Bilidadi ya jo na sipyikuuŋɔ na ba gyɛɛgi
18
Ayiwa, a Shuwa shiin Bilidadi di jomɔ pu lɔ na jo:2 «Fo tuun wekɛ ni yee di da ba
pe joɲɛhɛmɛ pe ɲɔ yaha wɛ?
Yi fungɔnyɔ ta, lee kadugo tàan wù na ba jo ni wùyɛ ni.
3 Ɲaha na yee di wèe wii ba yapɔrɔyɔ ɲɛ-ɛ wɛ?
Ɲaha na yee di wèe wii ba nahanahanaa ɲɛ-ɛ wɛ?
4 «Mu Zhɔbu wi ge, mu luu li wa yìri
fo ma na mayɛ shɛɛngi shɛɛngi.
Ta mu wʼa giin na ɲiŋɛ ki niwaga na ba gori mu wuu na?
Kelee ta ma wʼa giin na faaga na ba
laha ki tatɛɛngɛ ni mu wuu na?
5 Can wi gɛ, sipyikuuŋɔ wo sokinna wu kpɛɛngɛ ki na ba fugi.
Wu kpɔnhɔɔ ki na ki da ba kpɛɛngɛ yeege nige wɛ.
6 Kpɛɛngɛ ki na ba ɲɛri nibiige wu fàya puga ki ni.
Wu sokinna wu kpɛɛngɛ ki na ba fugi wu ɲuɲɔ na.
7 Wu togɔngɔyɔ ye yi bi waagi ge, yee na ba ɲiŋɛ.
Wuyɛ pyaa wo kaɲɔwuugoo na ba wu shan.
8 Bani wu tɔɔyɔ yi na ba jé jɔmɛɛrɛ ni.
Tee na ba bye wu co co tifuugo.
9 Tifuugo ki na ba wu co ɲidavenɛ le na.
Tifuugo ki keeshɛnhɛyɛ yi na ba wu gbara.
10 Wu co co mɛɛrɛ ti wa ŋmɔhɔ ɲiŋɛ ki ni.
Wu co co tifuugo ki wa wu sigee wu kozhɛɛ li ni.
11 Fyaara kagbɔhɔɔ wa wu xakili wu yirige kabaya yi bɛɛri na.
Kee wa munaa nɔri wu na.
12 Xuugo ya wu fanha xɔ,
a bɔɔngɔ di ba diin wu tàan.
13 Yama na ba wu ceesɛɛgɛ ki bɛɛri li.
Wu ceepuuro ti na ba xhɔ, wʼa xhu xugaguunɔ na.
14 Wʼa giin na wu ɲaɲiŋɛ wo wu ɲɛ wu fàya puga kemu ni ge,
wu na ba jo yeege kee ni,
na gari ni wu ni fyaara kagbɔhɔɔ ki wo saan wu mu.
15 Watii wu da ba diin wu fàya puga ki ni,
bani ki ɲɛ nige wu wogo wɛ.
Kirimu na ba wo wu takaraya yi nia.
16 Wu niyɛ yi na ba waha ɲiŋɛ ki ni,
wu geye yi ma xhu fugba wu ni.
17 Sipya wa shishiin da ga ba
wu funŋɔ sha ni wu kaa ni nige ɲiŋɛ ke na wɛ.
Wu mɛgɛ ki na ba biin fɛɛfɛɛ ɲiŋɛ ki na.
18 Wu na ba gɔri laha kpɛɛngɛ ki na, na shɛ wu yaha nibiige ni.
Wu na ba gɔri laha ɲiŋɛ ki na.
19 Wu tirige shɛn nigin bɛ da ba gori
wu kadugo yíri wu sipyii pu ni wɛ.
Sipya nigin bɛ da ba gori ɲìi na wu puga ki ni wɛ.
20 Lemu lʼa wu ta ge, sipyii pu bɛɛri na ba gaala lee na.
Ma lɔ caŋatomɔ pu na fo na shɛ nɔ Kilɛ-nɔhɔ ki na,
pu bɛɛri na ba jɛlɛ fyaara keŋɛ ni.
21 Ayiwa, lee li wa sipyikuuŋɔ wo puga ki xɔgana.
Sipya wemu ya Kilɛ cɛ wɛ,
mumɛ na wee wo xuu wu ma bye.»