye yi wa na yiyɛ fari nɛ fɛni.
18 «Ɲaha na ma dʼa na nu wu yaha wʼa na se wɛ?
Nɛ da bi da wà na xhu, ɲii la shishiin bi da daha na na wɛ.
19 Nɛ bi da bye kanna nɛ pye ɲa bɛ wɛ.
Nɛ nixhugo pu bi da ze, na dii ni na ni faya na.
20 Nɛ shi wu caya yʼa cɛrɛ nimɛ.
Nasama yaha wà, mʼa laha na tàan,
kɔnhɔ na bɛ di fundanga nifɛnhɛnɛ ta,
21 sani di ba shɛ nibiigbɔhɔ ni xu ɲimɛ pu wo fiige ki ni ge.
Wa ya se wà mʼa guri pa wɛ.
22 Nibiicogoŋɔ wo fiige ki ɲɛ kii,
xu ɲimɛ nibigbɔhɔ ki ɲɛ wà ni kawuriye.
Wee xuu wu kpɛɛngɛ ki ɲɛ ba piige wo nibiige ki ɲɛ wɛ!»