Sipyiyawyii koŋɔ tiinnɛ bɛɛri li ɲɛ kanhama
14
«Sipyiyawyii, cee wo nize we,wu shi wu caŋa ɲɛhɛɛ ki bɛɛri kʼa gbere,
na ɲi bɛ ɲakpaan na.
2 Wu ma yìri ba tige fyɛɛnrɛ ɲɛ wɛ, ga na ba waha.
Wu ma doro tɔvuyo na ba tige ɲimɛ ɲɛ wɛ, na juri.
3 Kilɛ, go wee na mu wa ɲii shan na wii!
Go nɛ mu wa yiri mɛ kiiri na!
4 «Jɔgɔ wu da já fɛfɛɛrɛ yaaga yeege fɛfɛɛrɛ baa yaaga ni wɛ?
Sipya bɛ wɛ!
5 Mʼa sipyiyawyii shi wu ɲuŋɔkana tɛhɛnɛ wolo,
na wu yebyaa ki ɲɔ shɛ.
Mʼa tɛhɛnɛ kɔn shɛ wu shi wu na,
wu da já doro lemu tàan wɛ ge.
6 Wee tuun wu ni, ma ɲaha ki wolo wu ni
kɔnhɔ wu tifahama ta, wu fundanga ta
ba kapyebye caŋa ɲii saraa ma wu funŋɔ taan mɛ wɛ.
7 «Tadaŋa wa tige mu, bani ki bu gɔn,
ki na guri vuun sanha, na geye nivoyo yeege.
8 Ali ki niyɛ mɛhɛ lɛ bɛ ɲiŋɛ ki ni,
ali ki ɲuŋɔ ki mɛhɛ bye kanna kʼa xu bɛ ɲiŋɛ ki ni,
9 ki ba lɔhɔ ta tuun wemu ni, kʼa guri fun sanha,
na geye nivoyo yeege sanha ba tige nivoŋɔ ɲɛ wɛ.
10 «Ga sipya bu xhu, wu baraga ma xhɔ.
Wu munaa bu wolo xɔ, wʼa ɲɛri ɲaha wɛ?
11 Suumɔ lɔhɔyɔ yi lɔhɔ ki na já digi,
gbalaa pu lɔhɔyɔ yi na já xhɔ, pʼa waha.
12 Mu li wa, sipya bɛ bu sinnɛ xu sinnɛgɛ na, wʼa da yìri wɛ.
Na fugba wu yaha wà wʼa da ga ɲɛ wɛ,
wʼa da ga foro pee ŋmunumɔ pu ni wɛ.
13 «Ee, Kilɛ! Mu da bi da zɔɔ na nɛ ŋmɔhɔ yaŋa kanha na,
na na niŋmɔhɔŋɔ yaha wà
fo na shɛ ma wo loyire li pye lʼa toro.
Na tɛɛ la kɔn shɛ na na,
ma na ba ma fungɔngɔ yaha na na tɛɛ lemu ni ge.
14 Ga sipya bu xhu xɔ,
ta wu na já ɲiifɛɛrɛ pye sanha?
Lee da bi da já bye,
nɛ bi da na wo kanhama pu xu nayɛ ni, na Kilɛ sige,
fo na yirigeduun ba shɛ nɔ.
15 Lee funŋɔ ni ma bi da na yiri di na ma ɲɔ shɔ.
Ma keŋɛ yayaaga ki la na ma ta wee tuun wu ni.
16 «Ma bi da kasɛɛgɛ yaha nige
nɛ wo jurumu wu na wɛ.
Ga nimɛ mu wa nɛ ɲidaɲii ki bɛɛri tɔrɔ.
17 Mu bi da nɛ wo tiibaara
ti bɛɛri le bɔrɔgɔ ni, na ti ɲɔ pɔ.
Mu bi da nɛ wo kakuuŋɔɔ ki yafa.
18 Ga faaboboŋɔ ma do na jaaga,
faaga ma gɛgi laha ki tatɛɛngɛ ni.
19 Lɔhɔ ya faaga laala fo na ki kɔɔn na luu
kɔngana lemu na ge,
lofomɔ ya ɲiŋɛ puuro luu na gaaŋi lɔgana lemu na ge,
wee cogo wu na mu bɛ ya sipyiyawyii tadaŋa kyɛɛgi.
20 Mu ma wu shan tɔɔɲii nigin yɛ pe,
wʼa gari fɛɛfɛɛ.
Mu ma wu ɲaha ki yahagana li ɲɛri,
na wu yaha kari.
21 Wu nagoo na ba baraga ta la?
Wu ya cɛ wɛ.
Fanhara pu da ba da la?
Wu da ga foro lee fiin wɛ.
22 Kanhama pemu pu wa
wuyɛ pyaa ceesɛɛgɛ ki ni ge,
pee yɛ nigin wʼa cɛ.
Wuyɛ pile ɲuŋɔ kaa wuu na
wu da wuyɛ ɲiɲaara yahana yaha.»