Elifazi wo jomɔ shuun wo pe
15
Ayiwa, a Tema shɛɛn Elifazi di jomɔ pu lɔ na jo:2 «Fungɔngɔ fɔɔ ba da sipya wa ɲɔ shɔ,
ta tee ɲɔshɔɔrɔ te ma bye ɲuŋɔ baa
ba kafɛɛgɛ ɲɛ-ɛ ya?»
Ta kafɛɛwaga yɛ wu ma yeege
ba Kilɛ-nɔhɔ kafɛɛgɛ nivugo ki ɲɛ-ɛ ya?
3 Ta wu ma yogo yu wuyɛ kaa na
ni kuduun baa jomɔ,
kelee ni ɲuŋɔ baa jomɔ ni ya?
4 Mu ya ali Kilɛ ɲìi fyaara ti bɛ kyɛɛgi,
mu ya Kilɛ-ɲɛrɛgɛ ki kyɛɛgi.
5 Bani ma tiibaara ti
tʼa pe jomɔ pe leni ma ɲɔ ni.
Shizhiinmɛ fɛɛ wo jogana le mu ya yu.
6 Mayɛ pyaa ɲɔ ki kʼa jaagi kanhama shan ma ɲuŋɔ ni,
nɛ bɛ wɛ.
Mayɛ pyaa wo ɲɔsɛɛyɛ yi
yʼa sɛɛri keree jo wà ma na.
7 Ta mu wu wa koŋɔ shɛnshiimɛ we?
Ta mu wu wa se koŋɔ puga ni
yaŋa boboyo yi ɲaha na?
8 Ta mu ya Kilɛ wo kaŋmɔhɔŋɔɔ ki logo?
Ta mu mu fungɔngɔ fɛɛrɛ ti bɛɛri ya kan?
9 Lekɛ mu dʼa cɛ, wèe di ya lee cɛ-ɛ wɛ?
Lekɛ ɲaha mu dʼa cɛ, wèe di ya ta lee ɲaha cɛ-ɛ wɛ?
10 Shifiire fɛɛ ni nɔhɔlɛɛ wa wèe niŋɛ ni
piimu ya lɛ mu to wu na ge.
11 Mu ya Kilɛ wo loɲinɛ li ta lʼa cɛrɛ gɛ?
Jomɔ nidan pemu pu wa yu ni mu ni ge,
pee ya mu funŋɔ ɲiŋɛ-ɛ ya?
12 Ɲaha na ma dʼa luu yirige wɛ?
Lekɛ na ma dʼa ma ɲìi cori wù ni wɛ?
13 Ɲaha na ma dʼa luu yirige Kilɛ tàan
fo na pe jomɔ pe tuugo yu ma ɲɔ ki ni wɛ?
14 Sipya ɲɛ ɲaha wu ta pye fɛɛfɛɛ wɛ?
Cee ya yawyii lemu se ge,
lee ɲɛ ɲaha li ta tii wɛ?
15 Li wii, Kilɛ yɛrɛ ya ta na daa wu mɛlɛkɛɛ pu na wɛ.
Ali fugba wu bɛ ya ta pye fɛɛfɛɛ wu ɲaha tàan wɛ,
16 pu da jo sipyiyawyii,
lee lemu bɛɛri li ɲɛ tanhaŋa ni tiibaara ge.
Lee wa nahama gbuu ba lɔhɔ ɲɛ wɛ.
17 «Ayiwa, logo na ɲɔ na Zhɔbu, nʼa da ma kalaa.
Lemu nʼa ɲa ge, lee nʼa da ba baari ma mu.
18 Yemu fungɔnyɔ fɛɛ pu wa yu ge,
pu sefɛlɛɛ pu mu pʼa yi ta.
Pu ya ta sɔɔ na yaaga bɛ ŋmɔhɔ yi ni wɛ?
19 Pee yɛ pe mu fiige kʼa bi kan.
Nabun wa shishiin bi sanha ba diin pu tɛ ni wɛ.
20 «Sipyikuuŋɔ ma tɔɔri taa ki shi wu
caŋa ɲɛhɛɛ ki bɛɛri funŋɔ ni.
Yee kiimu kʼa yaha sipyigagaŋa mu ge,
kee ɲɔ ya cɛ.
21 Mujoŋɔɔ kiimu kʼa fyaara leŋɛɛ ge,
kee wa jin wu ɲuwegee ni.
Na wu ɲaɲiŋɛ wo yaha,
kakabyii na ba do wu na.
22 Wu ya daa nige na wee na já ba shɔ
nibiige ki wo fanha ki na wɛ,
bani ŋmɔpara bɛ lʼa wu fuunnɔ.
23 Wu ma ɲuŋɔ leni na mari na wu yalige shaa.
Wʼa li cɛ na nibiige caŋa kʼa gbegele yaha na wu sigee.
24 Cɔnrɔmɔ ni kanhama nigbɔ
ma fyaara leŋɛɛ wu ni, na wu ɲuŋɔ jɔ
ba saan ni wu kashɛnŋmuu ma gbegele mɛ kashɛn na wɛ.
25 Bani wʼa wu keŋɛ yirige Kilɛ fɛni,
wʼa wuyɛ durugo Se Bɛɛri Fɔɔ wu fɛni.
26 «Wʼa ɲuŋɔ waha na baa tii Kilɛ na
ni wu ŋmasigiŋɛ nagaŋa nigbilege ki ni.
27 Wʼa bi pɛlɛ fo wu ɲaha na yɛrɛ,
wʼa bi sii ɲi fo na sɛrɛɛ kii kurulo.
28 Ga kulo lemu lʼa ja ge, lee ni wʼa da ba shɛ diin,
na shuun pukoloyo ni yemu yʼa zhaa di do ge.
29 «Wu da ba bye nige yara fɔɔ wɛ,
bani wu nafuu wʼa da ba mɔ wɛ,
wu keŋɛ yara wʼa da bugo nige ɲiŋɛ ke na wɛ.
30 Wʼa da ga já zhɔ nibiige ki na wɛ.
Wu na ba bye ba tige ɲɛ wɛ, na na ba kemu wo geye waha ge.
Kilɛ wo ɲɔ kafɛɛgɛ ki na ba wu lɔ.
31 «Wu ganha bu tiibaara pye wu tadaŋa, wu wuyɛ piinŋɛ wɛ.
Bani tiibaara na ba guri ba wu mu tee tiibaara te tɛgɛ.
32 Kee keree kii bɛɛri na ba bye
sani wu wo caŋa ɲii li li fa ge.
Wu wo geye yi kunni wa da ba fun nige bada wɛ.
33 Wu na ba bye ba ɛrɛzɛn tɛgɛ ɲɛ wɛ,
kemu wo ɛrɛzɛn wʼa wo lɛbaa ge.
Wu na ba bye ba oliviye tige ɲɛ wɛ,
kemu ya ki fyɛɛnrɛ bɛɛri wo ge.
34 «Oo dɛ, Kilɛ ɲìi fyaara baa fɔɔ wo puga
ki niwaga na ba gori.
Ma yakanga kemu kʼa sipya nahana ge,
wemu wʼa kee shuu ge,
na ki da ba weefɔɔ wo puga ki sòrogo.
35 Wemu wʼa kuumɔ laa lɔ ge, wee na ba tiibaara se.
Wu zɔ wu ma ɲi piinŋɛ keree na.»