Zofaari ya jo na sipyikuuŋɔ keŋɛ yaaga ya mɔni wɛ
20
Ayiwa, a Nama shɛɛn Zofaari di jo:2 «Fungɔnyɔ yemu yi wa nɛ mu ge,
ni zɔfugo kemu ki wa nɛ mu ge,
yee yʼa nɛ pye nɛ sige kanha di jo.
3 Jaagi jomɔ pa nɛ logo pemu pu ɲɛ fanhara nɛ mu ge.
Ga lajɛ fungɔngɔ ke ki wa nɛ mu ge,
kee na ba ma ɲɔ shɔgana li shɛ nɛ na.
4 «Wee tuun wu ni ta mu ya li cɛ
fo tuun wemu ni sipyiyawyii ya da ɲiŋɛ ki na ge,
5 na sipyikuuŋɔ wo setaara ti tɛhɛnɛ ya tɔnnɔ-ɛ wɛ?
Na Kilɛ ɲìi fyaara baa fɔɔ wo
fundanga ki ɲɛ tɛɛrɛ nifɛnhɛfɛnhɛnɛ yɛ wɛ?
6 «Ali wu mɛhɛ wuyɛ durogo fo na shɛ nɔ fugba we ni,
ali wu ɲuŋɔ ki mɛhɛ bi nɔ bɛ fugba ɲahaya yi na,
7 wu na ba biin fɛɛfɛɛ ba kaafugo ɲɛ wɛ.
Piimu pu bi wu ɲaa ge, pee na ganha na yu:
‹Mii wu di ɲɛ wɛ?›
8 «Wu na ba doro ba ŋmunɔgɔ ɲɛ wɛ,
sipya da wu ɲa nige wɛ.
Wu na ba juri ba piige ŋmunɔgɔ yaɲaga ɲɛ wɛ.
9 Ɲii lemu lʼa bi wu ɲaa ge, lee wa da ba wu ɲa nige wɛ.
Wu tatɛɛngɛ ki wa da ba wu ɲa nige wɛ.
10 «Wu nagoo pu na ba funmɔ fɛɛ
pu keŋɛ yara tɛrɛŋɛ pu na.
Wu keye yʼa naafuu wemu shɔ ge,
wu na ba wee tɛrɛŋɛ.
11 Baraga kemu kʼa bi wu kaan waha
ba wu levɛŋɛ wo wu ɲɛ-ɛ ge,
wu ni kee bɛɛri na ba shɛ le faŋa ni.
12 «Kuumɔ pʼa bi taan wu ɲɔ ni.
Wʼa bi pu ŋmɔhɔni wu ɲile li nɔhɔ ni.
13 Wʼa bi pu ɲɛhɛmi ɲɛhɛmi,
wu funŋɔ bye wu pu yaha wɛ.
Wʼa bi pu mara yaha wu ɲɔ ki ni.
14 Ga kee yalige ke na ba ɲɛri wu yacɛrɛ li ni.
Ki na ba ɲɛri matɔn sɔɔnrɔ wu funŋɔ ni.
15 Wʼa bi naafuu wemu lɔ jɔ ge, wu na ba wee tugi.
Kilɛ na ba wu bɛɛri yeege wu funŋɔ ni.
16 Matɔn sɔɔnrɔ wu bi muri,
mɛrɛŋɛ ɲile li da ba wu gbo.
17 «Sɛrɛ ni nujirimɛ pu pʼa fuu
ba dugo lɔhɔ kelee ba gba lɔhɔ ɲɛ-ɛ ge,
wu ɲii li wa da daha nige yee na wɛ.
18 Yara lemu bɛɛri wʼa ta ge,
wu na ba lee bɛɛri tɛrɛŋɛ.
Wu da ga lee la shishiin li wɛ.
Wʼa lemu ta wu kegaaŋa ki ni ge,
lee wa da ga já wu funŋɔ taan wɛ.
19 «Bani wʼa she funmɔ fɛɛ ni, na pu kewaya wuu yaha.
Wʼa sipyii pu piyɛyɛ yi shɔ pu na,
yee di ɲɛ wu wo niyereye wɛ.
20 Tɛhɛnɛ ya pye wu tinbaara ti na wɛ.
Ga yaŋmuyɔ yemu kaa lʼa waha wu mu ge,
wʼa da ga já kee ka shishiin sige gyɛɛgi na wɛ.
21 Wu tinbaara ti funŋɔ ni,
wu ya yaaga ka shishiin ɲa na ki yaha wà wɛ.
Lee wuu na wu bɛ wo fɛrɛmɛ pu da ba mɔ wɛ.
22 «Na wu yaha wu fɛrɛmɛ pu ni, cɔnrɔmɔ na ba wu ta.
Kakuuŋɔɔ tuuyo ye bɛɛri na ba do wu ɲuŋɔ ni.
23 Wu ba wu yacɛrɛ li ɲi tuun wemu ni,
wee tuun wu ni Kilɛ da ba wu wo loyire li tirige wu na,
na li wo wu ɲuŋɔ ni, na lee pye wu yalige.
24 «Wu ba fe na gbee kashɛn yagboyo tɔɔrɔ woyo yi ɲaha na,
sindaa ŋmaga, daɲaa wogo kee ki da wu su na furi.
25 Wu bu ŋmaga ki kɔɔngi wolo wu kadugo ki ni,
wu bu kee na ŋmaga ki wolo wu ɲɛrɛ li ni,
xu funbɛɛnrɛ na ba jé wu ni.
26 «Bɔɔngɔ ki wa lara nibiige ki ni na wu naafuu wu sigee.
Na ka na ba wu sòrogo sipya ya kemu le wɛ.
Yaaga yaaga kʼa kori wu fàya bugi wu ni ge,
na ki na ba yee bɛɛri sòrogo.
27 Fugba wu na ba wu tiibaara ti shɛ.
Ɲiŋɛ ki na ba yìri wu kaa na.
28 Wu puga ki yaŋmuyɔ yi bɛɛri na ba guu na kari.
Yi bɛɛri na ba fɔ na kari Kilɛ wo loyire li caŋa ki na.
29 «Lemu Kilɛ ya gbegele yaha sipyikuuŋɔ ɲaha na ge,
lee li wa le.
Lee Kilɛ ya gbegele na pye wu cɛn.»