Zhɔbu funŋɔ wa wu jo ni Kilɛ ni
13
«Ayiwa nɛ ɲii lʼa kii keree kii bɛɛri ɲa.A na ɲuwii lʼi ki logo, na ki ɲaha cɛ.
2 Lemu bɛɛri yee wa cɛ ge, lee nɛ bɛ wa cɛ.
Nɛ ni yee ni, wa ya pɔrɔ wa na wɛ.
3 Ga Se Bɛɛri Fɔɔ Kilɛ ni nʼa da ba jo,
nʼa giin di jo nayɛ kaa na Kilɛ ɲaha tàan.
4 Yee kunni wa kafinɛyɛ kuun yi funyɔ ni.
Yee bɛɛri pu ɲɛ kaɲuu baa wɛbyii.
5 Yee da bi mɛhɛ cari bɛ yiyɛ na,
lee bi da bye yee mu fungɔngɔ fɛɛrɛ.
6 «Nʼa yi ɲɛɛri jo yi na wo nijoyo yi logo,
yʼi ɲuwegee shan ni na wo jomɔ pu ni.
7 Yee na zɔɔ yee pu kayenahaya jo Kilɛ mɛgɛ na ya?
Yee na zɔɔ yee pu kafinɛyɛ jo Kilɛ mɛgɛ na ya?
8 Yʼa giin yʼi fara Kilɛ na,
yʼi yogo jo wu kaa na gɛ?
9 Wu bu jo wu yi nɔhɔ wolo, ta wu na ba kaɲii kan yi mu?
Ta yee na já wu piinŋɛ ba yee wa sipya piinŋɛ wɛ?
10 Yee bu da yee na sipya wa pɔrɔŋɔ wa na ali ŋmɔhɔrɔ bɛ ni,
nakaara baa, wu na ba tigire shan yi na.
11 Ta wu saanra ti nɔɔrɔ wu da ba fyaara leŋɛ yee ni wɛ?
Ta wu ɲìi fyaara da ba jé yee ni wɛ?
12 Yee jomɔ pu ɲɛ shɔɔnrɔ taleŋɛɛ yɛ.
Yee jomɔ pu fanha kʼa xɔ ba cogo kasɔrɔgɔ ɲɛ wɛ.
13 «Yi cari yiyɛ na yʼi na yaha wà!
Nɛ wʼa da jo, lemu na bye ge, lee di pye.
14 Nɛ kuuni wa da ba nayɛ le farati ni,
di na munaa li pɛrɛ.
15 Wu mɛhɛ na gbo bɛ!
Wee wu wa nɛ tadaŋa.
Ga lee bɛ na, wee ɲaha tàan nʼa da ba jo,
di li shɛ jo jaagi wa nɛ na na ɲaarigana li ni wɛ.
16 Lee yɛrɛ na ba nɛ wo ɲuwuuro ti keree faha.
Bani Kilɛ ɲìi fyaara baa fɔɔ wa shishiin
wa da já yere Kilɛ ɲaha tàan wɛ.
17 Yi ɲuwegee shan xuuni ni na jomɔ pu ni.
Yemu nʼa da ba jo ge, yi ɲuwegee shan yʼi yi logo.
18 Li wii, nimɛ nʼa da ba baari,
bani nʼa li cɛ jo kaɲii wa na mu.
19 Ta wa na ba na kaala?
Lee bu bye, nɛ na jari nayɛ na, na xu wu sigee.
20 «Ga, Kilɛ, kii keree shuun we pye na mu,
lee bu bye, nʼa da ba ŋmɔhɔ ma na nige wɛ.
21 Ma keŋɛ ki kuruŋɔ na fɛni,
ma ɲìi fyaara ti ganha bu na jaa wu yirige wɛ.
22 Lee kadugo tàan mʼa fɛnhɛ jo, nɛ na ma ɲɔ shɔ.
Kelee di fɛnhɛ jomɔ pu lɔ, mʼa na ɲɔ shɔ.
23 Kaparaya ni jurumu pyegee juu nɛ dʼa pye wɛ?
Na wo tiibaara te ni na wo jurumu wu shɛ na na.
24 Ɲaha na ma di mayɛ ŋmɔhɔni nɛ na,
na nɛ pye ma pɛn wɛ?
25 Mu na zɔɔ mu wu yogo tun ni wɛŋɛ ni ya,
kafɛɛgɛ ya kemu lɔ na gaaŋi ge?
Mu na zɔɔ mu wu taha ɲawaga na mʼa niinɛ ya?
26 Bani keree kiimu mu ya ka nɛ fɛni ge, kʼa soro.
Nɛ tiibaara temu bɛɛri pye na levɛɛrɛ ti tuun wu ni ge,
a mu di tee pye nɛ cɛn.
27 Mʼa shɔnhɔyɔ le na tɔɔyɔ yi na*, na na tatoroyo yi bɛɛri kasɛri,
na tɛhɛnɛ kɔn shɛ na tɔɔyɔ yi na.
28 Na ta sipya ceepuuro di gyɛɛgi ba tinnɛ nivɔnhɔ ɲɛ wɛ,
kelee ba yawyiire ma fàŋa li mɛ wɛ.