24
«Ɲaha na Se Bɛɛri Fɔɔ wʼi ya ta tuun wa gbegele yahawu wo kiirikɔɔn li kaa na-ɛ wɛ?
Sipyii piimu pʼa wu cɛ ge,
ɲaha na pee dʼa wu kiiri wu caŋa ɲɛhɛɛ ki ɲaha wii kanha wɛ?
2 Sipyii wa pu sipyiɲii kɛrɛyɛ kɔɔn na luu,
na yatɔɔgbaya yuli, na se na yi naha.
3 Pʼa cirimɛɛ wo kafaya coni na gaaŋi,
na naxhugoshaa wo niiyɛ coni fɔhɔɔ ɲuŋɔ tàan.
4 Pʼa kanhama fɛɛ pyi pu na pu kozhɛgɛɛ yari, na kiitiigee luu ;
na fiige ki la baa fɛɛ pu karamu fo pu na laraa.
5 Ba sige kafaya ɲɛ mɛ sipoŋɔ ni wɛ, mu na la baa fɛɛ ɲɛ.
Pu ma soo yìri na gaaŋi pu labye ɲɔ na, pu ɲɔlige tashaga ni.
Sipoŋɔ ki ni pu nagoo pu wo ɲɔlige ki da voro.
6 Pu ma shɛ yapɔrɔyɔ yaligee sha kɛrɛyɛ yi ni,
na sipyikuuŋɔ wo ɛrɛzɛn nilɛ wu kɔn wu mu.
7 Fafunmɔ ma pu pye pu ceepilegee wuu na shuun.
Fatɔyɔ ɲɛ pu mu pʼa puyɛ tɔni wiire tuun ni wɛ.
8 Zanhaya ma pu kpɔɔn faaboboyo yi ni,
pʼa faaya ya puro puro co ɲuŋɔ taleŋɛ baara na.
9 Pu ma cirimɛ kile laha wu nu jire na,
na la baa fɛɛ keŋɛ yaŋmuyɔ shuu pu na pu fɔhɔɔ ɲuŋɔ tàan.
10 Pu ma pu ceepilegee wuu yaha pu na ɲaari fàya baara na,
na pu xuugo wuu yaha pu na shinma pɔhɔɔ tugoo.
11 Pu ma pu kafɛɛ pu wo olivu wu sìnmɛ pu wo
olivu sìnmɛ pu tawologo ki ni,
na ɛrɛzɛn wu lɔhɔ ki wo, na li ta bɛ waga ɲɛ pu na.
12 «Piimu pʼa taxuyo shaa ge,
pee wo shiinnɛ li wa na fòro kanha ki funŋɔ ki ni.
Piimu pu wa bana bana ge, pee wa sipyaa waa na dɛgɛ shaa.
Ga Kilɛ ya pu nuri wɛ, wu ya yaaga pye wɛ.
13 Sipyikuuŋɔ ya gbara kpɛɛngɛ na wɛ.
Koo lemu bɛɛri li ɲɛ ni kpɛɛngɛ ni ge, pu ya se lee ni wɛ.
Tatorogo kemu bɛɛri ki ɲɛ kpɛɛngɛ ge, pu ya goroo kee ni wɛ.
14 Gbuuro pyevɔɔ ma yìri ɲimuguɲɔ na,
na shɛ kanhama fɔɔ ni la baa fɔɔ gbo.
Ba piige ya wɔ wɛ, wʼa ɲɛri nagaa.
15 Ceshabere li bɛ wʼa ɲii pɛri, na ɲibiire ti sigee,
na wuyɛ pyi na: ‹Sipya wa shishiin da ɲii taha nɛ na wɛ.›
Wʼa fàŋa taga wu ɲaha tɔ.
16 Piige bu wɔ, nagaalaa ma kuɲɔyɔ kɛgɛɛ na jin.
Ga ɲiga bu mugi, pʼa puyɛ tɔ pu piyɛyɛ ni,
kpɛɛngɛ na bye pu mu nabun.
17 Pee sipyii pii bɛɛri mu, ɲisɔɔgɔ ɲɛ ba xu ɲimɛ ɲɛ wɛ.
Bani pʼa xu ɲimɛ wo fyaara keree ki cɛ saama na.
18 «Ga yee wa yu na lɔhɔ wa gaaŋi ni sipyikuuŋɔ taapile ni,
na wu wo cɛn wʼa laŋi ɲiŋɛ ke na.
Na wu da tɔɔgɔ shan nige
wu ɛrɛzɛn kɛrɛyɛ yi wo koo li ni wɛ.
19 Waga ɲiŋɛ ni kafugo wʼa nɛzhia lɔhɔ gbuu
gbagana lemu na ge,
mu na yaŋa kanha wa da ba kakuubyii pu li,
fo na pu xɔ.
20 Pu nii pu funyɔ na ba wɔ pu na,
lee di pu ta pʼa ɲɛri xulile wo ɲidaan yalige.
Sipyii funyɔ na ba wɔ pu na fɛɛfɛɛ.
Tiibaara ti na ba gɔɔngi wolo ba tige ɲɛ wɛ.
21 Cèe piimu ɲɛ seganhanaa
ni pu ya nagoo ta ɲa-ɛ ge,
pu ma pee keŋɛ yaŋmuyɔ shuu pu na,
pʼi da kasaana pye naxhugoshɔ na wɛ.
22 Ga se wa Kilɛ ni wu sipyigagaŋa kɔri.
Wu bu yìri yere, tadaŋa da bye nige pu mu
pu ɲiifɛɛrɛ ti keree na wɛ.
23 Kilɛ ma pu yaha wà,
pʼa ganha na giin na ɲaɲiŋɛ na pee ɲɛ,
ga wʼi pu torogana li kasɛri.
24 Pu ma yirige na tɛɛrɛ yɛ nigin pye.
Lee bu doro pʼa biin.
Pʼa do, na xhɔ ba sipyii pusamaa ɲɛ wɛ.
Pʼa gɔn ba shinma seye ɲɛ wɛ.
25 Ta can bɛ wɛ?
Jɔgɔ wu da já nɛ pye kafinɛjo,
wu na jomɔ pu ɲɛri ɲuŋɔ baa wɛ?»