Zhɔbu ya jo na wee naɲiinɛɛ pʼa foro wee kaa tàan.
17
«Na ŋmɔgara tʼa giin di yere,nɛ shi wʼa nɔ wu tɛhɛnɛ na, faŋa kʼa na sigee.
2 Ta lawuu fɛɛ bɛ pʼa nɛ maha mɛ wɛ?
Nɛ já ŋmunɔ pu fanhara keŋɛ ni wɛ.
3 Mu Kilɛ yɛ pyaa ki ɲuŋɔ le nɛ kaa tàan mayɛ mu,
bani ni mu bɛ wɛ, jɔgɔ wu da gbara wu ɲuŋɔ le nɛ tàan wɛ?
4 Bani mʼa pu fungɔnyɔ yi tɔ,
lee wuu na mu da ga sɔɔ pu se ta wɛ.
5 Pʼa foro sipya wa fɛni wemu ya wu naɲiinɛɛ yiri yalige na,
na ta xuugo di nibiige leŋɛɛ wuyɛ pyaa nagoo ɲìi ni ge.
6 «Mu Kilɛ wʼa li pye sipyii na na fanri taleŋɛɛ ni,
na ɲɔlɔhɔ waa na ɲaha ni.
7 Yama pʼa nɛ ɲìi ki fanha xɔ,
a nɛ ceepuuro ti ɲɛri ba yaaga ka wo jaa ɲɛ wɛ.
8 «Le kaa le ya tiimɛ fɛɛ pu ɲaha wɔ.
Jaagi baa fɛɛ pʼa yìri Kilɛ ɲìi fyaara baa fɛɛ pu kaa na.
9 Pu jomɔ pu ɲɛ na:
‹Tiimɛ fɔɔ wu la le wu gori wu tiimɛ ni.
Piimu wo keye yi wa fɛɛfɛɛ ge,
pee pu la le puyɛ ni sanha.›
10 Yee pi ge, na naɲiinɛɛ yi pa,
yi bɛɛri pu kuri yi jomɔ pu na sanha.
Nʼa da ba fungɔngɔ fɔɔ nigin bɛ ta yee tɛ ni wɛ.
11 «Nɛ shi wu caŋa ɲɛhɛɛ kʼa xɔ,
keree kiimu bɛɛri ɲɔ nɛ bi wolo ge,
ki bɛɛri kʼa kyɛɛgi, ali nɛ zɔ wu fungɔnyɔ yi bɛ.
12 Pee wa piige pyi na caŋa.
Nibiige ki bu ɲɔ kɔn na jin,
pʼa jo na kpɛɛngɛ ki ɲɔ kʼa taha.
13 «Puga kemu ɲaha nɛ wa wii ge, ta yaŋa kanha bɛ wɛ?
Wee xuu wu wo nibiige ki ni
nʼa da ba shɛ na wo tasinnɛgɛ ki yàa.
14 Nɛ wʼa faŋa pyi ni mujugbɔɔ ni na: ‹Mu wu ɲɛ nɛ to!›
Na faŋa funŋɔ fyɛɛnrɛ ti pyi:
‹Yee pu ɲɛ nɛ nu ni nɛ ceboroshaa!›
15 Nɛ wo tadaŋa kʼi wa mii wɛ?
Nɛ wo tadaŋa ke, jɔgɔ wʼa ki ɲaa wɛ?
16 Ki na ba binnɛ digi ni nɛ ni na kari yaŋa kanha na.
Wù shuun wu bɛɛri na ba shɛ ŋmɔ wà gbagbaŋa ki ni.»