Zhɔbu wo ɲɔshɔɔrɔ te
12
A Zhɔbu di jomɔ pu lɔ na jo:2 «Can na yee ya keree bɛɛri cɛ!
Wee tuun wu ni yee ga xhu,
fungɔngɔ fɛɛrɛ ti bɛ tʼa xu!
3 Ga fungɔngɔ fɛɛrɛ wa nɛ bɛ mu ba yee ɲɛ wɛ.
Nɛ ni yee ni, wa ya pɔrɔ wa na wɛ.
Sipya wekɛ wu ɲɛ kii keree kii bɛɛri cɛbaa wɛ?
4 «Nɛ ɲɛri na naɲiinɛɛ pu mu yashɛhɛŋɛ.
Nɛ wemu wʼa Kilɛ ɲɛɛri kɔnhɔ wu na ɲɔ shɔ ge.
Nɛ wemu wu ɲɛ sipya wemu wʼa tii wu zɔ wu bɛ dʼa ɲɔ ge,
nɛ ɲɛri pu mu yashɛhɛŋɛ.
5 Sipyii piimu ɲaha kʼa ɲiŋɛ ge,
pee wa giin na fanhara ti ɲɛ kanhama fɔɔ wuuro.
Piimu bu guruŋɔ to, pʼa ganha na peefɛɛ fanri.
6 Ɲaɲiŋɛ dʼa tiin sipyikuuyo wo piyɛyɛ yi ni.
Sipyii piimu pʼa Kilɛ fanri ge,
piimu pʼa puyɛ pyaa wo fanha ki pye pu kilɛɛ ge,
pee ɲahaya wa ɲiŋɛ.
7 «Ga yatɔɔyɔ yi yege wii, yee na ma kalaa,
kelee fugba shazhɛɛrɛ te, tee na ba ya jo ma mu.
8 Jo ni ɲiŋɛ ki ni, kee na ba ma kalaa,
suumɔ lɔhɔ funŋɔ fyaa pu na ba ya jo ma mu.
9 Ye bɛɛri ni, nigin wekɛ wu ɲɛ wà
wu ya li cɛ na Tɛhɛnɛ Baa Kilɛ wo
keŋɛ kʼa ye bɛɛri yàa-i wɛ?
10 Ɲìi yaŋmuyɔ ye bɛɛri wo munahaa ki wa wu keŋɛ ni.
Sipyiyawyii bɛ wo ŋmɔgara ti wa wu keŋɛ ni.
11 «Go ɲuwii lʼa jomɔ shɔɔnri na wo puyɛ ni,
ba ɲile ya yaligee tipoomɔ cɛni na zhɔɔnri wɛ.
12 Sipyilɛyɛ mu fungɔngɔ fɛɛrɛ ya daa.
Wemu wʼa ɲɛmɔnɔ ta ge, wee mu kaɲahacɛnɛ ya daa.
13 Ga Kilɛ wuuro ti ɲɛ fungɔngɔ fɛɛrɛ ni se fɛɛrɛ.
Wee wu ɲɛ ni yɛrɛ le ni kaɲahacɛnɛ li ni.
14 «Wee bu lemu kyɛɛgi sipya wa shishiin da já lee yàa wɛ.
Wu bu sipya wemu tɔ, wa shishiin da já weefɔɔ mugi wɛ.
15 Wu bu lɔhɔyɔ yi bɛɛri yereŋɛ, yaŋmuyɔ yi bɛɛri na waha.
Wu bu lɔhɔyɔ yi koo yaha, lɔhɔ na ɲiŋɛ ki kyɛɛgi.
16 Se fɛɛrɛ ni fungɔngɔ fɛɛrɛ ti ɲɛ wu wuuro.
Sipyipɛɛngɛ ni wemu wʼa sipyii piinŋɛ ge,
pee bɛɛri ɲɛ wu wuu.
17 Wu ma fiiye yi wo yɛrɛ kanvɛɛ pu pye pu na ɲaari ɲidamyɛ na,
na kiirikɔɔn pu pye fungɔnyɔ baa fɛɛ.
18 Wu ma saannaa pu wo kiriye yi sanha pu na,
na pu pɔ ni mɛɛrɛ ni.
19 Wu ma saraya ɲaha shɔɔnrivɛɛ
pu yaha ɲidamyɛ ɲara na,
na fanhafɛɛ pu wo fanha ki ɲɛri buri.
20 Piimu pʼa jomɔ cɛ ge, wu ma jomɔ kɔ pee ɲɔ na,
na nɔhɔlɛɛ pu wo fungɔngɔ fɛɛrɛ ti shɔ pu na.
21 Wʼa fanhara nɔni mɛgbɔhɔ fɛɛ na,
na sipyigagaya yi wo yapɔɔrɔ ti kɔɔn.
22 Wʼa womɔ pu wo kaŋmɔhɔŋɔɔ ki bɛɛri yeege kpɛɛngɛ na,
na xu nibiige yeege kpɛɛngɛ na.
23 Wu ma shi wa pye wʼa fanha ta, na ba wu bɛɛri kyɛɛgi.
Wu ma shi wa pii, na ba wu pinnɛ.
24 Wu ma koŋɔ ki wo fiiye yi ɲuŋɔfɛɛ
pu wo fungɔngɔ fɛɛrɛ ti shɔ pu na,
na pu yaha pu na ɲaari na yeree siwaga ki ni koo baa.
25 Pʼa ganha na daala daala nibiige ki ni kpɛɛngɛ baa.
Kilɛ ma pu pye pu na jinŋijanŋa ba singba ɲɛ wɛ.