Zhɔbu wo ɲɔshɔɔrɔ te
21
Ayiwa, a Zhɔbu di jo:2 «Yi ɲuwegee deele shan yʼi na jomɔ pu logo!
Yi sɔɔ lee yɛ nigin na na mu kɔnhɔ na luu lʼi ɲiŋɛ.
3 Yi ɲɔ yiyɛ na yʼi na yaha di jo.
Di bu jo xɔ, yi na da na la wo.
4 Ta sipyiyawyii mu nɛ wʼa na wo tataara jomɔ pu yu?
Ɲaha na mʼa go na luu ganha bu wɛri-i wɛ?
5 Yi ŋmahana ɲɛri yʼi na wii,
nɛ keree na ba yi fo fo xuuni, fo yʼa keye taha yi ɲɔyɔ na,
6 Nɛyɛ pyaa bu na funŋɔ kɔn na yahagana li na,
nɛ xakili wu ma gyɛɛgi,
fo na na ceesɛɛgɛ ki pye ki na ɲaari.
7 «Ɲaha na sipyikuuyo ya shi taa wɛ?
Ɲaha na yi ma sii lɛ, na ɲɛ ni baraga bɛ ni wɛ?
8 Pu nagoo ma bye pu tàan na baraga taa,
pu ɲabiye di lɛgi, na se ɲaha na na pu taa shi na.
9 Pu kpɔnhɔɔ ki ɲɛ ɲaɲiŋɛ na, funbɛɛnrɛ baa.
Kilɛ wo pubiin li ya nɔni pu na wɛ.
10 «Pu nupɛhɛɛ ki ɲɛ ni baraga ni, na seni nushaa pu na.
Pu nushaa pu bɛɛri nagoo segana lʼa ɲɔgi,
pu lahaa ki ya gyɛɛgi bɛ wɛ.
11 Pu ma pu nɔhɔpiire ti yaha ti na fe fe na doroo
ba dubyaa ɲɛ wɛ.
Pu nagoo pu ma xhɔnhɔni puyɛ ɲidaan na.
12 Pʼa ciire cee, na dɔgaŋaa ni gboyo kpɔɔn.
Pʼa faangaa wi, na fundanga pyi.
13 Pʼa pu shi wu bɛɛri pye mu fɛrɛmɛ ni,
lee kadugo na pʼa digi ɲaɲiŋɛ na yaŋa kanha na.
14 «Ma ta pee di bi Kilɛ pyi bɛ na: ‹Laha wù tàan.
Wèe funŋɔ wa wù ma korogoo ki sha cɛ wɛ.
15 Se Bɛɛri Fɔɔ wu ɲɛ jɔgɔ
fo wèe pu na w’à kapyeŋɛɛ pyi wu mu wɛ?
Wèe ba wu mɛgɛ ki yiri,
kuduun wekɛ wèe di da da lee ni wɛ?›
16 Go pee wa giin na peeyɛ pyaa keŋɛ ni
pee wo fɛrɛmɛ pu ɲɛ.
Ga nɛ kunni wa da daha kee fungɔngɔ ka fɛni wɛ.
17 «Ta pu sokinnaa pu wa furi tɛɛgɛɛ kii ni,
kelee ta bɔɔngɔ wʼa nɔni pu na?
Ta Kilɛ wʼa pu taa kaan pu mu wu wo loyire li ni?
18 Tuun wekɛ ni pʼi ma bye ba ɲawaara ɲɛ-ɛ wɛ,
kafɛɛgɛ ya temu luu ge?
Kelee ba shushɔn ɲɛ-ɛ wɛ, kafɛɛnaɲile ya pemu luu ge?
19 «Pʼa yu na Kilɛ ya sipyikuuŋɔ wo tiibaara
ti fɔɔ tɔni ki nagoo mu.
Kilɛ bi yaa na ti fɔɔ tɔni ti fɛɛ yɛ pyaa mu, kɔnhɔ pʼi li shi cɛ.
20 Wuyɛ pyaa ɲii lʼa yaa na taha wubile li wo ɲaa wu na,
wu gba wu din Se Bɛɛri Fɔɔ wu wo loyire li na.
21 Ni lee bɛ wɛ wu caŋa ɲii li ba fa,
ta wu xakili na bye wu puga shɛɛn na sanha ya?
22 Ta sipya na já Kilɛ taanni cɛmɛ ni?
Bani wee wʼa kiiri kɔɔn ali fugba yaŋmuyɔ ye bɛ na.
23 Wa ma xhu na wu cére ti yaha tʼa ɲi fanha na.
Wu ɲaɲiŋɛ wo ma bye, wu xakili wu bɛ dʼa tiin.
24 Wu gbodiye ye bɛɛri ma bye sìnmɛ,
wu kaciiye yi dʼa ɲi sɛmɛɛ na.
25 Wa bɛ na ba xhu kanhama ni,
wu ya fɛrɛmɛ ɲɛhɛ ɲa wu ɲii na bada wɛ.
26 Pu shuun wu bɛɛri na le ɲiŋɛ ni,
fyɛɛnrɛ na pu li.
27 «Li wii, nɛ yee fungɔnyɔ cɛ,
niguuŋɔɔ kiimu yee wa gɔɔn yi funyɔ ni,
na jaagi shaan nɛ na ge, nɛ ki cɛ.
28 Bani yee wa yu na:
‹Mɛgbɔhɔ fɔɔ wu puga kʼi ɲɛ mii nimɛ wɛ?
Sipyikuuŋɔ ki tatɛɛngɛ ke, dii ki dʼa pye wɛ?›
29 Ta yee sanha sipyiɲaalaa pu yege wii wɛ?
Ɲii kaɲagaa kiimu pu wa yu ge, yee wa ki nuri wɛ gɛ?
30 Bɔɔngɔ caŋa bu nɔ, kʼa sipyikuuŋɔ ye.
Kilɛ wo loyire li caŋa bu nɔ, yaaga da wu ta wɛ.
31 Jɔgɔ wu da zhɛ yere wu ɲaha tàan
di wu jaagi wu nahama pu wuu na wɛ?
Jɔgɔ wu da ba wu kakuuŋɔ ki foo tɔ wu mu wɛ?
32 Wu ba xhu, pʼa wu lɔ shɛ le faya ni,
na ganha na wu faŋa ki ɲuŋɔ sigee.
33 Sipyiɲɛhɛmɛɛ pu ma daha wu fɛni na se faya yi ni.
Sipyiɲɛhɛnɛ li ma wu torogo shɛ faya yi ni.
Pʼa wu faŋa puuro ti tɛɛŋɛ wo wu ɲuŋɔ ni kasɛɛgɛ na.
34 Wee tuun wu ni yee ma já nɛ luu ɲiŋɛ dii
ni ɲuŋɔ baa jomɔ ni wɛ?
Bani yee ɲɔshɔɔrɔ ti bɛɛri ti ɲɛ kafinɛyɛ.»