Elifazi ya Zhɔbu jaagi
22
Ayiwa, a Tema shɛɛn Elifazi di jomɔ pu lɔ na Zhɔbu pye:2 «Sipyiyawyii wo kaɲɔɔ wa Kilɛ mu ya? Ahayi!
Wuyɛ pile li na fungɔngɔ fɔɔ kaɲɔɔ ɲɛ.
3 Mu bu dii, mu wo dii wu ma ɲaha ɲɔ
Se Bɛɛri Fɔɔ wu na wɛ?
Mu bu bye tifire fɔɔ wʼa kuduun wekɛ ta lee ni wɛ?*
4 Mu wʼa giin na ma Kilɛ ɲìi fyaara ti wuu na
Kilɛ wʼa yogo yu ni mu ni, na kiiri kɔɔn ma na gɛ?
5 Ta ma kuumɔ pu bɛ pʼa kasa ye wɛ?
Tɛhɛnɛ ɲɛ mu katiibaagaa ki na wɛ.
6 «Mu bi kuduun nide shuu
ma cebooloo pu na kaɲuŋɔ baa,
na pu fàya shuu pu na, na pu ceepilegee wuu yaria.
7 Mu bi logbaga kaan sipyikanhaŋa mu wɛ,
na xuugo fɛɛ kunni yalige ni.
8 Mu bi fiige ki ɲɔ yaha fanhaɲɛhɛŋɛ fɔɔ wu mu,
na ma ɲidaan sipyii yaha pʼa tiin fiige ki ni.
9 Mu bi naxhugoshaa kewaya wuu kɔri na waa,
na cirimɛɛ keye kɛgɛɛ.
10 Lee wuu na ye tifuuyo ye yʼa shan na mu maha,
a fyaara di jé ma ni taapile ni, na ma jaa wu yirige.
11 Nibiige kʼa jé ma ɲaha ki ni,
fo na ma pye ma da já da ɲaa wɛ.
Lɔhɔ kʼa mu ɲuŋɔ lɔ jɔ.
12 «Ta li ya fiinŋɛ na fo fugba liilii we ni Kilɛ wa wɛ?
Wɔrɔɔ kiiyɛ pyaa bɛ wo liigana li wii!
13 A mu di jo na: ‹Kilɛ wʼa ɲaha cɛ wɛ?
Yaaga kekɛ wu di da ɲa ke nibiigbɔhɔ ke kadugo yíri
wʼa ki kiiri kɔɔn wɛ?
14 Ɲahaya yʼa wu tɔ, wu ya yaaga ɲaa wɛ.›
Fugba we ni wʼa ɲaari na mari.›
15 Ta kolɛɛ li ni mʼa giin da se,
lee lemu ni kakuubyii pu wa se ge?
16 Pee wo shi wu caŋa ɲɛhɛɛ
ki ma gɔn wolo ki da va wɛ.
Lofomɔ na pu nɔhɔshanma pu fɔ́ lɔ.
17 «Pee piimu pu bi Kilɛ pyi na: ‹Mayɛ liigi wu na!
Ɲaha Se Bɛɛri Fɔɔ wʼi da já bye wèe na wɛ?›
18 Ma li ta bɛ wee Kilɛ wʼa bi pu piyɛyɛ yi ɲi yasaaya na.
Ga nɛ kunni wa da daha kee fungɔngɔ ka fɛni wɛ.
19 Bani tiimɛ fɛɛ pu na ba pu wo bɔɔngɔ ki ɲa,
na funŋɔ taan.
Jaagi baa fɛɛ pu na ba zhɛhɛni pu na na yu:
20 ‹Li wii, wèe pɛɛn pu bɛɛri pʼa kyɛɛgi.
Pu keŋɛ yara lemu bɛɛri lʼa kori ge, na ya li sòrogo.›
21 «Ɲɔ mayɛ na mʼa bɛ ni Kilɛ ni, ma na ɲaɲiŋɛ ta.
Lee funŋɔ ni ma da fɛrɛmɛ ta.
22 Kalaa we wʼa gaan ma mu ge, mʼa sɔɔ wee na.
Mʼa wu jomɔ pu yaha ma zɔ wu na.
23 Ma bu guri pa Se Bɛɛri Fɔɔ wu mu,
wu na ma durogo na shɛ yaha ba ma bye wɛ.
Mʼa tiibaara tuugo bɛɛri sanha liigi ma puga ki na.
24 Ma sanni wu wá ɲiŋɛ na
mʼa ma Ofiirib sanni wu wá gba lɔhɔ ki wo faakagereye yi ni.
25 Wee tuun wu ni Se Bɛɛri Fɔɔ wu na bye ma wo sanni.
Wu na ba bye ma mu warifyɛn niɲɛhɛmɛ.
26 «Lee funŋɔ ni ma na ba fundanga ta Se Bɛɛri Fɔɔ wu mu.
Ma na ba já ma ɲaha ki yirige le Kilɛ ni.
27 Ma na ba wu ɲɛɛri, wʼa ma ɲɔ shɔ.
Ɲɔfaaya ye mʼa faa wu mu ge, ma na ba yee wolo.
28 Ma ba kaa bɛɛri ɲɔ wolo, li na ɲɔ ma keŋɛ ni.
Kpɛɛngɛ na ba ɲí ma kodorogoo ki bɛɛri ni.
29 Pu bu ma tirige, ma na ba yirige,
bani pʼa piimu tirige ge, pee Kilɛ ya dɛri.
30 Ali wemu bɛ wʼa jaagi ge, wu na ba wee bɛ shɔ.
Weefɔɔ na ba shɔ
mu wo keye yi wo fɛfɛɛrɛ ti baraga ni.»