Zhoramu ya pye Izirayɛli koomɔ pu wo saan we
3
Ayiwa, Zhuda saannaa Zhozafati wo saanra ti yee kɛ ni gbarataanri wuu li na, Akabu ja Zhoramu ya pye Izirayɛli wo saan Samari kulo li ni. A wu yee kɛ ni shuun pye saanra ti ni. 2 Lemu lʼa kolo Tɛhɛnɛ Baa Kilɛ mu ge, a wu lee pye, ga wu di ya lee pye na wu to ni wu nu wu xɔ wɛ. Wu to wu bi faaga beni wemu sin yapɛrɛɛ Baali mu ge, a wu wee ja. 3 Ga Nebati ja Zheroboomu wemu wu bi Izirayɛli nagoo pu pye pʼa jurumu pye ge, a wu daha wee wo jurumu wu na na byi. Wu ya sɔɔ na laraga kɔn wee jurumu wu na wɛ.Zhoramu ya kashɛn kɔn Mowabu fiige ki na
4 Ayiwa, Mesha, Mowabu fiige ki wo saan we, yapɔɔmarama wu bye wii. Wu bi ma dubyaa kabɔfoŋɔɔ xhuu nigin (100.000), ni dubyapelɛyɛ kabɔfoŋɔɔ xhuu nigin (100.000), ni dubya shiire kaan Izirayɛli wo saan wu mu na byi wu wo munaa pɛrɛmɛ. 5 Ba Akabu ya pa xhu wɛ, a Mowabu fiige ki wo saan wu nʼa she le wuyɛ ni na wá Izirayɛli wo saan wu na. 6 Ba lee ya pye wɛ, a saannaa Zhoramu di foro Samari ni, na Izirayɛli wo kashɛnŋmuu pu bɛɛri tɔrɔ. 7 A wu tuduro yaha pʼa shɛ jo Zhuda wo saan Zhozafati mu na: «Mowabu wo saan wʼa nʼa she le wuyɛ ni na wá nɛ na. Ta ma na zhɛ ni na ni kashɛn ki na wu fɛni ya?» A Zhozafati di jo: «Nɛ na ba shɛ, ma na se-e, nɛ bɛ na se. Ma sipyii pu na se-e, nɛ bɛ wuu pu na se. Ma shɔnyɔ yi na se-e, nɛ bɛ woyo yi na se.» 8 A Zhozafati di jo sanha na: «Koo lekɛ ni wù wa da ba shɛ wɛ?» A Zhoramu di jo: «Edomu fiige ki wo siwaga koo li ni wʼà da ba shɛ.»
9 Ayiwa, a Izirayɛli wo saan we, ni Zhuda wo saan we, ni Edomu wo saan wu lɔ na gaaŋi kashɛn ki na. Ba pʼa cabyaa gbarashuun ɲara pye na mari wɛ, pu ya lɔhɔ ta nige kashɛnŋmuu pu mu wɛ, pu di ya lɔhɔ ta yapɔrɔyɔ yi bɛ mu wɛ. 10 Wee tuun wu ni a Izirayɛli wo saan wu jo: «Ee! A go Tɛhɛnɛ Baa Kilɛ ya pii saannaa taanri we yiri, wu ba pu kan Mowabu shɛɛn pu mu!» 11 Ga a Zhozafati di jo: «Ta Tɛhɛnɛ Baa Kilɛ wo tudunmɔ wa shishiin ɲɛ naha, wèe na já zhɛ Tɛhɛnɛ Baa Kilɛ yege wii wemu ɲɔ na-ɛ ya?» A Izirayɛli wo saan wu wo kaaŋa ki wo sipya wa di jo: «Shafati ja Elize wemu wu bi lɔhɔ woni Eli keye na ge, wee wa naha.» 12 A Zhozafati di jo: «Tɛhɛnɛ Baa Kilɛ wo jomɔ pu wa wu mu.» A Izirayɛli wo saan we, ni Zhozafati, ni Edomu wo saan we, a pʼi binnɛ kari Elize yíri. 13 A Elize di Izirayɛli wo saan wu pye: «Ɲaha mu di zhaa nɛ fɛni wɛ? Shɛ ma to we ni ma nu wu wo tudunmɔɔ pu mu.» A Izirayɛli wo saan wu wu pye: «Ahayi! Bani Tɛhɛnɛ Baa Kilɛ ya pii saannaa taanri we yiri wu ba pu le Mowabu shɛɛn keŋɛ ni.» 14 A Elize di jo: «Tɛhɛnɛ Baa Kilɛ ɲìi wo wu mɛgɛ na, Kashɛn Keye yi Fɔɔ we, wee wemu mu nɛ labye pyi ge, nɛ da bye nɛ Zhuda saannaa Zhozafati shiige ta mu na wɛ, nɛ bi da kasɛɛgɛ yaha mu na kaa la shishiin na wɛ, nɛ bi da mu wii bɛ yɛrɛ wɛ. 15 Ga nimɛ, yi pa ni yatingbɔn wa ni.» Ba yatingbɔn wʼa yatinŋɛ ki kpɔɔn wɛ, a Tɛhɛnɛ Baa Kilɛ wo keŋɛ kʼi daha Elize na. 16 A wu jo: «Yemu Tɛhɛnɛ Baa Kilɛ wa yu ge, yee yi wa mɛ na: ‹Yi ke dugo ke su, yʼi wegeye niɲɛhɛyɛ wolo ki ni!› 17 Bani yemu Tɛhɛnɛ Baa Kilɛ wa yu ge, yee yi wa mɛ na: ‹Yi wa da kafɛɛgɛ ɲa wɛ, yʼi wa da zanha bɛ ɲa wɛ, ga ke dugo ke na ba ɲi lɔhɔ na, yi ma gba, yi ni yi yapɔrɔyɔ yi ni.› 18 Ga lee wa latii Tɛhɛnɛ Baa Kilɛ ɲaha tàan wɛ. Wu na ba Mowabu fiige ki bɛ le yi keŋɛ ni. 19 Yi na ba Mowabu wo kashɛn ɲaha kɔn kɔn kulogoo ki co, na wu kugbɔhɔɔ ki bɛ co, na wu tiye nijeye yi bɛɛri kpɔn shan, na wu lobulowegee ki bɛɛri gbere, na faakagereye taga pu faa ɲiŋɛ nijeŋɛ ki kyɛɛgi.» 20 Kee caŋa ki ɲimuguro ɲisɔɔgɔ ki wo saraga ki woloduun wu ni, a lɔhɔ di yìri Edomu fiige ki kacɛ ki na na pa, a fiige kʼi ɲi lɔhɔ na.
21 Lee bi Mowabu shɛɛn ta pʼa yi logo na pii saannaa pii pʼa se di zhɛ kashɛn kɔn pu na. Namaa piimu bɛɛri pʼa nɔ kashɛn ŋmɔmɔ ge, a pʼi pee bɛɛri yiri, a pʼi shɛ yere kodɛhɛnɛ li na. 22 A Mowabu shɛɛn pʼi ba sɔɔ yìri. Ba caŋa kʼa pa do lɔhɔ ki na wɛ, a kʼi ganha na yɛrɛ. A Mowabu shɛɛn di lɔhɔ ki ta kʼa ɲaaŋa puyɛ ɲaha tàan ba shishan ɲɛ wɛ. 23 A pʼi jo: «Shishan pu ɲɛ pe! Nakaara baa Saannaa pʼa ŋmɔparaa lɔ puyɛ na, na puyɛ gbo gbo. Ayiwa nimɛ, Mowabu shɛɛn, yi foro kashɛn yataa li fɛni!» 24 Ba pʼa foro na shɛ nɔ Izirayɛli wo kashɛn keŋɛ ki na wɛ, a Izirayɛli wo kashɛnŋmuu pʼi yìri pu fɛni, na do pu na, a Mowabu shɛɛn pʼi baa gbee. A Izirayɛli wo kashɛnŋmuu pʼi pu nɔhɔ niinɛ, na se ta pu na. 25 A pʼi Mowabu kulogoo ki ɲuŋmahaa wolo wolo, na pu faakagereye yi shan shan faa ɲiŋɛ nijeŋɛ ki bɛɛri na, fo na ki ɲi faakagereye yi na. A pʼi lobulowegee ki bɛɛri gbere gbere, na tiye nijeye yi bɛɛri kpɔn shan. A Kiri-Arasɛti kulo li yɛ nigin di ba shɔ to. Ga a sɔwaa fɛɛ pʼi shɛ li kuuri, na li wá fo na li shan. 26 Mowabu saan wʼa pa li ɲa na kashɛn kʼa wu fanha ki ɲuŋɔkana ye ge, a wu kashɛnŋmuu ŋmɔparaa fɛɛ xhuu gbarashuun (700) lɔ, kɔnhɔ wu taforogo sha wʼa se Edomu wo saan wu yíri, ga pu ya já wɛ. 27 Wee tuun wu ni, a wu wu jashiimɛ wu co, wee wemu wu bi da ba diin wu tɛgɛ saanra ti na ge, na wu wolo saraga kashɛn ɲaha kɔn kɔn kasɔrɔgɔ ki na. A lee di Izirayɛli nagoo pu logoo yirige fo xuuni, a pʼi laha wu tàan, na guri kari pu wo fiige ki ni.