Zhɔbu ya jo na Kilɛ wu ɲɛ wee ɲuŋɔ wolovɔɔ
19
Wee tuun wu ni a Zhɔbu di Bilidadi ɲɔ shɔ na:2 «Yee na ba daha yaha nɛ fɛni na gana fo tuun wekɛ wɛ?
Yee na ba yi kafila wu taga na nɛ shɔhɔri shɔhɔri
fo tuun wekɛ wɛ?
3 Yee ya nɛ fanha fo tɔɔɲii kɛ.
Yee ba nɛ fanri mɛ, lee shiige wa yee na-ɛ gɛ?
4 Li mɛhɛ bu shɛ da can na nago kanna nɛ wʼa piin,
nɛ wo ɲuŋɔ tuguro ti wa kee piinŋɛ ke.
5 Ga li bu shɛ da nago kanna yee wa yiyɛ pɛlɛ nɛ na,
na nɛ wo shiige ki pye nɛ wo jaagi wu kaɲuŋɔ,
6 wee tuun wu ni yi li cɛ
na Kilɛ wʼa taha na fɛni na gana,
na wee wʼa wu jɔ mɛɛrɛ taga na co.
7 «Bahamu we pʼa byi na na ge,
di mɛhɛ xhuulo bɛ, sipya wʼa da na ɲɔ shɔ wɛ.
Nɛ mɛhɛ mɛyire wá bɛ,
sipya wʼa da kaɲii kan na mu wɛ.
8 Kilɛ ya nɛ koo li tɔ, nɛ da já doro wɛ.
Wʼa piige le nɛ kozhɛɛ li ni.
9 Wʼa nɛ wo nɔɔrɔ wu laha na na.
Wʼa na saanra ɲudɔnɔ li laha na ɲuŋɔ ni.
10 Wʼa na cere cere kabaya yi bɛɛri na kɔnhɔ nɛ sii shɛ.
Wʼa na tadaŋa ki kɔɔngi ba pʼa tige kɔɔngi wɛ.
11 Wu loyire li wa ba na ɲɛ wɛ nɛ fɛni.
Wʼa nɛ co ba wu pɛn ɲɛ wɛ.
12 Wu kashɛn keye yi bɛɛri yʼa pinnɛ, na ba.
Pʼa koo gbɛri fo na pa nɔ nɛ na,
na pu fàya buguloo pu sin sin ma nɛ wo fàya bugi wu maha.
13 «Wʼa na cebooloo pu laha na na.
Nɛ cɛvɛɛ pʼa waa laha na na.
14 Na puga shɛɛn pʼa laha na tàan.
Na naɲiinɛɛ pʼa funŋɔ wɔ na na.
15 Nɛ puga ki sipyii ni nɛyɛ pyaa wo
kapyebyezhaa pʼa nɛ co ba nabun ɲɛ wɛ.
Nɛ pye pu ɲaha tàan ba sipyite ɲɛ wɛ.
16 Nɛ bu na bulo wu yiri, wu da nɛ ɲɔ shɔ wɛ,
ali nɛ mɛhɛ wu ɲɛɛri ni tataara jomɔ bɛ ni.
17 Nɛ ɲɔ ki nugo kʼa na la wolo na shɔ wu na.
Na nugo kʼa na la xɔ na nusii li bɛ ni.
18 Ali nɔhɔpyitiire bɛ tʼa nɛ fanri,
nɛ ba giin di yìri, pʼa ganha na na la wo.
19 Nɛ ɲɛri tanhaŋa yaaga na sɛɛ sɛɛ naɲiinɛɛ pu bɛɛri mu.
Sipyii piimu pʼa bi taan nɛ mu ge, pee pʼa yìri nɛ fɛni.
20 Nɛ ceesɛɛgɛ kʼa shɛ dara na kaciiye yi na.
Nɛ pye kanna nɛ xu fɔ.
21 Yi ɲuŋɔ ɲaari na na!
Yi ɲuŋɔ ɲaari na na na naɲiinɛɛ,
bani Kilɛ keŋɛ kʼa nɔ na na!
22 Ɲaha na yee dʼa taha yaha
nɛ fɛni na gana ba Kilɛ ɲɛ-ɛ wɛ?
Yee sanha sii tin nɛ ceepuuro ti ganha wu na-ɛ ya?
23 Ee, nɛ jomɔ pu da bi da já ga!
Pu da bi ga Kitabu wa ni!
24 Pu da bi da já pu ka faaga na ni tɔɔrɔ ŋmahaa ni,
kɔnhɔ pʼi gori yaha gbee!
25 «Ga nɛ kunni ya li cɛ jo nɛ ɲuŋɔ wolovɔɔ wu wa ɲìi na,
jo wu na ba yiri yere ɲiŋɛ ki na koŋɔ ki caxhɔgɔ.
26 Ali nɛ ceesɛɛgɛ ki bɛɛri mɛhɛ bu gyɛɛgi bɛ,
ali nɛ ceepuuro ti bɛ mɛhɛ bye ti ɲɛ wɛ,
nɛ na ba Kilɛ ɲa.
27 Nɛyɛ pyaa kʼa da ba wu ɲa.
Nɛbile li ɲii na ba daha wu na, watii wo ɲii bɛ wɛ.
Nɛ zɔ wʼa wɛri fo nʼa wee tuun wu sige kanha.
28 Yee wa yu na:
‹Niinɛgana lekɛ na wèe di da ba wu nɔhɔ niinɛ,
kɔnhɔ wù kaɲuŋɔ ta di wu tɔɔgɔ le kiiri ni wɛ?›
29 Ayiwa yʼa yiyɛ kasɛri ŋmɔpara li na dɛ!
Bani ba yee wa taha yaha mɛ nɛ na wɛ,
lee bɛ na já ŋmɔpara nɔ yee na,
kɔnhɔ yʼi li cɛ na kiiri wu wa wà.»