Zofaari wo jomɔ pe
11
Ayiwa, Zofaari wemu wʼa yìri Nama ni ge, a wee di jo:2 «Ɲɔshɔɔrɔ da da pe jomɔ pe bɛɛri na-ɛ ya?
Ma ɲɔ bu daan, lee na ma pye kaɲii fɔɔ ya?
3 Mu wo ɲɔtanga jomɔ pu na já sipyii pu pye pu co puyɛ na ya?
Mu na da sipyii pu la wo, wa ganha bu ma fanha bɛ-ɛ ya?
4 Mu ya jo bɛ na: ‹Nɛ jomɔ pu bɛɛri pu ɲɛ can.
Jaagi wa shishiin ɲɛ nɛ na mu Kilɛ ɲaha tàan wɛ?›
5 «Ee! Kilɛ da bi da zɔɔ di wu ɲɔ ki mugi,
wu jo, wu ma ɲɔ shɔ,
6 wu wu fungɔngɔ fɛɛrɛ ti ŋmɔhɔrɔ ti shɛ ma na,
tee ŋmɔhɔrɔ temu tʼa toro
sipyiyawyii wo fungɔngɔ fɛɛrɛ tàan ge.
Lee na mu bi da li cɛ na Kilɛ ya ta ma kanha
na saha ni ma tiibaara ti bɛɛri ni wɛ.
7 «Ta mu na já Kilɛ wo ŋmɔhɔrɔ ti jogi wu ɲuŋɔkana sha jɛ?
Ta mu na já Se Bɛɛri Fɔɔ Kilɛ wo keree ki ɲaha sha
fo na nɔ ki tɛhɛnɛ na ya?
8 Wu fungɔngɔ fɛɛrɛ tʼa lii fugba lii lii wu na.
Ɲaha mu di da já bye wɛ?
Tʼa cogi ye yaŋa kanha na.
Lekɛ mu di da jɛ lee ni wɛ?
9 Tʼa tɔnnɔ ye ɲiŋɛ ki na,
ti kadaa lʼa pɛlɛ ye suumɔ lɔhɔ ki na.
10 «Kilɛ bu jaagi fɔɔ co, wu bu wu le kaso ni,
wu bu wu yiri kiiri na,
jɔgɔ wu da já wu ɲaha kɔn lee na wɛ?
11 Bani wʼa java fɛɛ pu cɛ.
Wʼa tiibaara ɲaa na ta wu ya wuyɛ kanha bɛ wɛ.
12 Ga nahanaha da ga já ɲɛri fungɔngɔ fɔɔ wɛ,
fo sige kafabige ga se sipyiyawyii.a
13 «Mu wi ge, ma bu ma zɔ wu ɲɛri tii Kilɛ na,
ma bu ma keye yi yirige wu fɛni,
14 ma bu ma keŋɛ wolo kakuuŋɔɔ ni,
na tiibaara she ma puga,
15 wee tuun wu ni ma na ba ma ɲuŋɔ ki yirige jaagi baa.
Ma na ba lowaa ta, fyaara da ba bye ma ni wɛ.
16 Ma funŋɔ na ba wɔ ma ɲaa wu na.
Ma na ba ma funŋɔ kɔɔn ni wu kaa ni ba lofɔdorogo ɲɛ wɛ.
17 Ma shi wu caŋa ɲɛhɛɛ ki na ba ɲí na toro cafugo caŋa tàan.
Piige ki na ba ɲí ba ɲisɔɔgɔ kpɛɛngɛ ɲɛ wɛ.
18 Ma na ba bye danavɔɔ
bani tadaŋa na ba bye ma mu.
Ma na ba wii na mayɛ maha,
ma ɲaɲiŋɛ wo na ba sinnɛ.
19 Ma ba sinnɛ sipya wa shishiin wa da ma kanha wɛ.
Shɛnɲɛhɛmɛɛ na ba dɛgɛ shaa ma mu.
20 Ga nibiige na ba jé sipyikuuyo yi wo ɲìi ki ni.
Pu da ba taŋmɔhɔŋɔ ta wɛ, pu tadaŋa na ba bye xu.»