Zhɔbu wo ɲɔshɔɔrɔ te
23
Ayiwa, a Zhɔbu di jo:2 «Nɛ bi giin,
na mɛshiinnɛ li ganha bu foro nige sanha niɲaa wɛ,
ga, a mʼi dɛrɛ ma keŋɛa ki fanha digi nɛ na.
3 Ga li da bye nago nɛ Kilɛ sanha cɛ,
nɛ bi da zii zhɛ fo wu kaban.
4 Nɛ bi da já zhɛ na fiin paari wu mu.
Nɛ bi da jomɔ niɲɛhɛmɛ jo pemu na kaɲii kan na mu ge.
5 Nɛ bi da wu wo ɲɔshɔɔrɔ ti logo.
Ye yi wa wu mu di jo na mu ge, nɛ bi da xhɔ yee logo.
6 Ta wu fanha ki bɛɛri wu bi da lɔ di nɛ wo kayuu li jo?
Ahayi dɛ, ga wu da ɲuwegee shan yɛ, na logo nɛ ɲɔ na.
7 Wu bi da li cɛ na sipya wemu wʼa yu ni wee ni ge, na wʼa tii.
Lee ma na shɔ fɛɛfɛɛ na kiiri kɔnvɔɔ wu na.
8 «Ga, nɛ bu shɛ Kilɛ-nɔhɔ na, wu ɲɛ wà wɛ.
Nɛ bu shɛ caŋatomɔ ni, nɛ da wu ɲa wɛ.
9 Ba la lʼa wu keŋɛ cɔnri suumɔ kulo kacɛ ki na,
a lee di na pye di da já wu ɲa-ɛ gɛ?
Ta woroo kulo kacɛ ki na wʼa shɛ lara?
Nɛ sanha já wu ɲa wɛ.
10 Ga lee bɛ na, koo lemu nɛ wʼa ɲaari ge, wʼa lee cɛ.
Wu bu na nɔhɔ faa, wu na na ta
ba sanni nidiimɛ ɲɛ wɛ.
11 Bani wee wo ɲidahaa fɛ pu ni nɛ wʼa se.
Wʼa koo lemu shɛ ge, lee ni nɛ wʼa se,
di wa sanha waa wɛ.
12 Di wa wu ɲɔmɛɛ la she ɲa wɛ.
Nɛ na ɲidaan yaha wà, na wu ɲɔjomɔ pu koo ɲaari.
13 Ga wu bu kaa lemu ɲɔ wolo,
jɔgɔ wu da já wu ɲɛri wɛ?
Lemu bu daan wu mu, lee wu da bye.
14 Wʼa lemu kɔn wuyɛ funŋɔ ni nɛ shizhaa na ge,
lee wʼa da bye.
Kee shi keree niɲɛhɛŋɛɛ
wʼa mara yaha wu zɔ wu na.
15 Lee wuu na nɛ jaa wʼa yiri wu ɲaha tàan.
Ba nɛ na funŋɔ kɔɔn ki na wɛ,
la ma ganha na faraa nɛ wo fyaara ti na.
16 Kilɛ ya nɛ yatɛnyɛ gbo.
Se Bɛɛri Fɔɔ wʼa na jaa wu yirige.
17 Bani nibiige ki ya já fɛhɛnɛ wá nɛ na wɛ.
Ke nibiigbɔhɔ ke kʼa na tɔ ge, kee bɛ wɛ.»