Zhɔbu wo ɲɔshɔɔrɔ te
16
Wee tuun wu ni a Zhɔbu di jo:2 «Nɛ kii keree kii tuuyo niɲɛhɛyɛ logo toro,
yee bɛɛri pu ɲɛ samadanha sipyii.
3 Ɲaha tuun ni yee di da ba
pe ɲuŋɔ baa jomɔ pe jo ɲɔ yaha wɛ?
Lekɛ lʼa waha mu na fo mu wu nɛ ɲɔ shɔ mɛ wɛ?
4 «Lemu lʼa nɛ ta ge, lee da bi yee ta,
nɛ bɛ da bi já jo ba yee wa yu wɛ.
Nɛ bi da já jomɔ gbegele yee kaa na,
na jo fo na ɲuŋɔ kori yee fɛni.
5 Nɛ bi da yee tɛgɛ ni ɲɔ ni,
nɛ bi da ɲɔsɛɛyɛ taga yee logoo ɲiŋɛ.
6 «Ayiwa, di bu jo, lee wa da ba la wolo na yama pu ni wɛ.
Di bu nugo co nayɛ na,
lee na ba yama pu laha na ɲuŋɔ ni ya?
7 Nimɛ kunni, Kilɛ ya nɛ fanha xɔ,
Oo dɛ, mʼa na puga ki bɛɛri tɔ.
8 Mʼa na cogana kolo, na lee pye sɛɛri kaa na fɛni.
Nɛ shɔgɔrɔ ti bɛ wʼa li shɛɛ na nɛ jaagi.
9 Wʼa taha yaha na na, na na kana.
Wu loyire wo wʼa nɛ shɛɛngi shɛɛngi,
fo na wu ganhaa kuri nɛ fɛni.
Na pɛn wʼa na wii ni ɲɛkuunɔ ni.
10 «Sipyii pʼa pu ɲɔyɔ mugi nɛ fɛni.
Pʼa na kpuun na ɲaha ki ni, na na fanri.
Pu bɛɛri pʼa pinnɛ, na wɔ nɛ kaa na.
11 Sipyitiibaaya mu Kilɛ ya nɛ ɲɔ yaha,
wʼa na wá sipyikuuyo keŋɛ ni.
12 «Nɛ bi bye ɲaɲiŋɛ na, ga Kilɛ ya nɛ ɲahara.
Wʼa na co na gaɲa ke ni na na kɛgi kɛgi.
Wʼa wu ŋmaya yi bɛɛri ɲaha tii na na.
13 Wʼa wu ŋmaya yi taga na maha círi.
Wʼa na zanlogoo ki su furi ɲiɲaara baa.
Wʼa nɛ losoro li furi, na li lɔhɔ ki wo ɲiŋɛ na.
14 Wʼa na cere ti bɛɛri kɔn nɔɔyɔ.
Wʼa gburogi na fɛni ba kashɛnŋmɔ ɲɛ wɛ.
15 «Bɔrɔgɔ fàya nɛ jooli, na yee le,
na na wo pɛɛŋɛ ki fuulo puuro ni.
16 Mɛsuu lʼa na ɲìi ki ɲaaŋa,
xu ɲimɛ di ɲɛ na ɲɛkɔrɔyɔ yi na.
17 Ma li ta bɛ nɛ keye yi ya kakuunɔ pye wɛ.
Nɛ bi ɲɛrɛgɛ ki pyi ni na zɔ wu nifɛɛfɛɛrɛ ni.
18 «Ee, ɲiŋɛ, ma ganha bu da na shishan pu tɔ wɛ,
kɔnhɔ na mɛkuulo lʼi da foro xuuni.
19 Ga nimɛ yɛ pyaa ki ni nɛ sɛɛri wu wa fugba wu ni.
Wemu wʼa yaa wu jo nɛ tɛgɛ ge, wee wa fugba liilii wu ni.
20 «Nɛ naɲiinɛɛ pu wa zhɛhɛni na na,
ga nɛ ɲɛsinmɛ wo di Kilɛ ɲɛɛri.
21 Wee wu kiiri kɔn sipya ni Kilɛ tɛ ni,
ba sipya ma yogo jo mɛ wu sipyiɲii kaa na wɛ.
22 Bani nɛ shi wu yee kʼa nɔ xɔ ki tɛhɛnɛ na.
Koo lemu nɛ di wa da ba lɔ da gaaŋi ge, guri wa li ni wɛ.